Саха сирин Ил Дарханын эбээһинэһин толорооччу Айсен Николаев уонна Ил Түмэн Бэрэссэдээтэлэ Александр Жирков от ыйын 28 күнүгэр Уус-Алдан улууһугар сырыттылар.
 
Бу күн улуус киинигэр Бороҕоҥҥо республика уонна улуус инникитигэр улахан суолталаах икки киэҥ ыҥырыылаах мунньаҕы тэрийдилэр.
 
Бастаан Саха сиригэр сир оҥоһугар, сүөһү иитиитигэр тыын суолталаах ходуһа, бааһына сирдэрин ньүөлсүтүү уонна тыа сирин олохтоохторун иһэр, туттар уунан хааччыйыы туругун уонна инники өттүгэр үлэлэри дьүүллэһии буолла. Республика үрдүнэн билигин сүүһүнэн ахсааннаах быһыт ситимэ биһиги аата-ахса суох үрэхтэрбит сүнньүлэрин кэрийэ тутуллан күһүн, сайын, саас уу кэлиитин-барыытын салайарга туһалыыллар. Балартан үгүстэрэ көннөрү буор быһыттар, улахан үрэхтэргэ эрэ өрдөөҕүтэ сэбиэскэй кэмҥэ тутуллубут капитальнай оҥоһуктар бааллар, 90-с сылларга Өлүөнэттэн хас да хайысханан Туора күөлгэ уонна Мүрүгэ алааһыгар үргүлдьү тиийэр уу турбалара тардыллыбыттара.
 
Бу быһыттар үлэлэрин республикаҕа Алексей Гуляев салайааччылаах тыа хаһаайыстыбатын уонна продовольственнай политикатын министиэристибэтин сири сөргүтэр уонна тыа хаһаайыстыбатын сирдэрин уунан хааччыйар управлениета салайар. А. А. Гуляев иһитиннэриитинэн, республикаҕа сири нүөлсүтүү үлэтигэр кэнники сылларга тустаах болҕомто ууруллубакка үгүс объектар эргэрэн, мөлтөөн, ууну тутар кыахтарыттан тахсан эрэллэр. Уус-Алдан улууһун Мүрү алааһыгар түһэр Өлүөнэ уута былааннаммыт кыаҕын аҥарыттан кыратын эрэ туһанар. Дүпсүҥҥэ тутуллуохтаах водоемҥа сүүсчэкэ мөлөйүөннээх үлэ барбыт аатырар да, үлэ түмүктэниэхтээҕэр улам айгыраан иһэр диэн бэлиэтээтилэр.
        
Айсен Николаев тыа хаһаайыстыбатын миниистирин эбээһинэһин толорооччу Александр Атласовка, правительство солбуйар бэрэссэдээтэлин эбээһинэһин толорооччу Денис Белозеровка республикаҕа сири ньүөлсүтүү анал программатын оҥорууну уталыппакка саҕалыылларыгар сорудах биэрдэ. Бу мунньахха Уус-Алдан, Бүлүү, Ньурба, Чурапчы, Үөһээ Бүлүү, Таатта уонна Мэҥэ-Хаҥалас улуустарын баһылыктара, бэрэстэбиитэллэрэ кытыннылар, боппуруоһу дьүүллэһиигэ тыл эттилэр.
 
Күн иккис аҥаарыгар  Ил Дархан эбээһинэһин толорооччу уонна Ил Түмэн Бэрэссэдээтэлэ кинилэри арыаллыыр бөлөҕү кытта Лөгөй нэьилиэгэр Анатолий Бурнашев салайар бааһынай хаһаайыстыбатыгар уонна Хомустаах, Кэптэни түөлбэлэригэр сырыттылар, Сергей Мигалкин салайар «Пит-стоп» мастарыскыайын көрдүлэр. Улууска тутулла турар объектары билистилэр, «Уолан» гимназия, «Мүрүчээнэ» детсад коллективтарын кытта көрүстүлэр.
 
Киэһээ биэс чааска Өркөн культура дьиэтигэр улуус социальнай-экономическай сайдыытын дьүүллэһэр мунньахха улуус, нэһилиэктэр салайааччылара, тэрилтэ салайааччылара, общественность бэрэстэбиитэллэрэ кыттыыны ыллылар.
 
Улуус баһылыга Алексей Федотов улуус кэлэр өттүгэр социальнай – экономическай сайдыытын туһунан былааны сиһилии кэпсээтэ. Боппуруоһу дьүүллэһиигэ Уус Алдан киин балыыһатын сүрүн бырааһа Анна Петрова, “Кэнчээри” оҕо ансаамбылын салайааччыта Василий Парников уонна да атыттар кытыннылар, суругунан боппуруостар бэрилиннилэр.
 
Түмүк этиилэри Ил Түмэн Бэрэссэдээтэлэ Александр Жирков уонна Ил Дархан эбээһинэһин толорооччу Айсен Николаев оҥордулар.
 
Айсен Сергеевич бэйэтин этиитигэр улуус социальнай-экономическай сайдыытын программата балай да чочуллан оҥоһуллубутун бэлиэтээтэ. Салгыы бу программаны республика тустаах программатын кытта өссө ыкса ситимнииргэ эттэ.
 
Мустубут дьон Ил Дархан эбээһинэһин толорооччу улуус киинигэр тутулла турар В.В. Никифоров-Күлүмнүүр аатынан культура дыбарыаһын тутарга сорудах биэрбитин уонна Уус-Алданнар өр күүппүт, Саха сирин VIII спортивнай оонньууларын болдьоммутун курдук 2022 сылга от ыйын 4-9 күннэригэр Уус-Алдаҥҥа ыытарга диэн дьаһал бу быйыл от ыйын 27 күнүгэр баттаабытын туһунан иһитиннэрбитин улаханнык үөрэ, астына иһиттилэр, Айсен Сергеевичка инники өттүгэр ситиһиини баҕардылар, алҕыы хааллылар.
 
Ил Түмэн пресс-сулууспата