Саха Өрөспүүбүлүкэтин Ил Түмэнин бэрэссэдээтэлин бастакы солбуйааччы Александр Жирков тохсунньу 31 күнүгэр араас өрүттээх көрсүһүүлэри, мунньаҕы тэрийэн ыытта.

 
Күн бастакы аҥаарыгар бастакы вице-спикер Нерюнгри оройуоннааҕы депутаттарын Сэбиэтин бэрэссэдээтэлэ Валерий Селины уонна Ил Түмэн экэниэмикэ, инвестиция уонна быраамысыланнас бэлиитикэтигэр сис кэмитиэтин бэрэссэдээтэлэ Павел Петрову кытта көрүстэ.
 
Кэпсэтии сүрүннээн Саха сирин Соҕуруу өттө кэлимник сайдыытын, инфраструктураны тупсарыы, сир баайын хостооһуҥҥа уонна таҥастааһыҥҥа саҥа эбийиэктэри тутуу, Саха сирин соҕуруу оройуоннарыгар үлэ саҥа миэстэлэрин таһаарыы, олохтоох ыччаты промышленнай улуустарга үлэлииргэ бэлэмнээһин тула буолла. Маныаха Ил Дархан Айсен Николаев былырыын Нерюнгрига сырыытын түмүгүнэн тахсыбыт боротокуол толоруллуутун хаамыытын көрдүлэр. Олохтоох былаас, депутаттар сэбиэттэрэ ити чааһыгар хайдах көмөлөһүөхтэрин сөбүн ырыттылар. Маны таһынан, аҕыйах хонуктааҕыта Саха Өрөспүүбүлүкэтин Бырабыыталыстыбата «Мечел» хампаанньаны кытта Элгээҕэ саҥа бөһүөлэк тэриллиитин туһунан сөбүлэспиттэрин тула эмиэ кэпсэттилэр.
 
Ол кэннэ Александр Жирков РФ Судаарыстыбаннай Дууматын депутата Галина Данчикованы кытта көрүстэ. Саха Өрөспүүбүлүкэтин Ил Түмэнэ сокуону оҥорууга ыытар көдьүүстээх үлэтин, көҕүлээһиннэрин федеральнай таһымҥа өйүүр туһунан санаа атастастылар, үлэ торумун ырытыстылар. Инникитин айылҕа баайыгар, экологияҕа, ирбэт тоҥҥо, Арктикаҕа сыһыаннаах сокуоннар барылларын туһунан кэпсэттилэр.
 
Саха сирин Хотугу аҕыйах ахсааннаах төрүт норуоттарын сиргэ-уокка сыһыаннаах интэриэстэрин көрүү өрүүтүн улахан суолталаах. Саха Өрөспүүбүлүкэтин сирин-уотун кытта кини сир аннынааҕы баайын баһылааһын тула сыһыан эмиэ быһаччы ситимнээх. Аныгы быһыыга-майгыга ити алтыһыы сиртэн хостонор баайы туһаҕа таһаарааччылар уонна Саха сирин олохтоохторун интэриэстэрин көмүскүүр өрөспүүбүлүкэ икки ардыларыгар сыһыаннаһыы таһымын курдук көрүллэр буолбутун туһунан этилиннэ.
 
Өрөспүүбүлүкэ баһылыгын боломуочуйатын күүһүрдүүнү кытта тэҥҥэ Ил Түмэн дьайар кыаҕын, кини өрөспүүбүлүкэҕэ даҕаны, федеральнай таһымҥа даҕаны буолар быһыыга-майгыга сөптөөхтүк дьаһанар кыахтаах, көдьүүстээх парламент буолуохтааҕа бэлиэтэннэ.
 
Салгыы Александр Жирков агрооскуолалар дириэктэрдэрин, учууталлары кытта көрүстэ.
 
Көрсүһүүгэ агрооскуолалар дириэктэрдэрэ, тыа хаһаайыстыбатын миниистирэ Александр Атласов, үөрэх миниистирин солбуйааччы Владимир Тихонов, атын министиэристибэлэр, тэрилтэлэр бэрэстэбиитиллэрэ кытыннылар. Александр Жирков инники үлэ хайысхатын, кэскилин, бу салааҕа агротехнопарк, информатизация сайдыытын туһунан санааларын эттэ. Үөрэх, тыа хаһаайыстыбатын, урбаан уонна Арктика министиэристибэлэрэ агрооскуолалар сайдыыларыгар төһүү буолалларыгар анал этиилэри киллэрдэ. Тус сыаллаах судаарыстыбаннай тосхоллору – бырагыраамалары сырдатта.
 
Эмиэ бу күн Александр Николаевич СӨ Бырабыыталыстыбатын бэрэссэдээтэлэ Владимир Солодовы кытта көрсөн кэпсэттэ. Кэпсэтии Саха Өрөспүүбүлүкэтин Ил Түмэнин уонна бырабыыталыстыба бииргэ үлэлиир механизмнарын тула буолла.
 
Олунньу ый саҕаланыытыгар Уус-Алдан улууһугар бырабыыталыстыба отчуотун тиһэх түһүмэҕэ ыытыллыахтаах. Бу мунньахха ситэриилээх былаас уорганнарын, Ил Түмэн салайааччылара, депутаттар, олохтоох бэйэни салайыныы уорганнарын, уопсастыбаннай тэрилтэлэр бэрэстэбиитэллэрэ кыттыахтара. Сүрүннээн улууска суол тутуутугар, улахан социальнай эбийиэктэри тутууга, уонна Саха сирин норуоттарын VIII спортивнай оонньууларын бэлэмнээһин чэрчитинэн кэпсэтии буолара сабаҕаланар. Улуус дьаһалтатын туоруорсуутунан быйылгы бырабыыталыстыба отчуотугар өрөспүүбүлүкэ бырабыыталыстыбатын бэрэссэдээтэлэ Владимир Солодов салалталаах бөлөх тахсыаҕа. Онон сибээстээн Владимир Солодов, Александр Жирков, улуус баһылыга Алексей Федотов бырабыыталыстыба отчуотугар улуус туруорар сүрүн боппуруостарын тула кэпсэттилэр.
 
Бу иннинэ Александр Жирков уонна улуус баһылыга Алексей Федотов Саха Өрөспүүбүлүкэтигэр Уһук-Илиҥҥи уокуруктан федеральнай инспектор Виктор Хохрины кытта көрсөн улуус киинигэр Бороҕоҥҥо Лонгинов уулуссатын тутууну салҕаан, уулусса уонна муоста болдьоммут кэмнэригэр, 2020 сыл күһүнүгэр тутуллан бүтүөхтээхтэр диэн сорудаҕы оҥоттордулар.
 
Ил Түмэн пресс-сулууспата