1 февраля 2023 года, 06:57 (UTC+9:00) t в Якутске: -32 (09:00)

Александр Жирков: Сахабыт сирин, дьоммут-сэргэбит туһугар

Кулун тутар 28 күнүгэр Саха Өрөспүүбүлүкэтин Ил Түмэнин Бэрэссэдээтэлэ Александр Жирков Уус Алдан улууһун Түүлээх, Бээрийэ уонна II Байаҕантай нэһилиэктэригэр сылдьан олохтоохтору кытта көрүстэ. Кинилиин улуус үөрэҕин управлениетын салайааччы Ирина Тарская уонна Ил Түмэн муниципальный тэриллиилэри кытта үлэҕэ отделын салайааччы Сергей Бурнашев сылдьыстылар.
 
Түүлээх нэһилиэгэ
 
Нэһилиэккэ 50 миэстэлээх оҕо саада тутулла турар. 2016 сыллаахха бырайыага бигэргэтиллэн, 2017 сылга көндөйө бүппүтэ. Оҕо саадын сэбиэдиссэйэ Анна Семенова иһитиннэрбитинэн, аукцион сатаммакка быйыл тутуу тохтоон турар, онон итини быһаарсан, быйыл саҥа дьиэ үлэҕэ киирэрэ буоллар диэн баҕа санаатын эттэ.
 
Түүлээх нэһилиэгэр олохтоох дьаһалта үлэһитэ Анна Петухова иһитиннэрбитинэн, күн бүгүн Кылаайыга 264 ынах сүөһү уонна 307 сылгы баар. Быйылгы кыстыкка от тиийбэккэ 24 тоннаны Амур уобалаһыттан сакаастаабыттарын бэлиэтээн эттэ.
 
Нэһилиэк депутата Николай Турантаев 2016 сыллаахха библиотека-музей тутан саҕаалаабыттара быйыл үп-харчы көстүбэккэ тохтоон турарын эттэ уонна бу сайын 9 ыал дьиэтэ ититии ситимигэр киириэхтээх, манна 9 эрэ буолбакка, өссө элбэх дьиэ холбоноро буоллар диэн баҕатын эттэ.
 
Маны таһынан олохтоохтор Россия, аан дойду балаһыанньатын, экономика, политика тыҥаан турар боппуруостарын туһунан санааларын үллэһиннилэр. Өрөспүүбүлүкэҕэ ыытыллар үлэни норуокка туһалаах буоларын бэлиэтээтилэр.
 
Бээрийэ нэһилиэгэ
 
Бээрийэ олохтоохторо, бастатан туран, Александр Жирковка нэһилиэк сайдыытыгар куруук сүбэлээн-амалаан, туруорсар боппуруостарыгар ыйан-кэрдэн көмөлөһөрүн иһин махталларын биллэрдилэр. Баһылык Петр Васильев нэһилиэк билиҥҥи туругун билиһиннэрдэ уонна быһаарыллыбакка турар боппуруостары сырдатта. Кини этэринэн, быйыл нэһилиэк дьиэлэрэ бары ититии ситимигэр холбонуохтаахтар, олохтоох көҕүлээһини өйүүр бырагырааманан 1 мөл. 670 тыһ. солк. көрүллэн, сайын уу ситимэ тардыллыахтаах.
 
Күн бүгүн Бээрийэҕэ сүрүннээн оҕо саада уонна оскуола хаарбах туруктаахтар. Бу объектар оҕону иитии, үөрэтии ирдэбиллэригэр эппиэтээбэттэр. Ол иһин олохтоохтор бу боппуруостары Александр Жирков болҕомтоҕо ыларыгар көрдөстүлэр.
 
Александр Жирков өрөспүүбүлүкэҕэ тутуу үбүлээһинэ улаханнык сарбыллан, билигин тутуулары аҕыйатыы бара турарын бэлиэтээтэ. Онон, бастатан туран, хайа объект урут тутуллуохтааҕа быһаарыллыахтааҕын эттэ. Нэһилиэк дьаһалтатыгар, оскуола салалтатыгар саҥа оскуола миэстэтин көрдөөн, бырайыагын оҥорон, үлэни саҕалыы турарга сорудахтаата.
 
Итини таһынан олохтоохтор нэһилиэккэ сибээс мөлтөҕүн, интернет бытаан буолан үлэ-хамнас тардылларын, суол-иис туругун, сири тупсарыы боппуруостарын көтөхтүлэр.
 
II Байаҕантай нэһилиэгэ
 
Былырыын нэһилиэккэ олохтоох көҕүлээһини өйүүр бырагыраама чэрчитинэн 1 мөл. солк. үбүлээһин көрүллэн, киин уулуссаны тупсарыы үлэтэ ыытыллыбыта. Маны таһынан И.С. Колодезников аатынан Тиит Арыы орто оскуолатыгар спортивнай саала бу сыл кулун тутар 16 күнүгэр үөрүүлээх арыллыыта буолбута. Баһылык Андрей Егоров иһитиннэрбитинэн, быйыл нэһилиэк дьиэлэрэ бары ититии ситимигэр холбонуохтаахтар.
 
Нэһилиэккэ күн бүгүн оҕо саадын өрөмүөнэ, сибээскэ, интернеккэ холбонуу, бөҕү таһар массыынанан оскуоланы хааччыйыы, Танда үрэххэ быһыты оҥоруу, дьарыктаах буолуу боппуруостара болҕомтоҕо тураллар.
 
Ил Түмэн спикерэ хас нэһилиэк аайы туруорсар боппуруостары боротокуолга киллэрэн, Ил Түмэн хонтуруолугар ыларга, олору быһаарарга улуус дьаһалтата, үөрэх управлениета үлэлэһэллэригэр сорудахтаата.
 
Александр Жирков олохтоохтор болҕомтолорун Саха Өрөспүүбүлүкэтин Ил Түмэнэ Государственнай Дуумаҕа, Федерация Сэбиэтигэр, Россия Бырабыыталыстыбатыгар туруорсар боппуруостарыгар туһаайда. Чуолаан Россия Федерациятын Уһук Илин уонна Арктика сайдыытын бырагыраамалара биһиги Сахабыт сиригэр туһалаах буоларын туһугар ыытыллар үлэни кэпсээтэ. Итини таһынан кини Саха сиригэр ылыллыбыт федеральнай сокуоннар Россия, аан дойду таһымыгар тахсыахтаахтарын бэлиэтээтэ. Ол эбэтэр “Сир баайын туһунан”, “Ирбэт тоҥу харыстааһын уонна көдьүүстээхтик туһаныы”, “Россияҕа доруобуйа харыстабылын уратыларын туһунан” федеральнай сокуоннар, Этнологическай экспертиза, Саха Өрөспүүбүлүкэтин Экологическай доктрината, аҕыйах ахсааннаах норуоттары харыстааһын боппуруостара -- бу барыта Россия, ону ааһан аан дойду таһымыгар тэҥҥэ көрүллэр буоларын ситиһиэхтээхпит диэн кини эттэ.
 
Бэлиэтээн эттэххэ, экологияҕа сыһыаннаах боппуруостары Саха Өрөспүүбүлүкэтин Ил Түмэнэ 2017 сыл кулун тутар 20-21 күннэригэр Москваҕа “Экология” норуоттар икки ардыларынааҕы VIII форумҥа уонна ыам ыйын 1-3 күннэригэр Санкт-Петербурга ыытыллыбыт Экологическай форумҥа уонна быйыл кулун тутар 22-23 күннэригэр Москваҕа “Экология” норуоттар икки ардыларынааҕы IX форумҥа туруорбута.
 
Уус-Алдан улууһун үс кытыы нэһилиэгин олохтоохторо Александр Жирковка кинилэр бары кыһалҕаларыгар, туруорсар боппуруостарыгар өрүү болҕомтолооҕун, мэлдьи билсэ, сүбэлии-амалыы, онтон кыаллыбат өттүгэр быһаччы көмөлөһө сылдьарын анаан бэлиэтээтилэр, Ил Түмэн спикеригэр махталларын биллэрдилэр. «Александр Николаевич инники өттүгэр дьоҥҥор-сэргэҕэр, өрөспүүбүлүкэбит, норуоппут туһугар кэскиллээх, далааһыннаах үлэҕин биһириибит, салгыы ситиһиини баҕарабыт диэн», – баҕа санааларын этэн, алгыы хааллылар.
 
Ил Түмэн пресс-сулууспата 
Опубликовано: 30 марта, 2018 - 12:46
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице