1 февраля 2023 года, 07:25 (UTC+9:00) t в Якутске: -32 (09:00)

Ил Түмэн депутаттара Павловскайга саҥа оскуола аһыллыытыгар кытыннылар

 Саҥа дьыл иннинэ, ол эбэтэр ахсынньы 29 күнүгэр, Мэҥэ Хаҥалас улууһун Павловскай нэһилиэгин олохтоохторо үс этээстээх, 350 миэстэлээх, киэҥ-куоҥ, таас оскуоланы үөрүүлээх быһыыга-майгыга арыйдылар.
 
Бу бэлиэ күҥҥэ Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Алексей Дьячковскай, Ил Түмэн депутаттара Александр Романов, Юрий Николаев, үөрэх миниистирэ Феодосия Габышева, Мэҥэ Хаҥалас улууһун баһылыга Николай Старостин, Нөөрүктээйи нэһилиэгин баһылыга Николай Федоров, улуустааҕы үөрэх салалтатын начальнига Ирина Черкашина кытыннылар.
 
Бу нэһилиэккэ маҥнайгы оскуола 140 сыл анараа өттүгэр тутуллубута биллэр, онуоха маннык тупсаҕай көстүүлээх, аныгы кэм ирдэбилигэр толору эппиэттиир оскуоланы улаханныын-кыралыын бары кэтэспиттэрэ. Бу баҕа санаа олоххо киирэригэр Саха Өрөспүүбүлүкэтин Ил Дархана Егор Борисов, Бырабыыталыстыба, Ил Түмэн депутаттара туһааннаах үлэни ыытан ситистилэр.
 
Салгыы ыҥырыылаах ыалдьыттар, итиэннэ "Кыһыл Сулус" уордьан кавалера, Павловскай орто оскуолатын выпускнига, технология учуутала Иван Степанов, 11 кылаас туйгун үөрэнээччитэ Ульяна Аргунова кыттыылаах кыһыл лиэнтэни быстылар.
 
Бу дьоро күн олохтоохтор үөрүүлэрин үллэстэ Ил Түмэн тутууга уонна дьиэ-уот коммунальнай хаһаайыстыбаҕа сис кэмитиэтин бэрэссэдээтэлэ Александр Романов, бюджекка, үпкэ, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев анаан-минээн тиийэн, эҕэрдэ бастыҥын эттилэр. «Бу өр сыллар усталарыгар ыра санаа оҥостубут баҕаҕыт туолар үөрүүлээх күнүгэр кэлэн турарбыттан олус үөрэбин. Омук сайдыыта кэнэҕэски ыччаты иититигэр сытар. Оройуоҥҥут салалтата, оройуоннааҕы депутаттар Сэбиэттэрэ Саха Өрөспүүбүлүкэтин Бырабыыталыстыбатын, Ил Түмэн сис кэмитиэттэрин бэрэссэдээтэллэрин Александр Романовы, Юрий Баишевы кытта оройуон социальнай сайдыытыгар дьайар боппуруостарга хардарыта таһаарыылаахтык үлэлээн, саҥа оскуола тутулуннаҕа. Онон мэҥэлэр дьоллоох дьоҥҥут. Павловскай оскуолата техническэй хайысхаҕа болҕомто ууруон баҕарабын. Балысханнык сайдар олохпутугар техническэй үөрэхтээхтэр кэмнэрэ кэллэ. Инньэ гынан, эһиги оскуолаҕыт Саха сирин сайдыытыгар бэйэтин кылаатын киллэриэ диэн эрэнэбин», - диэн Ил Түмэн депутата Юрий Николаев бэлиэтээтэ.  
 
Ил Түмэн тутууга уонна дьиэ-уот коммунальнай хаһаайыстыбаҕа сис кэмитиэтин бэрэссэдээтэлэ Александр Романов биир дойдулаахтарын саҥа оскуола үлэҕэ киирбитинэн Саха Өрөспүүбүлүкэтин Судаарыстыбаннай Мунньаҕын, республика тутааччыларын ааттарыттан эҕэрдэлээтэ уонна сис кэмитиэт Бочуоттаах грамоталарын бастыҥ үлэһиттэргэ туттарда.   
 
Саха Өрөспүүбүлүкэтин Ил Дарханын Егор Борисов аатыттан алын сүһүөх кылаастар үөрэнэр лабораторнай тэриллэрин ылалларыгар туоһу суругу оскуолаҕа туттардылар.
 
 «Ыра санаам оскуолата, дорообо!» диэн кылаас чаастара ыытылыннылар. Итиэннэ оскуоланы араас сылларга бүтэрбит дьон парааттарынан, «Умнуллубат онус кылаас» анал бырагыраамманан түмүктэннэ.
 
 
Ил Түмэн пресс-сулууспата
Опубликовано: 31 декабря, 2015 - 13:44
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице