24 мая 2022 года, 02:10 (UTC+9:00) t в Якутске: 5 (03:00)

Петр Гоголев: Саха хомуһа – норуот төрүт култууратын, өбүгэ утумун кэрэһитэ

Ытыктабыллаах Сахабыт сирин олохтоохторо!
 
Саха Өрөспүүбүлүкэтин Ил Түмэнин уонна тус бэйэм ааппыттан эһигини Хомус күнүнэн эҕэрдэлиибин!
 
Төрүт дорҕоону киһи-аймах бу Орто дойдуга айыллыаҕыттан, сир ийэ араас муннуктарыгар бытанан олорон, тулалыыр айылҕатыгар, итэҕэлигэр, олоҕор-дьаһаҕар сыһыаннаан, айан-тутан үөскэппитэ. Үтүмэн үйэлэр хаттыктарыттан силис тардар төрүт дорҕоон кэм-кэрдии уларыйыытыгар сөп түбэһиннэрэн, сороҕор күн-дьыл бэйэтэ кистэлэҥин арыйан, киһи өйүнэн, сүрэҕин иэйиитинэн, ураты тыынынан аан дойду олохтоохторун сөхтөрүөн сөхтөрөр. Саха хомуһугар бүтүн норуот төрүт култуурата, өбүгэ утума арылхайдык көстөр.
 
Саха сиригэр Хомус түмэлэ уонна аан дойду норуоттарын хомуһун Киинэ үлэлиир. Билиҥҥитэ үөрэх уонна култуура тэрилтэлэригэр хомуска аналлаах уруоктар, тэрээһиннэр ыытыллаллар, оттон түмэллэргэ, тыйаатырдарга, оскуолаларга – быыстапкалары, төгүрүк остуоллары, семинардары тэрийэллэр. Улуустарга хомуһуннаах хомуһу чочуйан оҥорор уустар элбээбиттэрэ эмиэ элбэҕи этэр.
 
Биһиги тумус туттар айар куттаах артыыстарбыт – Герман уонна Клавдия Хатылаевтар, Альбина Дегтярева сайааччылаах «Айархаан» этно-бөлөх, Юлияна Кривошапкина – Дьүрүйээнэ, Олёна Подлужная – Уутай, Зарина Копырина, Айсен Аммосов, Артур Семенов уонна да атыттар – тас дойду араас куораттарын түһүлгэлэриттэн саха төрүт дорҕоонун омуктарга иһитиннэрэр, куйаартан кутуллар ырыаны-тойугу, матыыбы аан дойду дьонугар-сэргэтигэр бэрт сонуннук тиэрдэллэр. Араас аныгы музыкальнай тэрил, ньыма көмөтүнэн айар куттаахтар саха дорҕоонун тупсаран, сайыннаран биэрэр аналлаахтар.
 
Үйэлэри уҥуордаан кэлбит төрүт дорҕоон хас биирдиибитигэр иҥэ сылдьар тыыннаах эйгэ буоларын хас биирдии саха киһитэ эндэппэккэ билэр. Хомус күнүн ыытыллыыта биһиги норуоппут култуурунай уонна уопсастыбаннай олоҕор биир суолталаах, кэрэхсэбиллээх бэлиэ тэрээһининэн буолар. Бу музыкальнай тэрил сайдыыта саха омук духуобунаһын уонна историятын кытта биир ситимнэнэн инникитин өссө барҕарар, кыаҕырар кэскиллээх.
 
Сахабыт сирин дьонугар-сэргэтигэр Хомус күнүнэн итии-истиҥ эҕэрдэ тылларын аныыбын! Көлүөнэттэн көлүөнэҕэ өрө тутуллан, харыстабыллаахтык сыһыаннаһан оччоттон-баччаҕа диэри кэлбит хомуспутугар уруй-айхал буолуохтун!
 
Саха Өрөспүүбүлүкэтин
Ил Түмэнин бэрэссэдээтэлэ Петр Гоголев
 

Опубликовано: 30 ноября, 2018 - 16:54
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице