Ил Түмэн депутаттара норуот итэҕэллээх дьонун быһыытынан нэһилиэнньэни, дьону-сэргэни кытта көрсөн, олох-дьаһах, үлэ-хамнас кыһалҕаларын быһаарсыылара, кэскиллээх кэпсэтиилэри ыытыылара парламент V ыҥырыытыгар, үгэс курдук, утумнаахтык салҕанар. Ол курдук күһүҥҥү – сааскы сессиялар усталарыгар Ил Түмэн салалтата, сис кэмитиэттэр салайааччылара парламент дьиэтигэр дьону кытта көрсөр күннэрэ бэлиэр быһаарылынна. 
 
Онон Ил Түмэн Председателэ Александр Жирков быйылгы сыл ахсынньы 5 күнүгэр итиэннэ кэлэр сыл муус устар 10 күнүгэр дьону приемнуоҕа. Спикер бастакы солбуйааччыта Анатолий Добрянцев, солбуйааччылар Ольга Макиенко уонна Виктор Губарев бу сыл сэтинньи 14 күнүгэр итиэннэ аны саас кулун тутар 13 күнүгэр дьону кытта көрсүөхтэрэ. Ил Түмэн үрдүкү салалтата нэһилиэнньэттэн дьону кытта көрсөр чааһа ити болдьоммут бары күннэргэ эбиэт кэннэ 15 чаастан киэһэ 18 чааска диэри.
 
Оттон сис кэмитиэттэр председателлэрэ эмиэ эбиэт кэннинээҕи ити чаастарга сэтинньиттэн саҕалаан ый аайы дьону кытта көрсөллөрө былааннанна. Ол курдук Алексей Еремеев, Василий Местников, Юрий Николаев, Виктор Федоров, Александр Романов, Александр Корякин сэтинньи 28, тохсунньу 30, кулун тутар 27, ыам ыйын 29 күннэригэр дьону кытта көрсүөхтэрэ. Дмитрий Саввин, Владимир Прокопьев, Антонина Григорьева, Юрий Баишев, Елена Голомарева. Александр Уаров, Марфа Филиппова ахсынньы 19, олунньу 27, муус устар 24, бэс ыйын 26 күннэригэр дьону приемнууллара былааҥҥа турда. Атын сирдэртэн кэлээччилэр сис кэмитиэттэр председателлэрин кытта сөбүлэһии бэрээдэгинэн кинилэри кытта күн аайы көрсүөхтэрин сөп.
 
Приемҥа суруйтарыан баҕалаахтар 43-52-44 телефонунан эбэтэр Дьокуускай куорат, Ярославскай аатынан уулуссатын, 24/1 №-гэр Ил Түмэн дьиэтин 116 №-дээх кабинетыгар кэлэн билсиэхтэрин сөп.
 
Ил Түмэн пресс-сулууспата