6 февраля 2023 года, 21:36 (UTC+9:00) t в Якутске: -39 (21:00)

Александр Жирков: Быыбардааччылыын көрсүһүү – республика уонна дьон-сэргэ кыһалҕатын туоратыыга, инники сайдыыга көмөлөөх

Ил Түмэн депутаттара  анаан-минээн күн болдьоон, быыбардааччыларын кытта атах тэпсэн олорон кэпсэтиилэрэ кинилэр дьон олоххо-дьаһахха көрсөр ыарахаттарын, нэһилиэнньэни туох долгутарын, ханна туох ситиһиилэр эбэтэр итэҕэстэр баалларын быһаччы билиилэригэр-көрүүлэригэр, республикаҕа баар кыһалҕалары туоратыыга көмөлөһөллөрүгэр биитэр туһааннаах сокуону ылыналларыгар улахан суолталаах. 
 
Ил Түмэн Бэрэссэдээтэлэ Александр Жирков быыбардааччылары кытта көрсөрүгэр болдьоммут күҥҥэ сүүрбэччэ киһи суруйтаран, араас кыһалҕаларын кэлэн  быһаартардылар, сүбэ-соргу туттулар. Спикер быыбардааччылардыын көрсүһүүтүгэр республика сайдыытыгар сыһыаннаах боппуруостартан саҕалаан, саха норуотун интеллигенциятын бастакы бэрэстэбиитэллэрин ааттарын үйэтитии, оскуола тутуутун, быыбардааччылар туруорсар олорор дьиэнэн, сир учаастагынан хааччыллыы, оҕону үөрэттэрии уо.д.а. боппуруостарын быһаарда.  
 
Ол курдук ахсынньы 19 күнүгэр Ил Түмэн Бэрэссэдээтэлигэр “Якутия” авиакомпания кылаабынай штурмана Сарыал Семенов, Дьааҥыттан төрүттээх Лазарь Рожин, ХИФУ студеннарын уопсай дьиэтин вахтера Анна Данилова, Куттал суох буолуутун федеральнай сулууспатын ветерана Константин Михайлов, “Якутия” хаһыат отделын редактора Валентин Христофоров, I группалаах инбэлиит Вера Троева, Саха-Бельгийскэй оскуола директора Марина Петрова уонна директоры солбуйааччы Саргылаана Нафанаилова,  Ыччат аграрнай союһуттан Максим Захаров уонна да атыттар Ил Түмэн Бэрэссэдээтэлин кытта көрсөн, кыһалҕаларын быһаарар суоллары тобулан,  сүбэ ылан бардылар.
 
Спикер дьону кытта көрсүһүүтүгэр саха норуотун номоххо киирбит киэн туттар хорсун-хоодуот киһитэ, Бойобуой Кыһыл знамя уордьан кавалера Гаврил Васильевич Егоров-Бартыһаан Дьөгүөрэп хос сиэнэ, Дьокуускайдааҕы Кооперативнай техникум бастакы куурсун студена Григорий Васильев кэллэ. Александр Жирков бу оҕо үөрэххэ киирэригэр уонна армия кэнниттэн үөрэҕин салгыырыгар көмөлөспүт буолан, спикер дьону кытта көрсөр күнүгэр түбэһиннэрэн хайдах үөрэнэ сылдьарын, туох ситиһиилэрдээҕин кэпсии, махтана кэлбит: “Техникуммар логистикаҕа операционнай үлэ отделениетыгар ситиһиилээхтик үөрэнэ сылдьабын. Күн аайы Тулагыттан сылдьан үөрэнэбин. Дьонум этэҥҥэ үлэлии-хамсыы сылдьаллар. Армияҕа Благовещенскай куоракка радиоразведочнай сулууспаҕа радиотелеграфиһынан сулууспалаабытым. Дедовщина диэн төрүт онно суох, сулууспалыырга олус үчүгэй этэ. Контрагынан салгыы сулууспалыырга хааллара сатаабыттарын дойдубар төннөн үөрэнэр былааннаах буоламмын, сөбүлэспэтэҕим. Үөрэхпинэн салгыы логистик идэтигэр үрдүк үөрэххэ киирэр баҕалаахпын. Соҕуруу эрэ оннук үөрэх баар дииллэр”, -- диэн студент инники былааннарын туһунан санааларын үллэһиннэ. Ил Түмэн Бэрэссэдээтэлэ Бартыһаан Дьөгүөрэп хос сиэнигэр Григорий Васильевка салгыы үчүгэйдик үөрэнэригэр итиэннэ инникитин да сибээһи быспатыгар баҕарда.
 
Ил Түмэн пресс-сулууспата
 
 
Опубликовано: 23 декабря, 2013 - 14:25
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице