6 февраля 2023 года, 02:18 (UTC+9:00) t в Якутске: -38 (03:00)

Дмитрий Саввин “Тыа хаһаайыстыбатын кууһунан атыылыыр ырыынактарын тустарынан” федеральнай сокуон барылын дьүүллэһэр “төгүрүк остуолу” ыытта

Ахсынньы 18 күнүгэр Саха Республикатын Ил Түмэнин тыа сиригэр уонна аграрнай политикатыгар сис кэмитиэтин бэрэссэдээтэлэ Дмитрий Саввин “Тыа хаһаайыстыбатын кууһунан атыылыыр ырыынактарын тустарынан” Краснодар кыраайын Сокуону таһаарар Мунньаҕа көҕүлээбит федеральнай сокуон барылын дьүүллэһэр “төгүрүк остуолу” ыытта.  
 
Сис кэмитиэккэ бу боппуруоһу дьүүллэһиигэ СР Правительствотын, Тыа хаһаайыстыбатыгар уонна аска-үөлгэ политикатыгар министерствотын, республика Ветеринарияҕа департаменын, киин куорат дьаһалтатын, тыа хаһаайыстыбатын бородууксуйатын батарар эргиэн тэрилтэлэрин, потребительскай  кээпэрэтииптэрин, СР бааһынай хаһаайыстыбаларын ассоциациятын  бэрэстэбиитэллэрэ кытыннылар.  
“Дьокуускайга Сайсары ырыынакка тыа хаһһайыстыбатын оҥорон таһаарааччылар бородууксуйаларын кимиэхэ аҕалан туттаралларый, ырыынак туох хайысханы тутуһарый? Бу туһунан биһиги бүгүҥҥү “төгүрүк остуолбутугар” кэпсэтиэх, санааларбытын, этиилэрбитин иһитиннэриэх тустаахпыт”, -- диэн Дмитрий Саввин “төгүрүк остуол” үлэтин аста.
 
 
“Төгүрүк остуол” саҕаланыытыгар кууһунан атыылыыр ырыынактарга тыа хаһаайыстыбатын бородууксуйатын батарыыны тэрийиигэ сыһыаннаһыылары сүрүннүүр бэрээдэги киллэрии сокуон өттүнэн Россияҕа аан бастаан көрүллэн эрэрэ бэлиэтэннэ. Билиҥҥи кэмҥэ тыа хаһаайыстыбатын бородууксуйатын батарыы боппуруоһа ханна баҕарар сытыытык турар. Тыа хаһаайыстыбатын табаарын оҥорон таһаарааччылар соҕотуопканы тутуу, батарыы системата суоҕуттан, суол-иис мөлтөҕүттэн бородууксуйаларын оҥорууга тахсыбыт ороскуоттарын сабар да, барыстанар да кыахтара суох. Бу саҥа сокуон ылыллар түгэнигэр, тыа хаһаайыстыбатын табаарын оҥорооччу, атыыһыт уонна атыылаһааччы икки ардыларыгар быраап сыһыаннаһыыларын сүрүннүүр механизм баар буолуохтаах.
 
“Тыа хаһаайыстыбатын кууһунан атыылыыр ырыынактарын тустарынан” федеральнай сокуон барыла санитарнай-эпидемиологическай ирдэбилгэ эппиэттиир тыа хаһаайыстыбатын табаарын атыылааһыны тэрийии, батарыыны быраап өттүнэн сүрүннээһин уопсай принциптэрин олохтооһун, бу хайысхаҕа кыра уонна орто предпринимательствоны сайыннарыы, тыа хаһаайыстыбатын табаарын оҥорон таһаарааччылар бырааптарын уонна интэриэстэрин туһугар бэлэмнэммит. Барыл тыа хаһаайыстыбатын кууһунан атыылыыр ырыынактарын тэрийии эйгэтигэр сыһыаннаһыылары, тыа хаһаайыстыбатын бородууксуйатын эргиирин, кууһунан атыылыыр ырыынактар үлэлэрин, тыа хаһаайыстыбатын табаарын кууһунан атыылыыр ырыынактарга үлэлиир дьон бырааптарын уонна эбээһинэстэрин сүрүннүүр нуормалары көрөр.
 
Барылы дьүүллэһэр мунньахха депутаттар уонна тыа хаһаайыстыбатын эйгэтиттэн ыҥырыылаах специалистар, салайааччылар республикаҕа улахан куораттарга ырыынактар элбэхтэр эрээри, улуустар кииннэригэр барыларыгар баар буолбатахтарын, олорго хортуоппуйтан саҕалаан тыа хаһаайыстыбатын бары бородууксуйатын батарыыга анаан аҕаллахтарына, ирдэбиллэргэ эппиэттиир сөптөөх уурар сир суоҕа биир туспа кыһалҕаны үөскэтэрин, комиссионердар бородууксуйаны кыра сыанаҕа тута сатыылларын ыйдылар.
 
“Сахаагропродукт” генеральнай директора Константин Тимофеев этэринэн, “Сахаагропродукт” иһинэн 11 улуус түмсэн, бородууксуйатын батарар. Кини Дьокуускайга Сайсары ырыынакка атыылыыр миэстэни атыыласпыттар балыгы киилэтин мөһөөккө, ынах этин 250 солкуобайга туттараллар, сыана араастаһыыта манна сытарын, онон тыа хаһаайыстыбатын табаарын оҥорооччулар ырыынактарын тэрийэр туһунан этэр Краснодарскай кыраай бэлэмнээбит сокуонун өйүүрүн туһунан санаатын эттэ. Константин Тимофеев тыа хаһаайыстыбатын ырыынагын тыа хаһаайыстыбатын табаарын оҥорон таһаарааччылар бэйэлэрэ тэрийэллэрэ ордугун, оччоҕуна эрэ табаары оҥорооччулар бэйэлэрэ барыс ылыахтарын сөбүн, тыа хаһаайыстыбатын бородууксуйатыгар сыана дьиикэй ырыынак туруорар сыанатынан буолбакка, регион былааһынан сүрүннэниэхтээҕин ыйда.
 
Депутат Александр Уаров, Ил Түмэн ааспыт ыҥырыытын депутата Георгий Артемьев Краснодар кыраайыгар тыа хаһаайыстыбатын табаарын оҥорон таһаарыы кээмэйэ улаханынан, инфраструктура үчүгэйинэн, ырыынак дэлэйинэн Саха сириттэн улаханнык уратылаһарын ыйан туран, ити сокуон барылыгар республикаҕа (чуолаан Удачнайга, Мирнэйгэ, Ленскэйгэ, Нерюнгрига, Дьокуускайга)  баар ырыынактарга тыа хаһаайыстыбатын табаардарын оҥорон таһаарааччылар бэйэлэрин бородууксуйаларын быһаччы батаран барыыстаналларын хааччыйар, кууһунан атыы эбэтэр биирдиилээн атыы көрүҥнэригэр биһиги региоммут уратыларын учуоттуур өттүн өйүүр этиилэри  бэлэмнээн киллэрэр  наадатын эттилэр.
 
Дьүүллэһии кэмигэр “төгүрүк остуол” кыттыылаахтарыттан киирбит этиилэри сокуон барылыгар киллэрэргэ бэлэмнииргэ, Правительство уонна олохтоох салайыныы уорганнара бу үлэҕэ кытталларыгар сүбэлиир этиилэр ылылыннылар.
 
Ил Түмэн пресс-сулууспата
 
 
 
Опубликовано: 23 декабря, 2013 - 17:10
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице