Хаҥалас улууһун Өктөмүттэн кэлбит туризм эйгэтигэр үлэлиир предприниматель Анатолий Прокопьев уонна государственнай сакааһы аттаран туруорууга республика Государственнай кэмитиэтин үлэһитэ Василий Андреев улууска туризмы сайыннарыыга туһуламмыт бырайыагы олоххо киллэрэллэригэр өйөбүл боппуруоһугар депутаты кытта кэпсэттилэр. Предприниматель этэринэн, кини “Өктөм-паарка” туризм уонна дьиэ кэргэн сынньалаҥ пааркатын, туристическай базаны  тэрийиигэ 2011 сылтан ылсан үлэлии сылдьар. Кэлбит дьон бу бырайыак ситтэҕинэн-хоттоҕуна, национальнай ис хоһоонноох, улуус киэн туттар миэстэлэрин көрдөрөр-кэпсиир, сырдатар экспозициялардаах анал сынньанар сирдэрдээх буоларын туһунан эттилэр. Ону олоххо киллэриигэ чэпчэтиилээх кредити ыларга депутаттан сүбэ-ама ыллылар. Онон предприниматель Дмитрий Саввин аатыгар сайабылыанньа киллэрдэҕинэ, ити боппуруоһу быһаарсыыга депутат бааны кытта салгыы үлэлэһиэх буолла.

 

Татта улууһуттан Иннокентий Борисов трактор ыларга туох чэпчэтиилэр баалларын туһунан Дмитрий Саввинтан сүбэлэтэ кэлбит. Депутат киниэхэ туһааннаах сүбэни биэрбитин таһынан республика Тыа хаһаайыстыбатыгар уонна ас-үөл политикатыгар министерствотын Сүбэлиир-методическай киинигэр бара сылдьан, ханнык субсидия көрүҥнэрэ баалларын туһунан чопчу көмөнү ыларыгар эттэ. Сэрии кыттыылааҕа, студент Егор Цой олорор дьиэтин усулуобуйатын тупсарыыга  социальнай төлөбүрү көрөрү көрдөһүүтүнэн депутат Үлэ уонна социальнай сайдыы министерствотын аатыгар туруорсуу суругу ыытта.

 

Ити курдук салгыы депутакка тыа хаһаайыстыбатыгар ыытыллар политика боппуруостарынан Ил Түмэн иккис ыҥырыытын депутата Владимир Иванов, республика нэһилиэктэрин төрүччүлэрин электроннай архыыптарын оҥорууну көҕүлүүр республика Хотугу норуоттарын генеалогияларын уонна этнологияларын научнай-чинчийэр институтун директора Константин Аргунов кэлэннэр, туруорсар боппуруостарын быһаарар суоллары тобулууга Дмитрий Саввины кытта кэпсэтэн, санааларын ситэн бардылар.