Бу дьыл от ыйын 16 күнүгэр бүтүн саха норуота, сахалыы ырыаны таптаан истээччилэр бары ыар сүтүктэннибит. Марина Константиновна Попова 87 сааһыгар сылдьан уһун, ыарахан ыарыыттан биһиги кэккэбититтэн туораата.

 

Марина Константиновна 1927 сыл ахсынньы 21 күнүгэр Мэҥэ-Хаҥалас оройуонун Холгума I нэһилиэгэр төрөөбүтэ. Кини ырыаһыт уустук даҕаны, махталлаах даҕаны үлэтин 1946 сыллаахха Дьокуускайга Музыкальнай театр-студияттан саҕалаабыта, 1948-1951 сыллардаахха Саха сиринээҕи радиокомитет хорун артыыһынан, 1956 сыллаахха М.П.Мусоргскай аатынан Ураллааҕы государственнай консерватория национальнай опернай студиятын Саха АССР искусстволарын үтүөлээх деятелэ профессор З.В. Щелокова кылааһыгар үөрэнэн бүтэриэҕиттэн ыла идэлээх ырыаһыт быһыытынан П.А.Ойуунускай аатынан Саха государственнай музыкальнай-драматическай театрын, кэлин Саха музыкальнай опера уонна балет театрын солисткатынан үлэлээбитэ. Операҕа бастакы партияларынан Ларина, Ольга, Няня (П.Чайковскай «Евгений Онегин»), Кыыс Кыскыйдаан, Аан Алахчын Хотун (М.Жирков уонна Г.Литинскай «Ньургун Боотур»), Алгыма уонна Чычып-Чаап (Г.Григорян «Лоокуут уонна Ньургуһун»), Сата (Г.Комраков уонна Э.Алексеев «Манчаары туһунан ырыа») буолбуттара.

 

Хайы-үйэ дьон-сэргэ билиниитин ылан эрэр эдэр ырыаһыт 1957 сыллаахха Москваҕа ыытыллыбыт саха литературатын уонна искусствотын бастакы Декадатыгар кыттыаҕыттан ыла Сахатын сирин тас өттүгэр араас таһымнаах тэрээһиннэргэ, концертарга үгүстүк ыллаабыта.

 

Марина Константиновна Попова эдэр сааһыттан саҕалаан олоҕун тиһэх күннэригэр диэри 60-ча сыл устата ыллаан-туойан дьон-сэргэ кутун туппута, кэтэһиилээх-күүтүүлээх күндү киһи, норуот тапталлаах ырыаһыта буолбута. Хас биирдии ырыатыгар дууһатын ырааһа, майгытын мааныта өтө көстөрө, ол да иһин саха дьонун-сэргэтин дууһатын туппута, тапталын, махталын ылбыта.

 

Сахатын сирин бүтүннүүтүн кэрийэн гастроллаабыта, соҕотоҕун 500-тэн тахса концеры биэрбитэ. Кини репертуара 100-тэн тахса вокальнай айымньыттан турар. Г.Григорян, Г.Комраков, П. Иванова айымньыларын бастакынан толорооччу буолбута, республика үгүс биллиилээх мелодистарын ырыаларын дьоҥҥо тиэрдибитэ.

 

Саха дьоно ытыктаан, киниэхэ сүгүрүйэн Эдьиий Марыына диэн истиҥник ааттыыллара.  Тапталлаах ырыаһыттара сыанаҕа таҕыстар эрэ махталлаах көрөөччү ытыһын тыаһа өрө хабылла түһэрэ. Кини бэйэтэ эрэ сатыырыныы уратытык туттара-хаптара, дьоҥҥо-сэргэҕэ истиҥ, чугас сыһыана, үтүө санаа дэгэттээх ахтыылара, кэпсээннэрэ, ыллыктаах тыла-өһө мустубут дьону ырыа, музыка, үтүө санаа хатыламмат иэйиитигэр түмэ тардара.

 

Марина Константиновна Попова Саха АССР үтүөлээх артыыската, Саха АССР народнай артыыската, Саха Республикатын П.А.Ойуунускай аатынан Государственнай бириэмийэтин лауреата. РСФСР уонна Саха АССР Үрдүкү Сэбиэтин Бочуоттаах грамоталарынан наҕараадаламмыта. Дьокуускай куорат Бочуоттаах олохтооҕо. Саха Республикатын бочуоттаах гражданина, үлэ уонна тыыл ветерана. 2008 сыллаахха Саха Республикатын Президенин грамотатынан наҕараадаламмыта.

 

Саха Республикатын Ил Түмэнин аатыттан саха норуотун тапталлаах ырыаһыта Марина Константиновна Попова олохтон барбытынан бары чугас дьонугар, аймахтарыгар, доҕотторугар уонна кини алыптаах талааныгар сүгүрүйээччилэргэ барыларыгар дириҥ кутурҕаммытын тиэрдэбит. Саха культуратын ытык номоҕо, чаҕылхай талааннаах артыыһа, норуот тапталлаах ырыаһыта, кэрэ, муударай дууһалаах киһи туһунан сырдык өйдөбүл биһиги сүрэхпитигэр, өйбүтүгэр-санаабытыгар өрүү баар буолуоҕа. Умнуллубат, истиҥ өйдөбүл.