29 января 2023 года, 02:38 (UTC+9:00) t в Якутске: -49 (03:00)

Суһал быһаарылар эрэйиллэллэр

Биллэрин курдук, Саха сиригэр иккис сайынын кураан туран, быйыл эмиэ сүөһү аһылыгын бэлэмнээһиҥҥэ ыарахан балаһыанньа үөскээтэ.  Атырдьах ыйын 14-15 куннэригэр Саха Республикатын народнай депутаттара, Ил Түмэн бюджекка, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров уонна сир сыһыаннаһыытыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Афанасий Софронеев Кэбээйи улууһун Ситтэ нэьилиэгэр сырыттылар.
 
Александр Уаров этэринэн, бу сырыы сунньунэн народнай фронт аатыттан буолла. «От ыйын 3 кунугэр мунньах ыытан турабыт, итиэннэ Афанасий Афанасьевич Софронеевтыын Бырабыыталыстыба бэрэссэдээтэлин маҥнайгы солбуйааччыта Алексей Александрович Стручков салайар республикатааҕы оперативнай штаб мунньахтарыгар барытыгар кыттабыт. Оттооһуну түргэнник дьаһаналларыгар бэйэбит көруулэрбитин, кэҥкириэтинэй  этиилэрбитин,  иккиэн илии баттааһыннаах суругу штаб мунньаҕын  кэмигэр туттарбыппыт. Ситтэҕэ сырыыбыт, сунньунэн, ол этиилэрбит олоххо киириилэрэ  төһө туолан иһэллэрин  көрөөһүн-истээһин  буолла. Биир даҕаны    тойон киһи өттө үктэнэ илик сирдэригэр маҥнайгы биһиги эрэ сырыттыбыт», - диир Александр Уаров.

Атырдьах ыйын 14 күнүгэр Александр Уаров уонна Афанасий Софронеев Ситтэҕэ тиийэн нэһилиэнньэни кытта көрсүстүлэр. Кинилэр бэлиэтээһиннэринэн, төһө даҕаны оттооһун, сир астааһын бириэмэтэ буоллар бу көрсүһүүгэ сүүрбэттэн тахса киһи кэлбит.  Депутаттар элбэх боппуруостарга эппиэттээтибиттэр уонна Саха сиригэр, Россияҕа, Аан дойдуга да буола турар бүгүҥҥү быһыы–майгы туһунан сурун сонуннары кэпсээтилэр. Маны кэккэ,  сунньүнэн, оттооһун,  Ситтэ нэһилиэгин социальнай-экономическай сайдыытын боппуруостарыгар тохтоотулар.
 
Александр Уаров Кэбээйи улууһугар Афанасий Софронеев Ил Тумэн Бэрэсэдээтэлин Виталий Басыгысовы, Федерация Советыттан  Вячеслав Штыровы, Александр Матвеевы, Ил Түмэн депутаттарын, сис кэмитиэттэрин бэрэсэдээтэллэрин  элбэхтик илдьитэлии сылдьыталаабытын, төрөөбүт улууһун  сайдыытыгар хайа кыалларынан көмөлөһө, баар боппуруостарга болҕомто тардарын бэлиэтиир.

«Ситтэлэр оскуолалара,  балыһалара, детсааттара олох эргэрбит, отучча сыллааҕыта Афанасий Афанасьевич совхоз директорынан үлэлиир эрдэҕинэ тутуллубут объектар. Физзал тутуллуута быйыл республикатааҕы «Үтүө Дьыалар» хамсааһыннарынан эбии өссө биэс суус тыһыынча көрүлүннэҕинэ олоххо киирэр кыахтаах. Үчүгэйи эттэххэ, оччотооҕу бириэмэҕэ киирбит газовай электростанция үлэлии турар, бөһүөлэк бүтүннүү гааска олорор, онон кытыы өттугэр ыаллар учугэй баҕайы дьиэлэри  туттан олороллорун көрөммүн арыый астынным», - диэн Александр Уаров бэйэтин санаатын үллэстэр.

Ил Түмэн депутаттара Ситтэҕэ кэлбит күннэригэр тутатына отчуттарга тахса сырыттылар, үлэ хаамыыта хайдах барарын, туох кыһалҕа баарын-суоҕун билсистилэр. Кинилэри Ситтэ нэһилиэгин баһылыга Галина Куприяновна Лебедева  арыаллаан сырытта.  Билиҥҥи кэмҥэ түөрт улуустан:  Тааттаттан,  Уус-Алдантан, Чурапчыттан, Мэҥэ-Хаҥаластан аҕыс биригээдэ улэлии сылдьаллар эбит, 51 киьи, 32 тыраахтар.  Бүгүҥҥү  туругунан  1599 туонна от  оттоммут. Александр Уаров республикатааҕы оперативнай штаб өттүттэн, минсельхоз да өттүттэн бастакынан быһаарыллыахтаах боппуруостарынан гөрүүчэйинэн, оттугунан, хааччыйыы буолуохтааҕын тоһоҕолоон эттэ. Маны тэҥэ кини Ситтэҕэ диэри тутуллубут суолу өрөмүннүү охсор, тыһыынчалыы туонналаах оту барытын баржаннан тиэйэ охсор суһал дьаһаллар ылыллыахтарын наадатын эттэ.  

Афанасий Софронеев тэрээһин өттүгэр үлэлэһэргэ болҕомто наадатын бэлиэтээтэ. Кини суол оҥоһуутугар тустаах министиэристибэлэри кытта үгүс кэпсэтии барбытын, элбэх сурук суруллубутун этэн туран, кинилэр өттүлэриттэн туох да дьаһал бү күҥҥэ диэри ылыллыбатаҕын этэр. Гөрүүчэй, оттук, боппуруоһа икки сыл устатыгар туруорсуллар да эмиэ быһаарылла илиган бэлиэтиир. Маны кэккэ, Афанасий Софронеев саппыраапка боппуруоһа хайаан да быһаарыллыан тустааҕын, сыл устата кэлэр-барар дьон, олохтоох нэьилинньэ туттарыгар, сайынын оттуур дьон кэлэрэ-барара сурдээҕин ыарыырын тоһоҕолоон этэн туран, бу боппуруоһу быһаарынан «Туймаданефть»  дьарыктаныахтаах, тыа хаьаайыстыбатын министиэристибэтэ кураатардыахтаах этилэр да ол кыалла илигин бэлиэтээтэ. Афанасий Софронеев өссө биир хайаан да быһаарыллыахтаах боппуруоһунан Ситтэҕэ сибээс  суоҕун эттэ.

Ил Түмэн пресс-сулууспата.

Опубликовано: 17 августа, 2012 - 16:09
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице