29 января 2023 года, 05:19 (UTC+9:00) t в Якутске: -50 (09:00)

Александр Уаров: Сыалбытын-сорукпутун ситистибит

Ил Түмэн бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров республика официальнай делегациятыгар Саха Республикатын народнай депуттарыныын, парламент сис кэмитиэттэрин бэрэссэдээтэллэриниин Москваҕа ыытыллар Саха Республикатын Күннэригэр кыттан кэллэ. 
 
Александр Уаров Российскай Федерация Федеральнай Мунньаҕын Государственнай Думатын экономическай политикаҕа, инновационнай сайдыыга уонна урбааҥҥа кэмитиэтин экспертнай сүбэтин чилиэнин буоларын быһыытынан,  сэтинньи сүүрбэтигэр, экспертнай сүбэ мунньаҕар кытынна. Экспертнай сүбэҕэ  Россия регионнарыттан икки киһи киирэр – бу сүбэ сопредседателэ, Иркутскайдааҕы региональнай олорор дьиэ агентствотын генеральнай дириэктэрэ Владимир Щербаков уонна Саха Республикатын народнай депутата, Ил Түмэн сис кэмитиэтин бэрэссэдээтэлэ Александр Уаров. Мунньаҕы Государственнай Дума депутата, экспертнай сүбэ сопредседателэ Игорь Игошин салайан ыытта.
 
Мунньахха бюджет эйгэтин үлэһиттэригэр анаан олорор дьиэлэри тутуу боппуруоһа көрүлүннэ. Биллэрин курдук, Россия президенэ уонна бырабыыталыстыбата 2015 сылга диэри дойдубут ыал дьоно үс гыммыттан биирэ бэйэлэрэ мунньуммут эбэтэр заем ылбыт  үптэринэн дьиэлэниэх тустаахтар уонна ол инниттэн регионнар үлэһит дьон олорор дьиэни атыылаһарга кыамталаах буолалларын ситиһиэхтээхтэр. Экспертнай сүбэ мунньаҕар Александр Уаров этэринэн, саҥа оҥоһулла сылдьар федеральнай сокуон барылынан, олорор дьиэ төлөбүрүгэр үлэһит киһи хамнаһыттан 30%-тан элбэҕэ суох харчы барыахтааҕын, биир киһиэхэ олорор дьиэ кэриҥэ 18 квадратнай метртэн итэҕэһэ суох буолуохтааҕын, ипотека 8%-тан улаатыа суохтааҕын дьүүллэспиттэр.
 
Бу күн, сэтинньи 20-тин киэһэтигэр, аан дойдуга аатырбыт Улахан театр саҥа сценатыгар Саха сирин күннэрин үөрүүлээхтик арыйыы буолла. Александр Сергеевич саала көрөөччүлэринэн толорутун, москвичтар, ыалдьыттар бу тэрээһини үрдүктүк сыаналаабыттарын бэлиэтиир.
 
Сэтинньи 21-22 күннэригэр Ил Түмэн депутаттара Государственнай Думаҕа партиялар фракцияларын кытта көрсүстүлэр. Владимир Васильев салайааччылаах «Биир ньыгыл Россия» партия Госдуматааҕы фракциятын кытта көрсүүһүүгэ пенсияҕа, транспортка, нолуокка, тутууга, завозка, тарифтарга уонна да атын социальнай-экономическай эйгэҕэ сыһыаннаах сүрүн боппуруостар туһунан Ил Түмэн бэрэссэдээтэлэ Виталий Басыгысов, бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлэ Александр Уаров, мандатнай уонна регламентнай хамыыһыйа бэрэссэдээтэлэ Руслан Платонов тыл эппитэр уонна бу боппуростары быһаарыыга Саха сирин регионнааҕы уратытытын булгуччу болҕомтоҕо ылаллырыгар туруорсубуттар.
 
Маны кэккэ, Ил Түмэн депутаттара биэс кэмитиэтинэн тарҕаһан үлэлээбиттэр. Александр Уаров Госдума социальнай политикаҕа кэмитиэтин бэрэссэдээтэлэ Андрей Исаев, доруобуйа харыстабылын кэмитиэтин бэрэссэдээтэлэ Сергей Калашников, регионнааҕы политикаҕа, Хотугу сир, Дальнай Восток проблемаларыгар кэмитиэт бэрэссэдээтэлэ Николай Харитонов үлэлэрин туһунан иһитиннэрбиттэрин  эттэ. Бу көрсүһүүгэ Саха Республикатын народнай депутаттара, Альбина Поисеева, Виктор Губарев, Александр Уаров уонна Саха сирин Госдумаҕа депутата Михаил Николаев тыл эппиттэрин, бэйэлэрин этиилэрин киллэрбиттэрин Госдума депутаттара истэн баран, болҕомтоҕо ылыах буоллулар уонна сотору кэминэн Саха сиригэр Госдума тустаах кэмитиэтин көһө сылдьар мунньаҕын ыытыахпыт диэн эрэннэрдилэр.
 
Бу көрсүһүү кэнниттэн Александр Уаров Ил Түмэн Хонтуруоллуур кэмитиэтин бэрэссэдээтэлин Семен Олесовтыын Госдума депутатынан төрдүс төгүлүн талыллыбыт, бюджеккэ кэмитиэтин бэрэссэдээтэлин бастакы солбуйааччы Глеб Хорга сылдан үп-харчы боппуруоһун быһаарыспыттар. Бюджет Кодексатыгар киириэхтээх уларыйыылар туһунан, ол болдьоҕо уһатыллыахтааҕын туһунан кэпсэппиттэр.  Глеб Яковлевич билиҥҥи туругунан бюджет үлэһиттэрин хамнастарын үрдэтиигэ 350 млрд.солк. эбии наадатын, ол иһин дойду сүүрбэччэ субъектара хамнаһы үрдэтэргэ харчылара суохтарын иһитиннэрдэ.
 
Александр Уаров Саха сирин олохтоохторун балаһыанньата онно холоотоххо быдан ордугун бэлитээн туран, республика бюджетыгар 2013 сылга 6 млрд. 132 мөл. солк. үп көрүллэн олорорун тоһоҕолоон эттэ. «Сэтинньи ыйыгар Ил Түмэн пленарнай мунньаҕар республикатааҕы государственнай бюджет көрүллүөхтээх, онно билигин күргүөмнээх үлэ бара турар», диир Ил Түмэн тустаах сис кэмитиэтин бэрэссэдээтэлэ.
 
Ил Түмэн Пресс-сулууспата

Опубликовано: 28 ноября, 2012 - 14:37
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице