1 февраля 2023 года, 16:46 (UTC+9:00) t в Якутске: -29 (21:00)

Александр Жирков Кыргызтаҥҥа сырытта

От ыйын 22-23 күннэригэр Ил Түмэн вице-спикерэ Александр Жирков Кыргызтан Республикатын киин куоратыгар Бишкеккэ официальнай командировкаҕа сырытта
 
Александр Жирков Бишкек куоракка саха чаҕылхай государственнай, политическай деятелэ Максим Аммосов төрөөбүтэ 115 сылыгар аналлаах тэрээһиннэр түмүктэрин оҥордо. Кыргызстан норуотун Ассамблеятын мунньахтыыр саалатыгар тыл этэригэр Александр Жирков: «Максим Аммосов төрөөбүтэ 115 сыла туолуутун Кыргызтаҥҥа дьоһуннаахтык бэлиэтээтилэр. Саха чаҕылхай уолугар, Саха Республикатын уонна Кыргызстан Республикатын төрүттэспит киһиэхэ Бишкек куоракка памятник туруоруллуута, Бишкек куоракка кини аатынан уулусса баар буолуута уонна Максим Аммосов үлэлээбит дьиэтигэр барельеф оҥоһуллуута - бу бырааттыы кыргыз норуота биһиги киһибитин умнубатын үчүгэйдик саныырын бэлиэтэ», - диэн туран, Кыргызстан Правительстоватыгар, общественнай деятеллэргэ Саха Республикатын, бүттүүн саха норуотун аатыттан махтал тылларын эттэ.
 
Харда тылы эппит Кыргызстан норуотун Ассамблеятын Президенэ Б. Мурзубраимов, Кыргызтан Геройа Б. Жакиев, Кыргызтан Президенын Администрациятын бэрэстэбиитэлэ К. Омуралиева уо.д.а. Максим Аммосов төрөөбүтэ 115 сылыгар аналлаах тэрээһиннэри ыытыыга, Кыргызстаҥҥа Максим Кировичка памятник туруутугар Александр Жирков оруолун чорботон бэлиэтээтилэр.
Ол курдук, Президент Администрациятын бэрэстэбиитэлэ К. Омуралиева: «Кыргызтаҥҥа олох уларыйар кэмигэр биһиги элбэх бэйэбит да дьоммутугар сыана биэриибит уларыйда. Максим Аммосов да дьылҕата оннук буолуор сөбө. Билигин ыраах хоту олорор саха чаҕылхай уолун аата Кыргызстан историятын бастыҥ дьонун аатыгар киирдэ. Советскай кэмҥэ үлэлээбит кыргыз дьонун ааттара улаханнык ахтыллыбат кэмигэр сахаттан төрүттээх советскай деятелгэ памятник туруоруллуута бу биһиэхэ сөҕүмэр суолталаах событие буолла. Максим Аммосовтан сылтаан билигин биһиги сибээспит өссө кэҥээн иһиэ» - диэн эттэ. 
 
Александр Жирков кылгас кэм иһигэр Кыргызтаҥҥа өссө икки тэрээһиҥҥэ сырытта. От ыйын 22 күнүгэр Бишкек куоракка «Олоҥхо» диэн Кыргызстаҥҥа олорор сахалар түмсүүлэрэ тэрилиннэ. Түмсүү салайааччытынан Александр Жирков рекомендациятынан Москватааҕы Суриков аатынан Академияны кыһыл дипломунан бүтэрэн баран, билигин Бишкек куоракка кийиит буолан олорор, художник Ньургуйаана Иннокентьева талылынна. Түмсүү тэриллибитэн эҕэрдэлээн туран, Александр Николаевич түмсүү чилиэннэрин «Максим Аммосов памятнигын көрө-харайа сылдьыҥ, кини аатын түһэн биэрбэт гына олоруҥ, үлэлээҥ, бырааттыы Кыргызтан сиригэр»,- диэн сорудах биэрдэ, алгыс тылын эттэ.
 
От ыйын 23 күнүгэр Александр Жирков «Манас» киинигэр «Ньургун Боотур» олоҥхону кыргыз тылыгар тылбаастыы сылдьар учуонайдары кытта сүбэ мунньах ыытта. Тылбаас үлэтэ 2013 с. ахсынньыга дылы бүтэр кыахтаммытын, 2014 с. саҥатыгар бэчээккэ тахсыан сөбүн бэлиэтээтилэр. Санатан эттэххэ, кыргыз улуу эпическэй айымньытын «Манаһы» сахалыы, онтон улуу Ойуунускай «Ньургун Боотур» олоҥхотун кыргызтыы тэҥинэн тылбастыыр үлэ Александр Жирков көҕүлээһининэн 2012 с. саҕаламмыта. Бу тылбаастар бэчээттэниилэрэ икки норуот культурнай олоҕор улахан суолталаах түгэн буолуоҕа.
 
«Олоҥхо кыргызтыы тылбааһыгар биһиги улахан суолта биэрэбит. Максим Аммосовтан саҕалаан биһиги норуоттарбыт икки ардыларыгар чугас сыһыан олохсуйбута. Ону билигин сөргүтэр, тилиннэрэр кыах үөскээбитэ биһиэхэ культурнай сибээспит кэҥииригэр эрэли үөскэтэр»,- диэн Кыргызтан аатырбыт аксакала, Кыргызстан геройа Бексултан Жакиев бэйэтин харда тылыгар эттэ. Кини Александр Жиркову бу дьыл сэтинньи ыйга кыргыз улуу суруйааччыта Чингиз Айтматов төрөөбүтэ 85 сылын туолар тэрээһиннэргэ кэлэн кыттарыгар ыҥырда.
Ол күн Александр Жирков Москванан Дьокуускайга көттө.
 
Бишкектэн Эсен Сайдыкулов
Ил Түмэн пресс-сулууспата  
Опубликовано: 25 июля, 2013 - 13:12
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице