Ил Түмэн Хонтуруоллуур кэмитиэтин бэрэссэдээтэлэ Александр Уаров былааннаах командировкаҕа сылдьарынан сибээстээн, сүбэ мунньаҕы кэмитиэт чилиэнэ, норуот депутата Александр Сусоев салайан ыытта.

 

Кэпсэтиини саҕалыырыгар Александр Сусоев республика туһааннаах сокуонун олоххо киллэриини хонтуруоллааһыҥҥа үлэлиир хамыыһыйа сүбэ мунньаҕа үһүс төгүлүн ыытылларын бэлиэтээтэ.Ыччат политикатын олоххо киллэриини дьүүллэһиигэ ыччат дьыалатыгар уонна дьиэ кэргэн политикатыгар министри солбуйааччы Алексей Щербаков, министерство отделын салайааччыта Гасан Гасанбалаев, предпринимательство дьыалаларыгар уонна  туризм сайдыытыгар министри солбуйааччы  Александр Андросов уонна Үөрэх итиэннэ Идэҕэ үөрэтии, кадры бэлэмнээһин уонна аттаран туруоруу министерстволарын отделларын салайааччылара, сүрүн специалистара, нэһилиэнньэ дьарыктаах буолуутугар департамент, Ил Түмэҥҥэ Ыччат парламенын итиэннэ ыччат тэрилтэлэрин бэрэстэбиитэллэрэ кытыннылар.

 

Министри солбуйааччы Алексей Щербаков ыччат судаарыстыбаннай политикатын туһунан республика сокуонун олоххо киллэриигэ туһааннаах министерстволар туох үлэлэри ыыта олороллорун туһунан иһитиннэрдэ. Алексей Щербаков этэринэн, республика Ыччат дьыалаларыгар уонна дьиэ кэргэн политикатыгар министерствота ааспыт сүбэ мунньах боротокуолун толоруу бэрээдэгинэн ыччат судаарыстыбаннай политикатын олоххо киллэриигэ сыһыаннаах үлэлэри ыытар министерстволартан ити эйгэҕэ туох үлэлэри ыыппыттарын туһунан информацияны хомуйбутун бэлиэтээтэ.

Ол курдук сүбэ мунньахха орто, үрдүк үөрэхтээһин, идэҕэ үөрэтии, предпринимательство уонна туризм, дьиэ кэргэн итиэннэ ыччат эйгэлэригэр үөһэ ааттаммыт министерстволар нөҥүө олоххо киирэ турар судаарыстыбаннай политиканан ыччаттарга өйөбүл араас көрүҥэ оҥоһуллара бэлиэтэннэ. Республика Идэҕэ үөрэтии, кадры бэлэмнээһин уонна аттаран туруоруу министерствотын өттүттэн студеннарга, үөрэнэр ыччаттарга өйөбүлү көрөр тус сыаллаах тосхоллорунан үлэ бара турар, үөрэх төлөбүрүгэр араас болдьохтоох кредиттэр бэриллэллэр.

 

Предпринимательство дьыалаларыгар уонна туризм сайдыытыгар  министерство нөҥүө эдэр предпринимателлэргэ уонна ыччаттар коммерческай тэрилтэлэригэр бюджекка нолуогу төлөөһүннэригэр көрүллэр чэпчэтиинэн ыччаттарга эбии үлэ миэстэтин таһаарар тэрилтэлэргэ нолуокка чэпчэтиилэр оҥоһуллаллар. Оттон Үөрэх министерствотын өттүттэн орто уонна үрдүк үөрэххэ үөрэнэр студент дьиэ кэргэннэр, төгүрүк тулаайах, инбэлиит итиэннэ аҥардас студент төрөппүттэргэ оҕолорун көрүүгэ-истиигэ, оҕо саадтарыгар чэпчэтиилэр бааллар.

 

 

Ыччат дьыалатыгар уонна дьиэ кэргэн политикатыгар министерство ыччат судаарыстыбаннай политикатыгар уонна ыччаттар интэриэстэрин көмүскээһиҥҥэ нормативнай-правовой төрүттэри оҥорон бэлэмнээбит, ыччаты экологическай өттүнэн иитиини сайыннарыы тиһигин ырытан оҥорбут, республика ыччата көрсөр кыһалҕаларын научнай өттүнэн чинчийиини ыыттарара ситиһиллибит. Итини сэргэ отчуокка республика идэҕэ үөрэтэр алын сүһүөх, орто уонна үрдүк үөрэхтээһин кыһалара бу политиканы олоххо киллэриигэ ыытар үлэлэрин туһунан сиһилии информациялар бааллар.

 

Ыйытыыларга уонна кэпсэтиилэргэ Александр Сусоев, Гасан Гасанбалаев, Алексей Щербаков, “Биир ньыгыл Россия” партия Саха сиринээҕи политсоветын чилиэнэ Василий Попов уонна да атыттар кытыннылар.  Ыччат дьыалатыгар уонна дьиэ кэргэн политикатыгар министерство салайааччылара отчуот ис хоһоонунан ыччат общественнай көҕүлээһиннэрин өйөөһүҥҥэ, ХИФУ тутар этэрээттэрин штабын, «Арктика» сүүмэрдэммит тутар этэрээтин, «Нэһилиэк» бырайыагын судаарыстыба өттүттэн өйүүр үлэлэргэ, ыччат үлэлээх буолуун биржатын тэрийиигэ сыһыаннаах, онтон да атын ыйытыыларга хоруйдаатылар.

 

“Ыччаттар общественнай тэрилтэлэрин, саатар, методическай өттүнэн, өйүүр наадалаах. Кинилэргэ үлэлиир хос бэриллэр буоллаҕына, өссө үчүгэй. Университет тутар этэрээттэрин начальнигынан үлэлиирбэр араас тэрээһиннэргэ баара-суоҕа биэс тыһыынча солкуобайы да биэрдэхтэринэ, үөрэр этибит”, -- диэн ыччакка общественнай дьыаланан дьарыктанарыгар үлэлиир усулуобуйаны хааччыйыыга Александр Сусоев тус санаатын үллэһиннэ итиэннэ Ыччат дьыалатыгар уонна дьиэ кэргэн политикатыгар министерство эдэр ыаллар дьиэнэн-уотунан хааччыллыыларыгар субсидияны биэрии боппуруоһун болҕомто киинигэр тутуохтааҕын, төһө эдэр ыал итинник субсидиянан туһаммытын итиэннэ туһаныан баҕалааҕын учуоттуохтааҕын чорботон бэлиэтээтэ.

 

Сүбэ мунньах түмүгэр Ил Түмэн Хонтуруоллуур кэмитиэтин “Саха Республикатыгар ыччат судаарыстыбаннай политикатын туһунан” республика сокуонун олоххо киллэриини хонтуруоллуур хамыыһыйатыгар киирбит отчуоту бэрэбиэркэлииргэ итиэннэ дириҥник ырытарга, ол кэннэ түмүктэри таһаарарга быһаарыы ылылынна. “Сотору Ил Түмэн Хонтуруоллуур кэмитиэтин мунньаҕа ыытыллыаҕа. Онно Правительство чилиэннэрэ, учуонайдар, үөрэхтээһин тиһигин специалистара уонна общественнай тэрилтэлэр, ыччаттар бэрэстэбиитэллэрэ кыттыахтара. Бу сокуону толоруу хаамыытын бэрэбиэркэлиирбитигэр биһиги хас да министерство үлэтин холбуу хонтуруоллуубут. Онтон кэмитиэт таһаарбыт бүтэһиктээх түмүктэринэн Ил Түмэн туһааннаах уурааҕы ылыныаҕа”, -- диэн Александр Сусоев сүбэ мунньах үлэтин түмүктээтэ.