2014 сыл бэс ыйын 10 күнүгэр Ил Түмэн сааскы сесиятын түмүктүүр уочараттаах IX пленарнай мунньаҕар “Муниципальнай оройуоннар итиэннэ куорат уокуруктарын олохтоох салайыныыларын уорганнарыгар тыа хаһаайыстыбатын производствотын өйөөһүҥҥэ туспа судаарыстыбаннай боломуочуйалары биэрии туһунан” республика сокуонун 2 ыстатыйатыгар уларытыылары киллэрии туһунан республика Ил Дарханын эбээһинэһин толорооччу Егор Борисов уонна норуот депутата, Ил Түмэн спикерэ Александр Жирков сокуону көҕүлүүр этиилэрэ көрүллүбүттэрэ.
Бу боппуруоска иһитиннэриини республика Правительствотын Председателин солбуйааччы Петр Алексеев оҥорбута. Сокуоҥҥа уларытыыны киллэрии -- муниципальнай оройуоннар итиэннэ куорат уокуруктарын олохтоох салайыныыларын уорганнарыгар кинилэргэ сүөһүтэн бородууксуйаны ылыы хайысхатыгар тыа хаһаайыстыбатын производствотын өйөөһүҥҥэ бэриллибит судаарыстыбаннай боломуочуйаларын толороллоругар анаан республика судаарыстыбаннай бюджетыттан олохтоох бюджекка көрүллэр субвенция кээмэйин ааҕыы методикатыгар уларытыыны киллэрэр сыаллаах.
Тыа хаһаайыстыбатын бородууксуйатын оҥорон таһаарыыны судаарыстыба өттүттэн өйүүр саҥа механизм оҥоһуллуохтаах. Ол туһунан этэригэр республика Правительствотын Председателин солбуйааччы Петр Алексеев: “Тыа хаһаайыстыбатын сайдыытын туһунан кэлим сокуон бэлэмнэнэр. Онно дьон үүтү туттарыытын уонна туттарыллыбыт үүттэн бородууксуйаны оҥорууну өйүүр механизмы тупсарыы көрүллүө. Сокуон барыла Общественнай палата уонна Тыа хаһаайыстыбатын уонна ас-үөл политикатыгар министерство тэрийбит дьүүллэһиилэригэр ырытылынна. Онон быраап бары субъектара киллэрбит ыллыктаах этиилэрин учуоттуохпут. Тыа хаһаайыстыбатын сайдыытын саҥа кэлим сокуонун барыла аны күһүҥҥү сессияҕа ылылыннаҕына, билигин туттулла сылдьар методика тохтотуллуоҕа. Онуоха диэри урукку методиканан үлэлиэхпит. Атыннык эттэххэ, муниципальнай тэриллиилэр икки ардыларыгар үбү тыырыы үүт бородууксуйатын уонна арыыны оҥоруу сорудаҕын толорууга туттарыллыбыт үүттэрин кээмэйинэн көрөн оҥоһуллар буолуо”, -- диэн быһааран биэрбитэ.
“Муниципальнай оройуоннар итиэннэ куорат уокуруктарын олохтоох салайыныыларын уорганнарыгар тыа хаһаайыстыбатын производствотын өйөөһүҥҥэ туспа судаарыстыбаннай боломуочуйалары биэрии туһунан” 2013 сыл ахсынньытыгар ылыллыбыт республика сокуонун 2 ыстатыйатын быһыытынан сүөһүттэн бородууксуйаны ылыыны өйүүр субвенция кээмэйин ааҕыы саҥа методиката 2015 сыл тохсунньу 1 күнүттэн күүһүгэр киириэхтээҕэ элбэх дьону долгутар. Онон итини учуоттаан туран, Егор Борисов уонна Александр Жирков “Саха Республикатыгар тыа хаһаайыстыбатын сайдыытын туһунан” көҕүлээн киллэрбит сокуоннарын барылынан ити үөһэ ахтыллыбыт сокуоҥҥа саҥа механизмы оҥорууга уларытыы киирдэ. Сокуон, бастатан туран, сүөһү иитиитигэр идэтийэн үлэлиир дьон бырааптарын араҥаччылыыр.
Дьүүллэһии түмүгэр сокуон барылын норуот депутаттара бастакы уонна бүтэһиктээх ааҕыыга ылыммыттара.
Ил Түмэн пресс-сулууспата
Опубликовано: 29 июля, 2014 - 10:34
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!