Мунньахха сис кэмитиэт чилиэннэрэ Юрий Николаев, Антонина Григорьева, Алёна Атласова, Семён Березин, Ирина Енторова, норуот депутаттара Александр Уаров, Юрий Баишев, Дмитрий Семёнов, өрөспүүбүлүкэ үбүн министрин солбуйааччы Октябрина Никонова, өрөспүүбүлүкэ экоеномикаҕа министрин солбуйааччы Татьяна Корякина, өрөспүүбүлүкэ булгуччулаах медицинскэй страхованиеҕа Территориальнай фондатын директора Василий Назаров, Эбээн-Бытантай национальнай улууһун баһылыга  Иван Горохов, Анаабыр национальнай (долган-эбэҥки) улууһун баһылыга Иван Семёнов, министиэристибэлэр уонна биэдэмистибэлэр салайааччылара, муниципальнай тэриллиилэр, общественнай тэрилтэлэр, сонуннары киэҥник тарҕатар средстволар бэрэстэбиитэллэрэ кытыннылар.  

 

Дьүүллэһии иннигэр сүрүн иһитиннэриини доруобуйа харыстабылын министрин солбуйааччы Людмила Вербицкая оҥордо. Людмила Ильясовна дакылаатыгар эми атыылаһыыттан саҕалаан нэһилиэнньэлээх пууннарга тиэрдии, онно наадыйааччыга тиксэрии бары кэрдиистэригэр баар кэлимсэ проблемалары сырдатта. 

 

Дакылааччыт этэринэн, федеральнай киинтэн үбүлээһин хойутаан кэлэринэн сибээстээн, эмтэри уонна медицинскэй табаардары аҕалыыга киирсэр тэрилтэлэргэ куонкурус хойутаан ыытыллар буолан, атыылаһыы кэмигэр оҥоһуллубат. «Өрөспүүбүлүкэҕэ федеральнай үп бастакы квартал ортотугар эрэ киирэр”, -- диир кини.  Ол эрээри быһыы-майгы үчүгэй өттүгэр уларыйар кыахтаах: «Бу сылга биһиги федеральнай чэпчэтиинэн туһанааччыларга эми атыылаһыы туһунан РФ бырабыыталыстыбатын уурааҕа таҕыста да, тутатына ахсынньы бүтэһигэр эбэтэр тохсунньу саҥатыгар таһаарыахпыт, сөбүлэһиилэри, өрөспүүбүлүкэҕэ үп кэлиитин кэтэспэккэ”. Итини таһынан министри солбуйааччы быйыл үс сыллааҕы бюджет ылылларын быһыытынан уонна эми аҕалыыны атахтаабат сыалтан саатар, икки сылга, уһун болдьохтоох судаарыстыбаннай хантараах механизмнарын оҥорор үлэ барарын, өрөспүүбүлүкэҕэ социальнай суолталаах (инсулин, искэни утары эмтэр) эми-тому аҕалыыга ыытыллар аукцион түмүгэр сыл ахсын наар биир тэрилтэлэр кыайалларын бэлиэтээтэ. «Онон өрөспүүбүлүкэ бырабыыталыстыбата ылбыт дьаһалларын түмүгэр, федеральнай чэпчэтиилэринэн туһанааччыларга 2015 сыл наһаа сытыы буолуо суоҕа», - диэн Людмила Вербицкая эрэнэрин биллэрдэ.

 

Эми-тому кэмигэр тиэрдиигэ нэһилиэнньэлээх пууннар оройуон кииннэриттэн олус ыраахтара, суол-иис мөлтөҕө охсор. Министерство маннык быһыыттан-майгыттан тахсар суоллары көрдүүр.  Вербицкая этэринэн, «Полярнай авиалиния» компанияны кытта дуогабардаһыы быһыытынан, самолеттар, бастатан туран, бэйэлэрин бортарыгар эми-тому тиэниэхтээхтэр.

 

Бу мунньах иннинэ туһааннаах боппуруоһу бэлэмнээһиҥҥэ ыытыллыбыт Ил Түмэн сис кэмитиэтин сүбэ мунньаҕар министри солбуйааччы эмп препараттара бастакы суолталаах бородуукталары кытта тэҥҥэ “А” категорияҕа тутуллуохтаахтарын туһунан министерство быраап нуормалыыр докумуонун бэлэмнээбитин кэпсээбитэ. «Хомойуох иһин, биһиги ити этиибитин федеральнай сокуону кытта утарсар диэн», - диэн туран, дакылааччыт ол иһин бастакы суолталаах эмтэри тиэрдии дуогабардаах төрүккэ оҥоһуллуоҕун туһунан бэлиэтээтэ. Эмп препараттарын санрейстарынан тиэрдии боппуруоһа эмиэ көрүллэр.

 

Людмила Вербицкая нэһилиэнньэни эминэн хааччыйыыга кыра нэһилиэктэргэ аптека суоҕа туспа кыһалҕаны үөскэтэрин ыйда. Итини туоратар сыалтан өрөспүүбүлүкэ бырабыыталыстыбатын дьаһалын барыла бэлэмнэммит. Ол быһыытынан Арктика эҥэр уонна хоту сытар улуустар нэһилиэнньэлэрин тыын суолталаах эмтэринэн харгыһа суох хааччыйары көрөр дьаһаллар былааннара бигэргэтиллиэхтээх. 

 

Парламентарийдар Юрий Николаев, Алёна Атласова, Александр Уаров, Антонина Григорьева, Дмитрий Семёнов, Семён Березин уонна Ирина Енторова дакылааччыкка элбэх ыйытыылары биэрдилэр. 

 

Норуот депутата Дмитрий Семёнов эмтэри атыылаһыыга “дженерик”-тэртэн көмүскэнэр сыалтан эмп препараттарын аҕалыынан дьарыктанар тэрилтиэлэр куонкурустарын ыытыыга техническэй ирдэбиллэри тупсаран биэрэр эрэйиллэрин бэлиэтээтэ. Өрөспүүбүлүкэ судаарыстыбаннай сакаастарын түһэриигэ Госкомитет бэрэссэдээтэлин солбуйааччы Пётр Гаврильев дакылаатыгар итини бигэргэттэ: сиһилии суруллубут техническэй сорудах дьиҥнээх эмтэри атыылаһар кыаҕы биэрэр.  

 

Семён Березин эми ылыыга чэпчэтиинэн туһанар элбэх дьону долгутар боппуруоһу ыйытта: “Улуус олохтооҕо оройуоҥҥа суох эми, холобура, Дьокуускайтан, бэйэтин харчытыгар атыыласпыт киһи ороскуотун хайдах төннөрөр?” Людмила Вербицкая итинник хас биирдии түгэҥҥэ чопчу быһаарсыы ыытылларын, ороскуоту төннөрүүгэ харчынан буолбакка, эминэн эбэтэр ол эмп оннугар атын эминэн бэриллэр диэн быһаарда.  

 

Саха сиригэр доруобуйа харыстабылын эйгэтин кэтээн көрөр федеральнай сулууспа Территориальнай уорганын эмп-том уонна медицина оҥоһуктарын атыытын эйгэтин хонтуруоллуур уонна кэтээн көрөр отделын начальнига Егор Бубякин, өрөспүүбүлүкэ судаарыстыбаннай сакаастарын түһэриигэ Госкомитет бэрэссэдээтэлин солбуйааччы Пётр Гаврильев, Эбээн-Бытантай национальнай улууһун баһылыга  Иван Горохов, Анаабыр национальнай (долган-эбэҥки) улууһун баһылыга Иван Семёнов, Кэбээйи улууһун баһылыгын солбуйааччыта Варвара Полятинская туһааннаах боппуруоска иһитиннэрии оҥордулар.

 

Ил Түмэн киэҥ ыҥырыылаах мунньаҕын кыттыылаахтара ылыммыт сүбэлэригэр бырабыыталыстыбаҕа табаары атыылаһыыга, үлэлэри, өҥөлөрү оҥорууга өрөспүүбүлүкэ наадыйыытын толуйууга судаарыстыбаннай бюджеттан кэмчилэнэн ордубут үбү нэһилиэнньэ чэпчэтиинэн туһанар араҥатыгар эми-тому уонна медицина оҥоһуктарын атыылаһыыга ыытарыгар уонна бырабыыталыстыба туһааннаах уурааҕар (03.06.2014 сыллааҕы 156 №-дээх уураахха) уларытыылары киллэрэригэр этилиннэ. Итини сэргэ Доруобуйа харыстабылын министерствотыгар уонна өрөспүүбүлүкэ судаарыстыбаннай сакаастарын түһэриигэ Госкомитетыгар үөһэ ыйыллыбыт проблемалары быһааралларыгар сүбэлэннэ.

 

Үлэ уонна социальнай сайдыы министерствота РФ Пенсионнай фондатын Саха сиринээҕи салаатын уонна Доруобуйа харыстабылын министерствотын кытта бииргэ федеральнай чэпчэтиинэн туһанар нэһилиэнньэ араҥатыгар социальнай өҥөҕө бырааптарын пакетын бырахпакка илдьэ сылдьалларыгар өйдөтөр үлэни тэрийэн ыыталларыгар сис кэмитиэт чилиэннэрэ сүбэлээтилэр. Маны таһынан өрөспүүбүлүкэ медицинскэй уонна аптечнай тэрилтэлэригэр, муниципальнай тэриллиилэригэр манна сыһыаннаах боппуруостарга сүбэлэр бэрилиннилэр.