«Кировскай нэһилиэгэ» муниципальнай тэриллии састаабыгар икки нэһилиэнньэлээх пуун – Сиэгэн Күөл уонна Батамай киирэллэр. Соторутааҕыта Саха Республикатын Государственнай Мунньаҕын (Ил Түмэн) быһаарыытынан бу муниципальнай тэриллии «Кировскай национальнай эбээн нэһилиэгэ» статустанна.
Сиэгэн Күөлгэ уонна Батамайга холбоон 600-чэкэ киһи олорор. Нэһилиэк баһылыга Евдокия Заблоцкая бэлиэтииринэн, олохтоох дьаһалта салалтатын сүрүн соруга – социальнай объектары саҥардыы. Ол курдук, былырыын күһүн саҥа үөрэх дьылыгар икки сыл устата тутуллан, инвестиционнай программа чэрчитинэн үбүлэнэн 120 миэстэлээх таас орто оскуола үлэҕэ киирбитэ. Быйыл муус устарга 8 модуллаах компьютерынан салаллар электростанция тутуллан киирдэ. «Аны «Үтүө дьыала» хамсааһын чэрчитинэн Сиэгэн Күөлгэ 35 миэстэлээх оҕо саадын тутуутун кэпсэтиһэ сылдьабыт. Бүгүҥҥү күҥҥэ кырачааннарбыт сылдьар тэрилтэлэрэ суох буолан, икки дьиэнэн оҕо саадын тутан олоробут. Онон Ил Түмэн депутаттарын көмөлөрүнэн оҕо саадын тутуутун боппуруоһа этэҥҥэ быһаарыллан эрэр», -- диэн санаатын үллэстэр баһылык.
Батамайга эксперимент быһыытынан күн уотуттан үлэлиир электростанция үлэҕэ киирдэ. Аныгы оҥоһуулаах модульнай фельдшерскэй-акушерскай пуун аһыллынна. Батамайдар биир кыһалҕалаах боппуруостара – саҥа оскуола тутуута. Нууччалыы тыллаах нэһилиэнньэ буолан, анал программанан үлэлиир оскуола уонна оҕо саада тутуллара ирдэнэр. Туһааннаах боппуруоһу быһаараары баһылык үөрэх министрин кытта көрсөн, бу күннэргэ министр Афанасий Владимиров дьыаланы миэстэтигэр үөрэтэ Батамайга айанныыра былааннанар.
Дьаһалта салалтата муниципальнай тэриллии сайдыытыгар бу маннык суолталаах боппуруостары оннуттан хамнатыыга Ил Түмэн депутаттара Андрей Кривошапкиҥҥа, Александр Уаровка, Александр Жирковка, Афанасий Софронеевка, Семен Олесовка уонна «Кэбээйи улууһа» МТ баһылыга Семен Тереховка сүҥкэн өйөбүллэрин иһин дириҥ махталын тиэрдэр.
Елена Потоцкая
Спасибо!