Кремлгэ прием кэмигэр Александр Жирков Госдума үөрэххэ уонна наукаҕа Кэмитиэтин бэрэссэдээтэлэ Вячеслав Никоновы кытта көрүстэ уонна  «Россия Федерациятын үөрэх туһунан» федеральнай сокуоҥҥа уларытыыны киллэрэр туһунан» (Россия Федерациятын норуоттарын тылларыттан уонна Россия Федерациятын састаабыгар киирэр өрөспүүбүлүкэлэр судаарыстыбаннай тылларыттан төрөөбүт тылы үөрэтэр өттүнэн) федеральнай сокуон барылыгар  Саха сирин парламенын этиилэрин туһунан кэпсээтэ.

 

Ил Түмэн ХХХVII пленарнай мунньаҕар бэс ыйын 8 күнүгэр ылыныллыбыт уурааҕы толорууга спикер Александр Жирков дьаһалынан сокуон барылыгар үлэлэһэргэ Ил Түмэнтэн парламент сис кэмитиэтин бэрэссэдээтэлэ Антонина Григорьева уонна норуот дьокутаата Егор Жирков анаммыттара.

 

Бэс ыйын 14 күнүгэр сокуон барылыгар үлэлэһэргэ анаммыт Егор Жирков Москваҕа Вячеслав Никоновы кытта көрүстэ уонна Саха сирин парламенын этиилэрин тириэртэ.  Егор Жирков Вячеслав Никоновы кытта көрсүһүүтүгэр Саха сириттэн Госдума депутата Федот Тумусов кытынна.

 

«Россия Федерациятын үөрэх туһунан» федеральнай сокуоҥҥа уларытыыны киллэрэр туһунан» (Россия Федерациятын норуоттарын тылларыттан уонна Россия Федерациятын састаабыгар киирэр өрөспүүбүлүкэлэр судаарыстыбаннай тылларыттан төрөөбүт тылы үөрэтэр өттүнэн) федеральнай сокуон барылын оҥорууга Госдума фракцияларын бары бэрэстэбиитэллэрэ киирбиттэрэ. Ол иһин Александр Жирков Ил Түмэн  фракциялара Госдумаҕа бэйэлэрин партияларын кытта үлэлэһэллэригэр, Саха сирин этиилэрин туруулаһалларыгар ыҥырбыта.

 

Александр Жирков бэс ыйын 13 күнүгэр Госдума Бэрэссэдээтэлин бастакы солбуйааччы, КПРФ фракциятын салайааччыта Иван Мельниковы кытта көрсөн кэпсэппитэ. Оттон Егор Жирков сокуон барылын оҥорууга КПРФ аатыттан үлэлэһэр Олег Смолины кытта көрүстэ.

 

Бүгүҥҥү туругунан оҥоһулла сылдьар сокуон барылыгар эбии уларыйыылар киириэхтээхтэр. Ол барылга национальнай өрөспүүбүлүкэлэргэ судаарыстыбаннай тыллары үөрэтии булгуччулаах бырагыраама быһыытынан хаалыахтаах диэн Саха сирин парламенын уонна атын субъектар парламеннарын туруорсуулара киллэрилиннэ.

 

Сокуону ылыныы графига уларыйда, көрүллэр болдьоҕо кылгаан биэрдэ. Ол курдук Госдума пленарнай мунньаҕар бастакы ааҕыыны бэс ыйын 19 күнүгэр ааһыахтаах. Ол иһин бэс ыйын 15 күнүгэр Госдума үөрэххэ уонна наукаҕа Кэмитиэтин уочараттаах мунньаҕаыытылынна. Сокуон барылын көрүллүүтүгэр Ил Түмэнтэн Егор Жирков кыттыыны ылла. Сокуоҥҥа уларытыыны киллэриигэ үлэ  тэтимнээхтик барар.