Бу күн ыҥырыылаах ыалдьыттарынан Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Бырабыыталыстыба Бэрэссэдээтэлин бастакы солбуйааччы, тыа хаһаайыстыбатын, аска-үөлгэ политикатын миниистирэ Петр Алексеев, «Бүлүү суола» управление начаалынньыга Николай Андреев, Ил Түмэн депутаттара Гаврил Алексеев, Иван Шамаев, нэһилиэк баһылыктара, чулуу үлэһиттэр буоллулар.

 

Улуус баһылыга Никита Андреев 2017 сылга улуус сайдыытын туһунан иһитиннэрдэ, сыл устата ыытыллыбыт үлэни-хамнаһы «Бэрдьигэс» телестудия бэлэмнээбит киинэтигэр олус сэҥээрэ көрдүбүт. Биир тылынан эттэххэ, ааспыт сыл түмүктэрэ хас биирдии улуус олохтооҕун кэскилин, сайдыытын-үүнүүтүн быһаарар дьаһаллар быһыытынан тэриллэн, олус элбэх үлэ ыытыллыбытын бары билэбит-көрөбүт, махтанабыт.

 

Махтал тыллар Горнай улууһун сайдыытыгар күүс-көмө буолар өрөспүүбүлүкэбит салайааччыларыгар ананна. Ил Дархаммыт Егор Борисов Горнай улууһугар өр кэмҥэ үөскээбит кыһалҕаны быһаарыыга быйылгы сыллаахха үстэ кэлэн, нэһилиэнньэни кытта көрсүһэн, элбэх эппиэттээх үлэһиттэри, миниистирдэри бөлөҕөр кытыннаран, күүстээх соруктары туруоран барбыта элбэҕи этэр, кэскиллээхпитин кэпсиир.

 

Улуус баһылыга Никита Андреев Саха Өрөспүүбүлүкэтин Судаарыстыбаннай Мунньаҕын (Ил Түмэнин) Бэрэссэдээтэлэ Александр Жирковка улуус социальнай-экономическай сайдыытыгар, дьон-сэргэ олоҕо-дьаһаҕа тупсуутугар кылаатын иһин «Горнай улууһа» МО баһылыгын Махтал суругун дохсун ытыс таһыныытын ортотугар туттарда.

 

Александр Николаевич махтанан туран, Саҥа үүнэр сылга улуус дьонугар-сэргэтигэр ситиһиилэри баҕарда. Үөрүүлээх мунньах ыытыллар күнэ уратытын ахтан ааста. Ол курдук, 95 сыл анараа өттүгэр оруобуна бу күн, Саха сирин Сэбиэттэрин бастакы съезтэрэ саҕаланан баран, тохсунньу 19 күнүгэр диэри ыытыллан, улахан тыын суолталаах боппуруостар: автономия хайдах тэриллэрэ, туохтан саҕаланара, тугу дьаһайара, ким салайара быһаарыллыбыттарын бэлиэтээтэ.

 

Салгыы кини Саха сирэ Россияҕа холбоспута 385 сыла, ону сэргэ Октябрьскай Революция 100 сыла эмиэ саха норуотугар, эбээннэргэ, эбэҥкилэргэ, юкагирдарга, долганнарга, манна олорор бары омуктарга улахан суолталаахтарын иһитиннэрдэ.

 

Ил Түмэҥҥэ өрөспүүбүлүкэ бюджета бигэргэниитигэр, бу уустук кэмҥэ тыа хаһаайыстыбатын сайдыытыгар ааспыт сыллааҕар элбэх үп көрүллүбүтүн сырдатан туран, ити барыта тыа сиригэр олорор дьон олохторо-дьаһахтара туруктаах буоларын туһугар ананарын бэлиэтээбитин, мунньах кыттыылаахтара сэҥээрэ иһиттилэр.

 

Кини Горнай улууһугар 2010 сыллаахха Олоҥхо ыһыаҕа олус үрдүк тэрээһиннээхтик ыытыллыбытын, улуус олохтоохторо ураты түмсүүлээхтэрин көрдөрбүттэрин, кэлэр өттүгэр ханнык баҕарар өрөспүүбүлүкэ таһымнаах күрэхтэһиилэри ыытар кыахтаахтарын туһунан этэн аһарбытын санатта. Бу кэнниттэн улуус сайдыы суолугар үктэннэ. Ол да иһин 2021 сылга Манчаары оонньууларын Горнайга ыытарга этии киирбитин өйөөбүтүн билиһиннэрдэ. Бары сомоҕолоһон, өссө күүскэ түмсэн, бу оонньуулары үрдүк таһымҥа ыытарбытыгар эрэлин биллэрдэ.

 

Ити кэнниттэн кини Ил Түмэн Махтал суруктарын Сэмэн Данилов аатынан оскуола учууталыгар Н.И.Санниковка, урбаанньыт П.Н.Павловка, кыраайы үөрэтээччи А.Н.Саввиҥҥа, «Саха сирэ Россияны кытта 385 сыла» бэлиэни Саха сирин тырааныспарын үтүөлээх үлэһитигэр В.М.Дьячковскайга, «Гостехнадзор» инженер-инспекторыгар Д.М.Борисовка туттартаата.

 

Баһылык Никита Андреев улуус Бочуоттаах олохтооҕо аатынан «Северный дом» ХЭТ дириэктэрин солбуйааччы Я.А.Ефимовы, Дария Жиркова аатынан бириэмийэнэн «Бүлүү суола» упраление начаалынньыга Н.И.Андреевы, Бочуотунай грамотанан айылҕа харыстабылын инспекциятын инспектора А.Х.Борисовы, оҕо спортивнай оскуолатын тренерэ Е.И.Никаноровы, «Бэрдьигэс» телестудия оператора Е.И.Тимофеевы, Бэрдьигэстээх орто оскуолатын математикаҕа учуутала Нь.М.Павловы наҕараадалаата.

 

Бырабыыталыстыба Бэрэссэдээтэлин бастакы солбуйааччы, миниистир Петр Алексеев икки үөрүүлээх сонуну иһитиннэрдэ: Бэрдьигэстээххэ 870 миэстэлээх оскуола тутуута былааҥҥа киирбитин уонна Россия культуратын министиэристибэтэ 2018-2019 сс. Дьиикимдэҕэ кулууп тутуутун үбүлүүр буолбутун.

 

Салгыы наҕараадалары туттартаата. Ил Дархан Махтал суругунан тыыл бэтэрээнэ И.С.Кириллин, «Олохтоох салайыныы атаҕар туруутугар кылаатын иһин» бэлиэнэн Кировскай оскуолатын учуутала В.П.Аргунова, «Тыа хаһаайыстыбатын бэтэрээнэ» бэлиэнэн булчут П.Н.Жирков, «Тыа хаһаайыстыбатын министиэристибэтин 95 сыла» бэлиэнэн урукку улуус баһылыга П.И.Васильев, «Экология уонна айылҕа ураты харыстанар сирдэрин сыллара» мэтээлинэн «Сиинэ» айылҕа пааркатын дириэктэрэ И.И.Андреев, «Үлэ күүһэ» хаһыат кылаабынай редактора В.И.Алексеев, үлэ бэтэрээнэ В.Р.Пахомов, «Айылҕа харыстабылын бэтэрээнэ» мэтээлинэн бу салаа үтүөлээх үлэһитэ В.А.Антонов, «Харыстанар сирдэри сайыннарыыга кылаатын иһин» бэлиэнэн айылҕа харыстабылын туйгуна А.Г.Кесарев, «Дьиэ кэргэн политикатын сайыннарыыга кылаатын иһин» бэлиэнэн элбэх оҕолоох ийэ Е.С.Текеянова, «Гражданскай көҕүлээһини сайыннарыы иһин» бэлиэнэн эбии үөрэхтээһин киинин дириэктэрэ А.М.Колесова, «Социальнай сулууспа туйгуна» бэлиэнэн реабилитационнай киин специалиһа Л.Г.Леверьева, СӨ үлэҕэ, социальнай сайдыыга министиэристибэтин Бочуотунай грамотатынан реабилитационнай киин иитээччитэ Е.С.Капитонова, Махтал суругунан бу киин кылаабынай бухгалтера Е.Н.Тимофеева наҕараадаланнылар.

 

Салгыы улуус идэлэринэн бастыҥнара, чулуу спортсменнар, ыччат сылын, араас куонкурустар, граннар кыайыылаахтара бэлиэтэннилэр.

 

Баһылык Никита Андреев кэлэр сылга буолар быыбарга бэйэтин кандидатуратын туруорунарын уонна Горнай улууһугар 2018 сылы Үлэ сылынан биллэрэрин иһитиннэрдэ. Онон горнайдар күүстээх үлэҕэ турунабыт.