Ити бэлиэ түгэҥҥэ кыргыз суруйааччыларын айымньыларын сахалыы тылбааһын кинигэтэ күн сирин көрүөҕэ. Онон сотору кэминэн кыргыз уһулуччулаах уус-уран айымньыларын сахалыы тылбаастарын кинигэтэ бэчээттэнэн ааҕааччы киэҥ араҥатыгар тиийиэҕэ. Кинигэни Саха Өрөспүүбүлүкэтин Ил Түмэнин Бэрэссэдээтэлэ А.Н.Жирков, Кыргызстан Өрөспүүбүлүкэтин норуодунай суруйааччыта, «Аан дойду норуоттарын эпостара» норуоттар икки ардыларынааҕы ассоциация бэрэсидьиэнэ Б.Ж. Жакиев хомуйан оҥордулар. Эрэдээксийэлиир кэллиэгийэ: А.Н.Жирков (бэрэссэдээтэл), Г.Г. Андросов, А.А. Борисова, В.Н. Луковцев, О.Г. Сидоров. Бу хомуурунньук кыргыз бастыҥ 38 суруйааччытын айымньыларын 35 киһи тылбаастаабытыттан таҥылынна. Кинигэ икки түһүмэхтээх: поэзия уонна проза.

 

Кинигэни бэлэмниир кэмҥэ тылбааска үлэлэспит дьонтон биирдэстэрэ, эдэр суруйааччы Александра Попова – Долгура маннык кэпсээтэ:

 

— Мин кыргыз суруйааччыта, драматург Бурул Калчабаева «Чуораанчык» диэн пьесатын тылбаастыырга холоннум. Үлэлииргэ олус уустук буолбатах этэ, тоҕо диэтэр, бу пьеса оҕолорго анаммыт буолан тыла-өһө судургу соҕус уонна айылҕаны тыыннааҕымсытан көрдөрөр, өбүгэҕэ сүгүрүйэр туһунан былыргы саха номохторугар олус майгынныыр ис хоһоонноох номох эбит. Сатаан тылбаастаабатах түгэннэрбэр тылбаасчыт Аита Шапошникова уонна ааптар көмөлөспүттэрэ. Нууччалыыттан тылбаастаабыппыт, ол гынан баран кыргызтыы суруллубутун Бурул Макыповнаттан көрдөһөн ылбытым.

 

 

— Кыргыз уонна саха литературалара түҥ былыргы өбүгэ айымньытыгар – фольклорга уонна нуучча классическай литературатыгар олоҕурбут буоланнар, майгыннаһар өрүттэрэ үгүс. Ол гынан баран айымньы түгэннэрэ: биирэ – Өлүөнэ Эбэ хотун үрдүгэр, саха алааһыгар, киэҥ нэлэмэн туундараҕа, баай хара тыаҕа ойууланар эбит буоллаҕына, иккиһэ – киэҥ нэлэмэн истиэпкэ, Ала-Тоо хайа тэллэҕэр, Иссык Күөл хочотугар ойууланар.

 

— Аан дойдуга биллэр Чингиз Айтматов бэчээттэммит айымньыларын барытын кэриэтэ анаан-минээн батыһа сылдьан аахпытым. Олус сөбүлүүр, ытыктыыр суруйааччым. Айтматовы төрөппүт норуот мындырыгар, сиэрдээҕэр эрэнэбин.

 

Санатар эбит буоллахха, Саха сиригэр Кыргызстан Култууратын күннэрин чэрчитинэн кыргыз киинэтин декадата ыытыллыаҕа, Кыргызстан худуоһунньуктарын быыстапката тэриллиэҕэ, кыргыз суруйааччыларын, драматурдарын айымньыларынан испэктээкиллэр туруоруллаллар, онтон да атын дьаһаллар ылыллаллар.

 

Мария ПАВЛОВА.