Мэлдьэхси интерната олус тымныы буолан, оҕо сылдьарыгар табыгаһа суоҕун эттилэр. Онуоха чинчийэр үлэни ыытан, туохтан сылтаан үчүгэйдик сылыйбатын быһаарар наадалааҕын ыйдылар. Дуобаты сайыннарар сыаллаах-соруктаах оскуолаҕа ыҥырыынан кэлэн үлэлии сылдьар тириэнньэр Василий Куприянов оскуола базатыгар дуобакка бүтүн өрөспүүбүлүкэтээҕи лааҕыры тэрийиэн баҕарарын туһунан кэпсээтэ. Эрчийэр оҕолоро үрдүк көрдөрүүлэри ситиспиттэрин туһунан үллэһиннэ. Манна Өрөспүүбүлүкэ дуобатын федерациятын бэрэссэдээтэлинэн талыллыбыт Александр Романовка дуобат тээбириннэринэн хааччыйбытын иһин махталын тиэртэ.

 

Юрий Баишев быйыл оҕо спортивнай лааҕырдарыгар эбии үп көрүллүбүтүн туһунан иһитиннэрдэ. Олохтоохтор дьиэлэрин гаас ситимигэр холбуулларыгар туох көмө баарын туоһуластылар, итиэннэ үгүс киһи «Манчаары» ТХПК үлэтигэр сыһыаннаах боппуруостары ыйыталастылар. Биир сүрүн кыһалҕанан уот ситимэ мөлтөҕө буоларын эттилэр. «Нерюнгриттан тардыллыбыт үрдүк кыамталаах уот ситимэ билигин Майаҕа тиийэн, онно олохтонон, үлэтэ ситэрилиннэҕинэ, үгүс нэһилиэктэргэ ити боппуруос быһаарыллыаҕа», - диэн хоруйдаатылар. Суорумньуһут Мария Андросова: «Өрөспүүбүлүкэ үрдүнэн нэһилиэктэр баһылыктарыгар суорумньунан ыал буолууга ким төһө үлэлээбитин, суорумньуһуттары төһө өйөөбүтүн көрдөрөр күрэхтэһиитэ тэрийиэҕиҥ», - диэн этиитин Ил Түмэн дьиэ кэргэн, оҕо, ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Юрий Баишев сэргии иһиттэ.

 

Норуот депутаттарын көмөлөрүнэн хорообуттар ааспыт сыл бүтэһигэр икки мэндиэмэннээх саҥа таас оскуолаламмыттара. Инньэ гынан, дьон-сэргэ махталын ытыс тыаһынан тиэртэ. Бу нэһилиэккэ оройуон Сэбиэтин депутаттара оҕолору эрчийэргэ, спортивнай секцияны арыйан үлэлэтэргэ штат көрүллүбүтүн туһунан иһитиннэрдилэр. Онуоха Юрий Баишев тыа сиригэр үлэлиир тириэнньэр хамнаһыгар эбии 15%, оттон өрөспүүбүлүкэ, дойду таһымыгар үрдүк көрдөрүүлээх спортсмены иитэн таһаардаҕына, өссө үп көрүллэр буолбутун кэпсээтэ. Нэһилиэккэ ааспыт сыллартан чааһынай дьиэлэри киин ититэр ситимҥэ холбооһун үлэтэ таһаарыылаахтык барбыт. Новосибирскайтан термороботтары аҕаларга дилер быһыытынан үлэлиир улуус депутата Ян Новиков быйыл Хорообукка 20 ыал холбонуохтааҕын иһитиннэрдэ. «Азия оҕолоро» VI Аан дойдутааҕы спортивнай оонньууларга тас дойдулартан төһө хамаанда кэлэрин, пассажирдары таһар поезд хаһан үлэлиэхтээҕин, үөрэхтээһиҥҥэ сыһыаннаах кыһалҕалары, тыа хаһаайыстыбатыгар субсидия, эти, үүтү батарыы, газохимия собуотун туһунан олохтоохтор ыйыталастылар. Биир тыын боппуруоһунан - балыыһаны сабыы төрүөтүн тула дьүүллэһии буолла. Онуоха Александр Романов хаарбах туруктаах дьиэҕэ оройуоннааҕы киин балыыһа төрдүттэн өрөмүөн үлэтин ыытарыгар үбү-харчыны көрдөҕүнэ, балыыһа аһыллар кыахтааҕын эттэ.

 

Нэһилиэк олохтоохторо улуус дьонун аатыттан турбут норуот депутаттарын тылларын-өстөрүн истэннэр олус астыммыттарын, инникитин даҕаны норуоту кытта аһаҕастык кэпсэтэн, таһаарыылаахтык үлэлииллэригэр баҕа санааларын эттилэр.