Ахсынньы 25 күнүгэр Д.К.Сивцев-Суорун Омоллоон аатынан Судаарыстыбаннай опера уонна балет театрыгар Сэбиэттэр бастакы Бүттүүн Саха сиринээҕи съезтэрин 95 сылын бэлиэтиир өрөспүүбүлүкэ уопсастыбаннаһын үөрүүлээх мунньаҕа буолан ааста. 

 

Бу историческай дириҥ суолталаах бэлиэ тэрээһиҥҥэ өрөспүүбүлүкэ судаарыстыбаннаһын уонна парламентаризм сайдыытыгар өҥөлөөх  дьону чиэстээтилэр. Саха Өрөспүүбүлүкэтин Ил Түмэнин Бочуотунай грамотатын уонна кыһыл көмүс чаһыны спикер Александр Жирков Саха АССР X, XI ыҥырыылаах Үрдүкү Сэбиэтин дьокутаата, Саха ССР ХII ыҥырыылаах Үрдүкү Сэбиэтин дьокутаата,  I, II ыҥырыылаах Ил Түмэн дьокутаата Артур Алексеевка туттарда.

 

Артур Николаевич Алексеев норуокка төлөөннөөх коммунист, чаҕылхай араатар, былаас итэҕэстэрин аһаҕастык кириитикэлиир политик быһыытынан биллэр. Ил Түмэн спикерэ парламент үрдүкү наҕараадатынан Артур Алексеевы Саха Өрөспүүбүлүкэтин социальнай-экономическай сайдыытыгар киллэрбит кылаатын иһин, САССР Үрдүкү Сэбиэтигэр, Ил Түмэҥҥэ дьокутаат быһыытынан таһаарыылаахтык үлэлээбитин иһин бэлиэтээтэ.  

 

Ил Түмэн пресс-сулууспата