Саха Өрөспүүбүлүкэтин Ил Түмэнин Бэрэссэдээтэлэ Александр Жирков бу күннэргэ учууталлары уонна оҕолорун кытары көрүстэ. 

 

Таһырдьа Олоҥхо дьиэтин иннигэр саха норуотугар “Куруубай хааннаах Кулун Куллустуур” олоҥхону суруйан хаалларбыт, Чурапчылар киэн туттар олоҥхоһуттарыгар Иннокентий Тимофеев-Теплоуховка аналлаах пааматынньык кэлбит дьону олоҥхо эйгэтигэр киллэрэр. 

 

Бу икки этээстээх, аныгылыы моһуоннаан тутуллубут дьиэҕэ, ураһа тула төгүрүччү кылаастар оҥоһуллубуттар. Саалаҕа үөрэнээччилэр илиилэрин сылааһын иҥэрэн тикпит, уруһуйдаабыт үлэлэринэн быыстапка тэлгэтиллибит. “Үөрүү” кииҥҥэ “Чаҕыл”, “Дархан” үҥкүү куруһуоктара  (сал. Е. Сивцева), “Иэйии” мода студията (сал. А. Дьячковская), уруһуй куруһуога (сал. О. Филиппова), телестудия (сал С. Саввин), театральнай студия (сал. А. Собакина), “Бизнес и я” (сал. А. Захарова), “Айгыл” фольклорнай бөлөх (сал. М. Слепцова), парикмахердар куруһуоктара (сал А. Эверстова) үлэлииллэр. “Оҕолорбут улууска, республикаҕа, Россияҕа, норуоттар икки ардыларынааҕы ыытыллыбыт күрэхтэргэ үрдүк ситиһиилээхтэр”, - диэн дириэктэр Иван Уаров үлэлэрин сырдатта. 

 

Мария Чичигинарова салайааччылаах баай экспонаттаах улуус педагогическай музейа бу дьиэҕэ баар эбит. Манна былыргы алпабыытынан суруллубут сахалыы кинигэлэри, Боотурускай улууһун бастакы үөрэхтээхтэрин хаартыскаларын, үөрэҕириигэ сыһыаннаах экспонаттары көрүөххэ сөп.    

 

Спикер оҕолортон хаһыс сылларын дьарыктаналларын,  бу дьарык кинилэргэ хайдах дьайарын, төһө сөбүлүүллэрин туоһуласта. Онуоха оҕолор, хаһыс да сылларын куруһуоктарга сылдьалларын, ситиһиилэрин кэпсээтилэр. Александр Жирков уһуйааччыларга туһаайан: “Оҕолоргутун сахалыы тыыҥҥа иитиҥ,  саха  тылыгар уһуйуҥ. Сахалыы куттаах-сүрдээх үлэлэри элбэтиҥ”, - диэн санаатын эттэ.