Георгиевскай саалаҕа Владимир Путин үгэс быһыытынан наукаҕа уонна технологияҕа, литератураҕа уонна искусствоҕа, гуманитарнай эйгэҕэ ситиһиилэр иһин Россия Федерациятын Судаарыстыбаннай бириэмийэлэрин туттарда. 2017 сыл түмүгүнэн лауреаттар ортолоругар биллиилээх дирижер Юрий Темирканов, А.С.Пушкин аатынан ойуулуур-дьүһүннүүр искусствоҕа Судаарыстыбаннай музей президенэ Ирина Антонова, РНА Н.И.Вавилов аатынан уопсай генетика институтун эволюционнай генетикаҕа сэбиэдиссэйэ Евгений Рогачев, эндокринологияҕа Национальнай медицинскэй чинчийэр киин дириэктэрэ, Россия сүрүн эндокринолога Иван Дедов, Санкт-Петербурдааҕы балет академическай театрын уус-уран салайааччыта Борис Эйфман, Аан дойдутааҕы акыйаан музейын генеральнай дириэктэрэ Светлана Сивкова, «Кристаллография уонна фотоника” ФНЧК фотохимияҕа киинин учуонайдара Михаил Алфимов, Сергей Громов, Александр Чибисов бааллар.

 

Бу ааттаммыт дьонтон 96 саастаах Ирина Антонова А.С.Пушкин аатынан ойуулуур-дьүһүннүүр искусство судаарыстыбаннай музейын 52 сылын салайан, Россияҕа музей дьыалатын сайдыытыгар уһулуччулаах кылааты киллэрбитэ. Кини аан дойдутааҕы музейдар сүбэлэрин салалтатыгар (ИКОМ) үлэлиир кэмигэр аан дойдуга Музей күнэ бэлиэтэнэрин 1977 сыллаахха ситиспитэ. Ирина Александровна  ааспыт үйэ 80-с сылларыгар Саха сиринээҕи М.Ф.Габышев аатынан ойуулуур-дьүһүннүүр искусство музейыгар куратор быһыытынан көмөлөспүтэ. 1984 сыллаахха А.С.Пушкин аатынан музейга регионнар быыстапкаларын тэрийбитигэр, Саха сирин музейыттан 4 үлэни туруортарбыта.

 

Биллиилээх балетмейстер Борис Эйфман хореографияҕа аныгылыы, ураты хайысханы төрүттээбитэ, Эйфман аатынан Санкт-Петербурдааҕы академическай балет театрын төрүттээбитэ. Борис Эйфман балетын саха көрөөччүлэрэ аан бастаан 2008 сыллаахха Дьокуускайга «Стерх» классическай балет фестивалыгар билсибиттэрэ. Бу театр солистара фестивальга кэлин хаста да кэлэн ыалдьыттаабыттара. Борис Эйфман 70 сааһын туолуутугар 2016 сыл от ыйыгар Ньурбаҕа хостоммут 214,65 караттаах бөдөҥ алмааска кини аата иҥэриллибитэ.

 

Судаарыстыбаннай бириэмийэни туттарыы кэнниттэн Владимир Путин Кремлгэ Ивановскай болуоссакка Россия күнүн бырааһынньыгар прием оҥордо. Үөрүүлээх тэрээһиҥҥэ Россия Бырабыыталыстыбатын чилиэннэрэ, Судаарыстыбаннай Дума депутаттара, Федерация Сэбиэтин сенатордара, суут уонна ситэриилээх былаас федеральнай уорганнарын салайааччылара, субъектар парламенрраны спикердэрэ, конфессиялар, уопсастыбаннай холбоһуктар, дипломатическай посольстволар бэрэстэбиитэллэрэ, наука уонна искусство деятеллэрэ сырыттылар.

 

Прием кэмигэр Ил Түмэн спикерэ Александр Жирков Судаарыстыбаннай Дума үөрэххэ уонна наукаҕа Кэмитиэтин бэрэссэдээтэлэ Вячеслав Никоновы кытта көрсөн, «Россия Федерациятын үөрэх туһунан» федеральнай сокуоҥҥа уларытыыны киллэрэр туһунан» (Россия Федерациятын норуоттарын тылларыттан уонна Россия Федерациятын састаабыгар киирэр өрөспүүбүлүкэлэр судаарыстыбаннай тылларыттан төрөөбүт тылы үөрэтэр өттүнэн) федеральнай сокуон барылыгар Саха сирин парламенын тутуһар санаатын тириэртэ.

Маны сэргэ Александр Жирков Федерация Сэбиэтин бочуоттаах Бэрэссэдээтэлэ Егор Семенович Строевы, Россия Федерациятын Президенин сүбэһитэ Сергей Юрьевич Глазьевы, Судаарыстыбаннай Дума Бэрэссэдээтэлин бастакы солбуйааччы Иван Иванович Мельниковы, Крым парламенын спикерэ Владимир Андреевич Константиновы кытта көрүстэ.

 

Кремлгэ прием кэнниттэн Ил Түмэн Бэрэссэдээтэлэ Александр Жирков Саха Өрөспүүбүлүкэтин бастакы Президенэ, Саха Өрөспүүбүлүкэтин Судаарыстыбаннай сүбэһитэ Михаил Ефимович Николаевы кытта көрүстэ.

 

 

 

Хаартыскаларга: 1-2. Кремлгэ В.В.Путин РФ Судаарыстыбаннай бириэмийэтин туттарыыта;

 

3. А.Н.Жирков Е.С.Строевы кытары;

 

4. (хаҥастан уҥа) Саха Өрөспүүбүлүкэтин Ил Түмэнин Бэрэссэдээтэлэ А.Н. Жирков, Алтай кыраайын парламенын Бэрэссэдээтэлэ А.А. Романенко, Крым Госсоветын Бэрэссэдээтэлэ В.А.Константинов, Ленинград уобалаһын парламенын Бэрэссэдээтэлэ С.М.Бебенин, Санкт-Петербург судаарыстыбаннай университетын ректора Н.М.Кропачев;

 

5. А.Н.Жирков М.Е.Николаевы кытары.