Кинини кытта Саха Өрөспүүбүлүкэтин үөрэҕин уонна наукатын миниистирэ Владимир Егоров, Уус Алдан улууһун баһылыга Алексей Федотов, улуус үөрэҕин управлениетын салайааччыта Ирина Тарская сылдьыстылар.

 

Дьоро тэрээһин “Күлүмнүүр күлүмнээ!” диэн орто сүһүөх кылааһын үөрэнээччилэрин толорууларыгар литературнай ааҕыынан саҕаланна.

 

Биллиилээх государственнай уонна общественнай диэйэтэл, Саха сирин үөрэхтээһинин наркома Иван Николаевич Жирков аатынан Дүпсүн орто оскуолатын бүтэрээччилэри олох киэҥ аартыгар атаарар тэрээһиҥҥэ мустубут Дүпсүн дьонун-сэргэтин уонна ыалдьыттарын Ил Түмэн Бэрэссэдээтэлэ Александр Жирков эҕэрдэлээтэ.

 

“Ытыктабыллаах Дүпсүн дьоно-сэргэтэ, оскуоланы бүтэрээччилэр. 1997 сыллаахха оччотооҕу Саха сирин үөрэҕин миниистирэ Иннокентий Голиков туттаран киллэрбит Иван Николаевич Жирков аатынан Дүпсүн орто оскуолата бэйэтин үөрэнээччилэрин 63 төгүлүн олох киэҥ аартыгар атаарар”, – диэтэ спикер уонна оскуоланы бүтэрэр оҕолор инники олохторо кэскиллээх, дьоллоох-соргулаах буоллун диэн баҕа санаатын үллэһиннэ.

 

Итиэннэ кини бүгүн В.В.Никифоров-Күлүмнүүр аатынан Дүпсүннээҕи оҕо технопааркатын туһунан мунньах буоларын иһитиннэрдэ: “Оҕолор билиилэрэ-көрүүлэрэ үрдүү турарын туһугар Саха Өрөспүүбүлүкэтигэр тарбахха баттанар аныгылыы хайысхалаах үөрэх кыһатын инники кэскилин туһунан мунньахтыахпыт. Бу күн үөрэҕи кытта ситимнээх, оҕолорбут, ыччаттарбыт туһугар анаммыт”, – диэн эттэ.

 

Александр Жирков үөрэнээччилэр “Күлүмнүүр күлүмнээ!” диэн ааҕыыларыгар “Күлүмнүүр аатын өйдүү сылдьыахпыт! Дүпсүнтэн төрүттээхпитинэн киэн туттуохпут! Дойдубут, норуоппут туһугар олохпутун аныахпыт!” – диэн эппиттэрин чорбото бэлиэтээн туран, оскуоланы бүтэрэр үөрэнээччилэргэ уонна кинилэр учууталларыгар Саина Егороваҕа Василий Васильевич Никифоров – Күлүмнүүр туһунан Саха сирин интеллигенциятын бастакы көлүөнэ чулуу дьонугар анаммыт серия бастакы кинигэтин бэлэх уунна. “Бу кинигэ эһиэхэ өйдөбүнньүк уонна түһүүлээх-тахсыылаах кэмҥитигэр мэлдьитин көмө буоллун”, – диэн алҕаан туран, кини эҕэрдэтин түмүктээтэ.

 

Ити кэннэ спикер Ил Түмэн Бэрэссэдээтэлин Махтал суругунан педагогическай үлэ бэтэрээнэ, Саха Өрөспүүбүлүкэтин үөрэҕин туйгуна Галина Новоприезжаяны уонна Ил Түмэн Бочуоттаах грамотатынан Дүпсүн балыыһатын сиэстэрэтин, Саха Өрөспүүбүлүкэтин доруобуйатын харыстабылын туйгуна Александра Готовцеваны наҕараадалаата.

 

Бука бары үөрэнээччилэри, төрөппүттэри уонна ыалдьыттары бүтэһик чуораан үөрүүлээх күнүнэн Саха Өрөспүүбүлүкэтин үөрэҕин уонна наукатын миниистирэ Владимир Егоров, Уус Алдан улууһун баһылыга Алексей Федотов, улуус үөрэҕин управлениетын салайааччыта Ирина Тарская, Дүпсүн нэһилиэгин баһылыга Ивамар Соловьев эҕэрдэлээтилэр уонна оскуоланы бүтэрэр оҕолорго биир кэлим эксээмэннэрин ситиһиилээхтик туттаран, талбыт идэлэригэр үөрэнэн, үтүө үлэһит дьон буолуҥ диэн алгыс тылларын эттилэр. Төрөппүттэр ааттарыттан Христина Явловская учууталларга истиҥ махталын биллэрдэ.