Саха Өрөспүүбүлүкэтин Ил Түмэнин Бэрэссэдээтэлэ Александр Жирков парламент уонна түс бэйэтин аатыттан Михаил Спиридонович кэргэнэ Варвара Михайловнаҕа, оҕолоругар, сиэннэригэр, аймахтарыгар дириҥ кутурҕанын тириэртэ. 

Александр Николаевич Михаил Спиридонович Иванов ааспыт үйэ ситиһиитин-хотторуутун, үтүө-мөкү өрүттэрин, аһыытын-ньулуутун бэйэтин этинэн-хаанынан билбит кырдьаҕас көлүөнэ дьон биир чаҕылхай бэрэстэбиитэлэ буоларын эттэ.

 

Багдарыын Сүлбэ 70-с сыллар бүтүүлэриттэн саҕалаан, бу иннинэ ким даҕаны анаан түптээн дьарыктамматахх, ылсыбатах эйгэтин -- сирдэр, дьоннор ааттарын чинчийбитин бэлиэтээтэ.

 

“Багдарыын Сүлбэ чинчийэр үлэтин саҕалыырыгар, 70-с-80-с сылларга, Саха сиригэр сирдэр-уоттар ааттарын ис хоһоонун билэр дьон лаппа аҕыйаабыт кэмэ этэ. Онон итини үөрэтии аны бэрт сотору кэминэн кыаллыбат буолуон сөп этэ. Ол кэмҥэ Михаил Спиридонович үлэтин сүрдээх эрчимнээхтик, далааһыннаахтык, күүскэ уонна киэҥник саҕалаабыта. Кини атын улахан институттар сатаан кыайбатах, дьарыктамматах үлэлэрин соҕотоҕун уонна бэйэтин үөрэнээччилэрин, биир санаалаахтарын улуустартан, нэһилиэктэртэн  түмэн,  оҥорбута. Ол да иһин саха дьонун өйүгэр-санаатыгар, өрөспүүбүлүкэ наукатыгар, культуратыгар сирдэр ааттарын төһө кыаҕа, күүһэ кыайарынан толору хомуйан киллэрбит улахан өҥөлөөх. Бу киниэхэ бэйэтигэр улахан бэлиэ өйдөбүнньүк уонна кини бэйэтин норуотугар, өрөспүүбүлүкэтигэр тугунан да кыайан кэмнэммэт сүҥкэн улахан интеллектуальнай бэлэҕэ буолар.

 

Багдарыын Сүлбэ Саха сирин топонимикатын аҥардас сахалыы эрэ суолтатын буолбакка, биһиги сирбитигэр-уоппутугар элбэх омук араас үйэлэргэ кэлэн ааһан, олорон, бэйэтин аатын-суолун хаалларбытын сабыдыалын ырытан чинчийбитэ. Маныаха барытыгар сүрдээх харыстабыллаахтык сыһыаннаһан, ол дьапталҕаны барытын үөрэппит үтүөлээх. Онон Михаил Спиридонович үлэтэ инники өттүгэр өссө да салҕаныа, чинчийиллиэҕэ. Төһөнөн кини нэһилиэстибэтин дириҥэтэн үөрэтэн, киэҥ араҥаҕа таһааран, дьон-сэргэ бэйэтин  былыргытын, историятын, сирин-уотун аатын билиэн баҕата күүһүрэн истэҕин ахсын, оччонон Михаил Спиридоновичка махтала улаатан, күүһүрэн, кэҥээн иһиэҕэ. Кини оннук дьылҕалаах киһи», -- диэтэ Ил Түмэн спикерэ.

 

Александр Жирков 80-с сыллар саҕаланыыларыгар профессор Г.П.Башарин ыҥырыытынан Михаил Спиридонович Дьокуускайга кэлэн, история уонна тыл факультетыгар Георгий Петрович салайар кафедратыгар старшай преподавателинэн үлэҕэ киирбитин, ол кэмтэн кинини кытта билсиһэн, алтыһан, кэргэнэ Варвара Михайловна сылаас чэйин иһэн, бодоруһан сылдьыбыттарын, бу барыта өрүү  сырдык өйдөбүл буоларын аҕынна.

 

«Багдарыын Сүлбэ аатын үйэтитии,  кини үлэтин дьоҥҥо-сэргэҕэ тириэрдии үгүс өттүгэр биһигиттэн бэйэбититтэн тутулуктаах. Тоҕо диэтэххэ, кини ханнык да судаарыстыбаннай, научнай түмсүүлэргэ, тэрээһиннэргэ хаайтарбакка, бэйэтэ хайдах саныырынан, сөбүлүүрүнэн, бу маннык буоллаҕына ордук сатаныа, табыллыа диэбитинэн, көҥүллүк талан, үлэлээбит, олорбут киһи. Онон ити үлэҕэ хас биирдии киһи бэйэтэ эмиэ кыттыһан, Сахатын сирин былыргытын, историятын, сирин-уотун аатын-суолун, олорон ааспыт дьон-сэргэ аатын-суолун, ол туох төрүөттээҕин билэргэ бэйэтэ эмиэ дьулуһуулаах, интэриэстээх буолуохтаах. Оччоҕо Михаил Спиридонович сырдык аата биһиэхэ хас биирдиибитигэр баара өссө ордук олохтоох, тирэхтээх уонна инники өттүгэр кэскиллээх буолуоҕа», -- диэн бэлиэтээтэ спикер.

 

Ил Түмэн пресс-сулууспата