Семинарга Саха Өрөспүүбүлүкэтин Ил Түмэнин сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Владимир Прокопьев, Саха Өрөспүүбүлүкэтин Ил Дарханын уонна Бырабыыталастыбатын дьаһалтатын кадр политикатыгар уонна судаарыстыбаннай, муниципальнай сулууспаҕа Департаменын салайааччытын солбуйааччытын эбээһинэһин толорооччу Валентина Румянцева, Саха Өрөспүүбүлүкэтин баайга-дуолга, сир сыһыаннаһыыларыгар миниистири солбуйааччы Михаил Никифоров, Саха Өрөспүүбүлүкэтин үпкэ миниистирин солбуйааччы Иван Алексеев, Саха Өрөспүүбүлүкэтин муниципальнай тэриллиилэр Сэбиэттэрин толоороччу дириэктэрэ Дмитрий Горохов, Чурапчы улууһун депутаттарын Сэбиэтин бэрэссэдээтэлэ Яков Оконешников, Чурапчы улууһун баһылыгын бастакы солбуйааччы Алексей Ноговицын кыттыыны ыллылар.

 

Тэрээһин быйыл саас аан бастакытын ыытыллыбыт Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын бастакы съеһин резолюциятын олоххо киллэрэр сыалтан ыытылынна. Семинар сүрүн соругунан депутат үлэтин хаачыстыбатын, эппиэтинэһин үрдэтии, ситэриилээх уорганнары, быыбардааччылары кытта үлэ, сир сыһыаннаһыыларыгар ситэ өйдөммөт боппуруостары ырытыы буолла.

 

Мунньаҕы Чурапчы улууһун депутаттарын Сэбиэтин бэрэссэдээтэлэ Яков Оконешников аста.Кини депутаттарын семинар аһыллыбытынан эҕэрдэлээтэ.Хас биирдии нэһилиэккэ, түөлбэҕэ ыытыллар үлэттэн саҕалаан бэрэстэбиитэллээх уонна толорор уорганнар сүбэнэн бииргэ түмсэн үлэлииллэриттэн сайдыыбыт тутулуктааҕын бары өйдүөх тустаахпыт диэн эттэ.

 

Салгыы Чурапчы улууһун баһылыгын бастакы солбуйааччы Алексей Ноговицын бүгүҥҥү бэлиэ күн семинары ыыта, кытта кэлбит дьоҥҥо Чурапчы улууһун дьаһалтатын, олохтоохторун ааттарыттан махтанна. Дьоһун кэпсэтии тахсарыгар баҕа санаатын эттэ.

 

Саха Өрөспүүбүлүкэтин Ил Түмэнин олохтоох салайыныы боппуруостарыгар сис кэмитиэтин бэрэссэдээтэлэ Василий Местников муниципальнай тэриллиилэр бэрэстэбиитэллээх уорганнарын оруолун туһунан дакылааты оҥорон, мустубут депутаттар сэҥээриилэрин тарта. Нэһилиэнньэ олохтоохторун итэҕэлин ылбыт саҥа депутаттар Василий Местниковтан элбэҕи иһиттилэр.

 

Салгыы Саха Өрөспүүбүлүкэтин Ил Дарханын уонна бырабыыталастыбатын дьаһалтатын кадр политикатыгар уонна судаарыстыбаннай, муниципальнай сулууспаҕа Департаменын салайааччытын солбуйааччытын эбээһинэһин толорооччу Валентина Румянцева бэрэстэбиитэллээх уорганнар судаарыстыбаннай былаас уорганнарын уонна быыбардааччылары кытта бииргэ үлэлээһиннэрин туһунан кэпсээтэ.

 

Кэнники кэмҥэ дьону долгутар сир уонна тулалыыр эйгэ харыстабылын боппуруостарын сокуонунан көмүскэллээх буолууларын тула кэпсэтиини Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Владимир Прокопьев таһаарда.Тыа сирин депутаттара кыһалҕалаах боппуруостарын бэрэссэдээтэлтэн ыйытан, сөптөөх хоруйу ылан астыннылар.

 

Онтон Саха Өрөспүүбүлүкэтин үпкэ миниистирин солбуйааччы Иван Алексеев муниципальнай таһымҥа үп-харчы тыырыллыытын, сөпкө туһаныллыытын туһунан сиһилии быһаарда.

 

Саха Өрөспүүбүлүкэтин баайга-дуолга, сир сыһыаннаһыыларыгар миниистири солбуйааччы Михаил Никифоров муниципальнай баайы салайыы туһунан кэпсээтэ.

 

Саха Өрөспүүбүлүкэтин муниципальнай тэриллиилэр Сэбиэттэрин толорооччу дириэктэрэ Дмитрий Горохов муниципальнай тэриллиилэрин Сэбиэттэрин – Ассоциация үлэтин туһунан сырдатта.

 

Аһаҕас микрофон үлэлээн, семинар кыттыылаахтара тустаах салайааччыларга ыйытыы туһаайдылар, уопуттаах депутаттар үлэлэрин сырдаттылар.

 

Депутат Николай Михайлов Чурапчы улууһун Болугур нэһилиэгиттэн Мындаҕаайыттан семинарга кытта кэлбит. Эдэр сааһыттан салайар үлэҕэ сылдьыбыт. Быйылгы балаҕан ыйын 10 күнүгэр ыытыллыбыт быыбарга дьоно-сэргэтэ итэҕэйэн депутатынан талбыттар. “Депутат статуһа уруккуттан үрдээтэ. Онуоха быйыл саас Дьокуускайга ыытыллыбыт мунньах төһүү күүс буолла. Билиҥҥи балысхан үйэҕэ тыа сирин нэһилиэнньэтэ сайдыытыгар улахан болҕомто ууруохтаахпыт. Тыырыллыбыт үп-харчы барыта дьэҥкэ, хонтуруолланар буолуохтаах. Ону нэһилиэнньэ хайаан да билиэхтээх”, -- диэн тоһоҕолоото.

 

Афанасий Борисов Мэҥэ Хаҥалас Төҥүлүтүттэн сылдьар. «Нэһилиэгим инники сайдыытыгар, кини туруктаах буоларыгар үлэлэһиэм. Билигин дьон-сэргэ депутаттан ирдиирэ үгүс. Биһиэхэ тыа сиригэр күннээҕи социальнай тыын боппуруостарбыт өрүү бааллар», -- диэн эттэ.

 

Чурапчы Мугудайыттан сылдьар эдэр депутат, сынньалаҥ киинин үлэһитэ Ярослав Лебедев: “Нэһилиэкпит олохтоохторун итэҕэлин ылан быйыл депутатынан талыллынным. Бүгүн олохпор бастакыбын улахан семинарга кытта кэллим. Бу мунньах миэхэ уопут биэриэҕэ, аҕа саастаах депуттар тылларын-өстөрүн истэн, көрөн үөрэнэбин. Депутат өйө-санаата норуокка чугас буолуохтаах дии саныыбын. Эдэр депутаттар син бааллар эбит”, -- диэн санаатын эттэ.

 

Семинары иилээн-саҕалаан, сүрүннээн тэрийэн ыыппыт Саха Өрөспүүбүлүкэтин Ил Түмэнин олохтоох салайыныы боппуруостарыгар сис кэмитиэтин бэрэссэдээтэлэ Василий Местников биһигини кытта санаатын үллэһиннэ: “Чурапчыга олохтоох бэйэни салайыныыга олус суолталаах саҥа талыллыбыт депутаттарга семинар таһымнаахтык ааста. Онуоха быйыл саас ыытыллыбыт бастакы съезпит олук буолла. Үөрэрим диэн, бары олус көхтөөхтүк кытыннылар. Тыа сирин депутаттара мунаарар ыйытыыларын биэрдилэр, эбии этиилэри киллэрдилэр. Туһааннаах миниистирдэр солбуйааччылара кэлэн үлэлэспиттэрэ үчүгэй. Быыбарга уокуруктары тэрийэн депутаты талыы көдьүүстээх эбит диэн санааларын эттилэр”.

 

Саха Өрөспүүбүлүкэтин Судаарыстыбаннай Мунньаҕын (Ил Түмэн) Бэрэстэбиитэллэрин палататын бастакы Бэрэссэдээтэлэ, үтүөлээх юрист, поэт, тылбаасчыт, бөдөҥ судаарыстыбаннай уонна общественнай деятель, Чурапчы көһөрүллүүтүн кыттыылааҕа Афанасий Петрович Илларионов төрөөбүтэ 75 сылыгар аналлаах илин эҥэр улуустар нэһилиэктэрин, улуустарын депутаттарыгар аналлаах семинар таһаарыылаахтык ааста. Депутаттар суолталаах кэпсэтии тахсыбытын, маннык дьаһаллар үлэҕэ инникитин туһалаах буолуохтара диэн бигэ эрэнэллэрин эттилэр.