«Айылгы» култуура уонна духуобунай сайдыы киинигэр балаҕан ыйын 12 күнүгэр «Үөрэх ис хоһоонун саҥардыыга уонна хаачыстыбатын тупсарыыга тирээн турар уонна стратегическай соруктар» диэн Чурапчы улууһугар сыллата ыытыллар учууталлар сүбэ мунньахтара буолла. Итиннэ Ил Түмэн депутаттара, өрөспүүбүлүкэтээҕи үөрэх министиэристибэтин үлэһиттэрэ, нэһилиэк баһылыктара, учууталлар кыттыыны ыллылар.

Мунньах саҕаланыытыгар Чурапчы улууһун баһылыгын эбээһинэһин толорооччу Алексей Ноговицын, улуус депутаттарын Сэбиэтин бэрэссэдээтэлэ Афанасий Захаров эҕэрдэ тыл эттилэр.

Пленарнай мунньахха сүрүн дакылааты Чурапчы улууһун үөрэххэ управлениетын салайааччыта Юрий Посельскай оҥордо. Кини ааспыт үөрэх дьылын түмүктэрин сиһилии ырытта, быйылгы үөрэх дьылыгар турар соруктарга тохтоото. Былырыын оскуолаларга 3348 оҕо баарыттан 64% хаачыстыбалаахтык үөрэммит. БКЭ-ни 203 выпускник туттарбыта. 9 үөрэнээччи «Үөрэххэ уһулуччу ситиһиилэрин иһин» мэтээлинэн бэлиэтэнэн, бары үрдүк үөрэх кыһатыгар киирдилэр.

Быйыл улуус үрдүнэн 26 оскуолаҕа 3450 оҕо үөрэниэҕэ. Маҥнайгы кылаас боруогун 417 оҕо атыллаата. 2123 кырачаан уһуйааннарга сылдьыаҕа. Бары оскуолалар, уһуйааннар өрөмүөннэрэ кэмигэр түмүктэнэн, үлэлииргэ, үөрэтэргэ усулуобуйа тэрилиннэ. Быйылгы үөрэх дьылын уратытынан үөрэх хаачыстыбатын үрдэтии, оҕо сайдар эйгэтин тэрийии соруктара турбуттар.

Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева эҕэрдэлээн туран, быйылгы үөрэх дьыла саҕаланыытыгар өрөспүүбүлүкэ үрдүнэн бары оскуолалар, уһуйааннар былырыыҥҥы ахсааннара аччатыллыбакка киириилэригэр кини салайар кэмитиэтин, Ил Түмэн депутаттарын үлэлэрин билиһиннэрдэ.

Бу тыа сирин кэскилигэр, чуолаан бөһүөлэктэр кэлим сайдыыларыгар оруолун бэлиэтээтэ. Ол эрээри итинэн уоскуйан хаалбакка, үөрэтии-иитии саҥа соруктарын толорууга күүскэ үлэлэһэргэ, олох сайдыытын кытары тэҥҥэ хардыылаһан иһэргэ, саҥаны киллэриигэ хорсуннук ылсарга ыҥырда.

Ил Түмэн ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев үөрэх дьыла саҕаламмытынан эҕэрдэлээтэ, оскуолалар, уһуйааннар оннуларынан хаалан үлэлээһиннэригэр Ф.Габышева салайар кэмитиэтиниин бииргэ үлэлээбиттэрэ улахан оруоллаах буолбутун бэлиэтээтэ. Маныаха Феодосия Васильевна үөрэх эйгэтэ өрөспүүбүлүкэҕэ сайдарыгар салайар дуоһунастарга өр сыл үлэлээбитэ, уопута көмөлөспүтүн этэн туран, махталын биллэрдэ. Салгыы учуутал, иитээччи оруолугар тохтоото. Хас биирдии үөрэх эйгэтин үлэһитэ бастыҥ буоларга дьулуһуохтааҕын, үлэҕэ бэриниилээх, ыччат сайдарыгар  киһи элбэҕи ситиһиэхтээҕин, маныаха бэйэ билиитин күннэтэ үрдэтии, сайдан иһии ирдэнэрин эттэ.

Норуот депутата Семен Никитин Чурапчы ытык киһитэ, Аҕа дойду сэриитин кыттыылааҕа, улуустан сэриигэ кыттыбыттары үйэтитиигэ таһаарыылаахтык үлэлээбит Павлов Иван Михайлович сырдык кэриэһигэр биир мүнүүтэ сүһүөххэ туруорда. Салгыы 2020 сылга Аҕа дойду сэриитигэр Кыайыы 75 сыла бэлиэтэнэринэн, улуус үөрэххэ үлэһиттэрэ бу улуу бэлиэтээһиҥҥэ күүскэ үлэлэһэллэригэр ыҥырда. Оҕону үлэнэн иитиигэ боҕомтону уурарга эттэ.

Бу күн учууталларга, үөрэх эйгэтин үлэһиттэригэр наҕараадалар туттарылыннылар.

Чурапчы улууһун «Саҥа олох» хаһыатын корреспондена Алексей Слепцов