Ил Түмэн үлэтин билиһиннэрбитэ

 

Олунньу 8 күнүгэр биһиги улууспутугар СӨ Бырабыыталыстыбатын Бэрэссэдээтэлин бастакы солбуйааччыта Петр Алексеев кэлэн, Бырабыыталыстыба биир сыллаах үлэтин отчуоттаабыта. Дьокутааппыт Александр Сергеевич СӨ духуобунай сайдыыга уонна култуураҕа миниистирэ Владимир Тихонов бөлөҕөр киирэн улууспут 12 нэһилиэгэр сылдьыспыта. Манна кини Ил Түмэн ааспыт сыллааҕы үлэтин, өрөспүүбүлүкэ бүддьүөтүн уо.д.а. боппуруостарга киэҥник тохтоон, нэһилиэнньэҕэ сырдаппыта. Олохтоохтор үгүс элбэх мунаарар боппуруостарыгар астык эппиэттэри биэрбитэ.

 

Саҥа миниистирдиин кэлбитэ

 

Иккис сырыытыгар аатырбыт тустуук Николай Тарскай аатынан көҥүл тустууга өрөспүүбүлүкэтээҕи күрэхтэһиигэ кыайыылаахтары наҕараадалааһыҥҥа кыттыыны ылбыта. Кини бу кэлиитигэр  өрөспүүбүлүкэҕэ инвестиционнай сайдыы уонна предпринимательство саҥа миниистирэ Антон Софроновы илдьэ кэлбитэ. Дьокутаат быһаччы тэрийиитинэн миниистир улуус 36 предпринимателлэрин кытары көрсүспүтэ. Онно былааннаабыттарынан миниистир Антон Софронов ыам ыйыгар Сунтаарга анаан-минээн үлэлии кэлиэхтээх. Кини ааспыт сырыытыгар «Татыйыына» фирма, «Корона», «Тещин язык», «Айан суол» салайааччыларын үлэлэрин-хамнастарын билсибитэ уонна хайҕаабыта.

 

Дьокутаат А.С.Уаров аатынан турнир

        

Үһүс сырыытыгар Ил Түмэн аатыттан Сиэйэ орто оскуолатын 125 сыллаах үбүлүөйүгэр кыттыыны ылбыта. Бастыҥ учууталларга наҕараадалары туттарбыта. Бордоҥҥо кини аатынан үөрэнээччилэргэ өрөспүүбүлүкэтээҕи аһаҕас турниры тэрийбитэ. Көҥүл тустууга турнир быйыл 18-с сылыгар 9-с төгүлүн ыытылынна. Өрөспүүбүлүкэҕэ итинник уһуннук турниры эдэр тустууктарга ким даҕаҕаны ыыта илик. Ааспыт өттүгэр биллиилээх саха тустууктара Николай Охлопков, Владислав Андреев, Михаил Иванов уо.д.а. хаста да чөмпүйүөннээбиттэрэ. Бу сырыыга 40 бириис харчынан, 40 бирииһи спонсордар туруорбуттара. Онон бу турнир кэскиллээхтик тустар оҕолору үүннэрэн таһаарар улахан түһүлгэ буолла.

 

Лиссиэй-интэринээт 25 сылыгар

 

Дьокутааппыт төрдүс төгүлүн Сунтаардааҕы политехническэй лиссиэй-интэринээт тэриллибитэ 25 сыллаах үбүлүөйүгэр кэлэн кыттыыны ылбыта. Эмиэ бастыҥ үлэһиттэргэ Ил Түмэн наҕараадаларын туттарбыта. Бу кэлиитигэр 10-ча киһини приемнаабыта. Итини сэргэ Александр Сергеевич Дьокуускайга бэрэстэбиитэллээх уорганнар дьокутааттарын      бастакы, экологтар сийиэстэрин тэрээһинигэр көхтөөх кыттыыны ылбыта.

 

«Бу сылга дойдубар официальнай үбүлүөйдээх – Кутана, Сиэйэ, лиссиэй-интэринээт үөрүүлээх түгэннэригэр Саха Өрөспүүбүлүкэтин үөрэҕириитин министиэристибэтиттэн биир даҕаны киһи кэлэн кыттыыны ылбатаҕыттан олус диэн сөҕөбүн, хомойобун», диэтэ түмүгэр дьокутааппыт Александр Уаров.