Кулун тутар 27 күнүгэр Саха сиринээҕи научнай Киин дьиэтин таһыгар Саха сирин бастакы учуонай-химигэ, биологическай наука бастакы доктора уонна профессора, РСФСР уонна САССР наукатын үтүөлээх деятелэ, РСФСР норуотун үөрэҕириитин туйгуна Алексей Дмитриевич Егоров төрөөбүтэ 120 сылыгар аналлаах тэрээһин-миитин ыытылынна.

Бу бэлиэ даатанан сибээстээн, тэрээһиҥҥэ СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччыта Александр Жирков уонна норуот депутаттара кыттыыны ыллылар.

Александр Николаевич наукаҕа сүдү кылаатын киллэрбит, сахалартан бастакы улахан учуонай аатын ааттатар мемориальнай дуоска анныгар ыытыллыбыт миитиҥҥэ, мустубут дьоҥҥо туһаайан тыл эттэ уонна сибэкки дьөрбөтүн уурда.

«Тиит-Арыылар былыр былыргыттан үөрэххэ, билиигэ, наукаҕа күүстээх тардыһыылаахтар. Байаҕантайдар буолла да, хайаан да Тиит-Арыы диэччиллэр. Ол билиҥҥэ диэри бара турар. ХХ үйэ саҕаланыытыгар Тиит-Арыы ыччаттара наукаҕа, үөрэххэ тардыһыылара билиҥҥэ диэри дуорааннаан биллэр диибит», - диэтэ Александр Жирков.

Ил Түмэн бастакы вице-спикерэ эппитинэн, ааҕылларынан Тиит-Арыыттан төрүттээх 20-чэ биллиилээх учуонай, поэт, суруйааччы баар. «Олор истэриттэн Алексей Дмитриевич Егоров биир ураты чаҕылхайдара буолар. Кини улахан учуонай, науканы үөрэтии-чинчийии тэрийээччитэ, общественнай деятель. Ону кытта педагогическай наука доктора Егор Петрович Жирков, ХИФУ доктордара  Степан Константинович Колодезников, Иван Яковлевич Егоров уонна да атыттар, бары Тиит-Арыыттан сыдьааннаахтар. Билигин манна кэлэн турар Сиэн Кынат эмиэ Тиит-Арыыттан тардыылаах», - диэн тоһоҕолоон эттэ.

Кини сыаналыырынан, Алексей Дмитриевич биология, химия наукаларын салаатыгар үөрэнэн, билиилэнэн тахсыбыт, саҥа научнай хайысха сайдарыгар олук уурбут киһибит, Саха сиригэр бу хайысханан научнай үөрэтиини төрүттээбитэ.

«Билигин кини саҕалаабыт научнай оскуолата салгыы утумнаан сайдар. Бүгүн манна наука доктора Никита Гаврильевич Соломонов кэлэн турар. Алексей Дмитриевич Егоров оччолорго сахалар үөрэппэтэх, билбэтэх эйгэлэрин үөрэтиигэ, чинчийиигэ Дмитрий Дмитриевич Саввинов, Николай Николай Сазонов курдук эдэр учуонайдары тардан, Саха сиригэр биологическай, химическай наукаларга уонна биохимия хайысхатынан улахан суолталаах арыйыылар оҥоһуллубуттара», - диэтэ бастакы вице-спикер.

Тэрээһиҥҥэ Бээрийэ, Тиит-Арыы, Уус-Алдан дьоно, учуонайдар, Саха сирин общественноһа муһуннулар. Алексей Дмитриевич 120 сыл анараа өттүгэр, 1899 сыл кулун тутар 27 күнүгэр төрөөбүтэ.

«Биһиги кэнэҕэски ыччаппыт Алексей Дмитриевич Егоров курдук наукаҕа, билиигэ тардыһыылаах буоллун. Урукку көлүөнэ курдук үөрэҕи, билиини ылынан, өрө дабайан истиннэр диэхпин баҕарабын. Улуу, чаҕылхай дьоммут ааттара норуокка ааттана турдуннар», - диэтэ Александр Жирков.

Ил Түмэн пресс-сулууспата