Ол курдук, бэҕэһээ буолбут көрсүһүү мунньах киэбинэн буолбакка, холку быһыыга-майгыга ааста. Егор Борисов өрөспүүбүлүкэ социальнай-экономическай эйгэтигэр кү­түллэр уларыйыылар тустарынан кэпсээтэ. Кини тутан олорор үлэбитигэр, ол эбэтэр тыа хаһаайыстыбатын, тутуу, суол оҥоһуутун, ДьУоКХ салааларыгар бэйэбит эрэ кыһалыннахпытына үтүө уларыйыылары киллэриэхпит диэн чопчулаан эттэ. Үүммүт сылга уонна онтон кэлэр сылларга судаарыстыбаннай бүддьүөт уустук буолуоҕар тохтоото. Маныаха баһылыктар бэлэм буолалларыгар ыҥырда.

 

Көрсүһүү иккис түһүмэҕэр улуус, нэһилиэк баһылыктара ыйытыылары биэрдилэр. Үөһээ Бүлүү өрүс уҥуор нэһилиэктэригэр, Уус-Алдан Бороҕонугар гаас ситимэ, оптоволокно хаһан тардылларын, Ньурбаҕа үрдүк күүрүүлээх уот ситимэ хаһан кэлэрин, “Тыа сирин территорияларын туруктаахтык сайыннарыы” кэлим бырагыраама оннугар киирбит “Олохтоох көҕүлээһини өйөөһүн” бырагырааматын уонна “Сахам сирэ 21 үйэҕэ” өрөспүүбүлүкэ бырагырааматын, судаарыстыбаннай көрүүгэ киирбэтэх нэһилиэк баһаарынай чаастарын дьылҕатын туһунан уонна да атын ыйытыылар киирдилэр. Ил Дархан миниистирдэр уонна биэдэмистибэлэр салайааччыларын кытта баһылыктар ыйытыыларыгар толору хоруйдары биэрдэ.

 

Нерюнгри оройуонун Беркакит бөһүөлэгин баһылыга Владимир Добрынин:

 

— Егор Афанасьевич, муниципальнай сулууспалаахтар хамнастарын хаһан үрдэтэллэрий? Дьаһалта исписэлииһэ 25 тыһ. солк. хамнастаах. Эрэнэ күүтэбит.

 

— Хамнаһы төлөөһүн өрөспүүбүлүкэ бүддьүөтүн ороскуотун биир саамай эппиэтинэстээх ыстатыйатынан буолар. Судаарыстыба баһылыга Владимир Путин ыам ыйынааҕы ыйаахтарыгар туруорбут соругунан уонна  2012-2017 сс. Саха Өрөспүүбүлүкэтигэр бүддьүөт үлэһиттэрин хамнаһын уонна хамнас алын кээмэйин үрдэтии концепциятынан ааспыт сылга бүддьүөт үлэһиттэрин 12 тус категориятыгар, уопсайа 58 тыһ. үлэһит хамнаһа үрдээтэ. Муниципальнай сулууспалаахтар хамнастара 2014 сылтан үрдүү илик. Мин бэйэм оннук сорук туруорбутум. Бастаан бүддьүөт үлэһиттэрин хамнастарын үрдэтиҥ диэн. Концепцияҕа баар бүддьүөт категорияларын хамнастарын үрдэтии кэнниттэн, эһиги киэҥҥит туһунан толкуйдуохпут.

 

Сунтаар улууһун Элгээйи нэһилиэгин баһылыга Гаврил Яковлев:

 

— 2018 сыл өрөспүүбүлүкэбитигэр Нэһилиэнньэ дьарыктаах буоларыгар көмө сылынан биллэриллибитэ. Онон биһиги маннык этиилээхпит. Тыа сиригэр үлэлиир сүрүн бүддьүөт тэрилтэлэригэр – балыыһаларга, оскуолаларга, култуура салаатыгар биэнсийэҕэ тахсыбыт үлэһиттэри тохтотон, анал үөрэхтээх дьону ыларга. Маныаха туох эрэ нормативнай акта наада.

 

— Нэһилиэккит иһигэр бүддьүөт үлэһиттэрин ылар-ууратар — үлэ биэрээччи бэйэтин боломуочуйата!

 

Сардаана КУЗЬМИНА