Ил Түмэн салалтата уонна сис кэмитиэттэрин председателлэрэ муус устар 7 күнүгэр Дьааҥы улууһун делегациятын кытта көрүстүлэр. Делегация Дьокуускайга Дьааҥы улууһун Күннэрин ыытыынан сибээстээн, республика Правительствотыгар, министерстволарга, биэдэмистибэлэргэ, Ил Түмэҥҥэ уо.д.а. сылдьар, улуус Күннэригэр культурнай программаны ыытар былааннаах.  
 
Көрсүһүүгэ парламент спикерин бастакы солбуйааччы Анатолий Добрянцев, спикери солбуйааччы Виктор Губарев, государственнай тутууга уонна сокуоннаска сис кэмитиэт председателэ, Намтан депутат Алексей Еремеев,  бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт председателэ Юрий Николаев, тыа сиригэр уонна аграрнай политикаҕа сис кэмитиэт председателэ Дмитрий Саввин, доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэт председателэ Александр Корякин, дьиэ кэргэн, оҕо, ыччат дьыалаларыгар, физкультураҕа уонна спорка сис кэмитиэт председателэ Юрий Баишев,  сир сыһыаннаһыыларыгар, айылҕа баайыгар уонна экологияҕа сис кэмитиэтин председателэ Владимир Прокопьев, наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэр дьыалаларыгар сис кэмитиэт председателэ Антонина Григорьева, мандаат уонна регламент хамыыһыйатын   председателэ Марфа Филиппова кытыннылар. Улуус баһылыга Виктор Павлов уонна улуус мунньаҕын председателэ Александр Мукминов салайан илдьэ кэлбит улуус делегациятын састаабыгар нэһилиэктэр баһылыктара, улуус мунньаҕын депутаттара бааллар.
 
Көрсүһүү саҕаланыытыгар Анатолий Добрянцев Ил Түмэҥҥэ маннык көрсүһүүлэр утумнаахтык ыытыллалларын, бу иннигэр Нам улууһун делегациятын кытта көрсүбүттэрин бэлиэтээтэ. Кини улуустан кэлбит дьоҥҥо Ил Түмэн структуратын, фракцияларын, кэмитиэттэрин, сокуону оҥорор үлэтин, ылыллыбыт сокуоннары олоххо киллэриини хонтуруоллааһын туругун, парламент федеральнай сокуоннары көҕүлүүр үлэтин билиһиннэрдэ. “Дьааҥы улууһа Арктика улуустарын ортотугар тэтимнээхтик сайдар улуус ахсааныгар киирэр”, -- диэтэ Анатолий Добрянцев. 
 
Улуус баһылыга Виктор Павлов Дьааҥы улууһун социальнай-экономическай сайдыытын билиҥҥи туругун, баар итэҕэстэр уонна инники былааннар тустарынан сиһилии дакылааты оҥордо. Кини улууска билигин 11 тыһыынча 590 киһи олорорун, кэнники сылларга улууска тутуу балачча ыытыллар буолбутун, нэһилиэнньэ эбиллиитэ, оҕо төрөөһүнэ өлүүнү куоһара турарын, дойду Президенэ Владимир Путин бюджет үлэһиттэригэр хамнаһы улаатыннарыы туһунан социальнай хайысхалаах Ыйаахтарын толорон иһэрин бэлиэтээтэ. Улуус депутаттарын мунньаҕын председателэ Александр Мукминов улуус мунньаҕын иннигэр турар соруктары билиһиннэрэн туран, улуус бюджетын 2015 сыллааҕы кээмэйдэригэр тохтоото.
 
Виктор Павлов уонна Александр Мукминов Дьааҥы улууһун экономическай көрдөрүүтэ кэнники 3-4 сылларга үчүгэй өттүгэр тахсан эрэрин бэлиэтээтилэр. Ол курдук улууска үс таас оскуола үлэҕэ киирбиттэр. Нэһилиэктэргэ аныгы хочуолунайдар былааннаахтык тутулла тураллар. Онон инникитин тыа ыалын дьиэтэ-уота толору хааччыллыылаах буолар төрүтэ ууруллар. Кэлин сылларга толору хааччыллыылаах дьиэлэри туттуу барыыта бу өттүгэр сайдыы киирэн эрэрин туоһулуур диэн этилиннэ. Ол гынан баран ааспыт сыл түмүгүнэн улууска буруйу оҥоруу улааппыта дьиксиннэрэр, диэтэ Александр Мукминов.  Маны сэргэ улуус олоҕор кырата суох суолталаах “Янгеология” предприятие эстэр турукка киириитэ улаханнык сэрэхэдитэрэ бэлиэтэннэ.  
 
Ыйытыылар уонна санааны хардарыта атастаһыы кэмигэр Эҥэ оскуолатын инвестиционнай бырайыакка киллэрии, оскуолаларга оҕолору  спортивнай көрүҥнэргэ тэҥинэн дьарыктыыр специалистары бэлэмнээһин, улуус ыччаттара дойдуларыгар тиийэн үлэлииллэригэр хантараагы түһэрсии, тыа хаһаайыстыбатын сайдыытын уонна сири нүөлсүтүү, өртөөһүн, агро-оскуолалары үбүлээһин  уо.д.а. боппуруостарыгар Антонина Григорьеваҕа, Юрий Баишевка уонна Дмитрий Саввиҥҥа элбэх ыйытыы киирдэ.
 
Антонина Григорьева улууска оскуола иннинээҕи саастаах оҕолорго төһө чааһынай тэрилтэлэр тэриллэн үлэлээн эрэллэрин, библиотекалары толору комплегынан хааччыйыы хайдаҕын, Дьааҥы сылгытын этин хаачыстыбата үрдүгүн быһыытынан бородууксуйаны оҥорон таһаарыыга  саҥа технологияны хайдах туһаныахха сөбүн, общественнай Сэбиэттэр председателлэрин үлэлэрин өйөөһүн  тустарынан кэпсэттэ, ыйытыыга хоруйдаан агро-оскуола үбүлээһинин быһааран биэрдэ. Дмитрий Саввин Дьааҥыга Олоҥхо ыһыаҕын ыытыы, улуус тыа хаһаайыстыбатыгар көрөр үбүлээһин, ынах сүөһү төбөтүн элбэтии боппуруостарыгар санаатын атастаста. Владимир Прокопьев ходуһаны өртөөһүн боппуруоһугар сокуоҥҥа чопчулааһын оҥоһуллубутун түмүгэр билигин баһылыктар өртөөһүнү бэйэлэрин хонтуруолларынан ыыттарар бырааптаахтарыгар тохтоон, быһааран биэрдэ.
  
Икки өттүттэн дьыалабыайдык, интэриэстээхтик барбыт көрсүһүүгэ норуот депутаттара улуус делегацията туруорсар сорох боппуруостарын өйүөх буолан, туһааннаах суруктары бэлэмнээн киллэрэллэригэр эттилэр. Виктор Губарев Дьааҥы улууһун социальнай-экономическай программата үчүгэйдик оҥоһуллан үлэлиирин, улууска нэһилиэнньэ олоҕор көдьүүстээх элбэх үлэ ыытылларын биһирээбитин, 11,5 тыһыынчаттан тахса  нэһилиэнньэттэн 10 тыһыынча кэриҥэ киһиэхэ социальнай өйөбүлү көрөр уопутун тарҕатыахха сөбүн бэлиэтээн туран, улуус салайааччыларыгар Виктор Павловка уонна Александр Мукминовка, улуус бары олохтоохторугар ситиһиилэри баҕарда. Көрсүһүү уопсай хаартыскаҕа түһүүнэн түмүктэннэ.
 
Ил Түмэн пресс-сулууспата