Ыам ыйын 12 күнүгэр “Медиалогия” компания РФ 85 субъегын парламеннарын баһылыктарын 2015 сыл муус устардааҕы медиарейтинин туһунан пресс-релиһы тарҕатта. Рейтинг сонуннары киэҥник тарҕатар средстволар тиһиктэригэр компания  бэйэтин базатыгар олоҕуран оҥоһуллубут. Ити базаҕа ыам ыйын 5 күнүнээҕи туругунан телевидение, радио, сурунааллар, информагентстволар, интернет-СМИ-лэр уонна хаһыаттар, барыта 24 700 араас источник киирэр. 
 
Бу тутулуга суох российскай чинчийэр компания чопчу кэм кэрчигэр ханнык политик төһө элбэхтэ сонуннары киэҥник тарҕатар средстволарга ахтылларын чинчийиинэн, сонуннары киэҥник тарҕатар средстволары кэтээн көрүүнэн, ырытыынан анаан-минээн дьарыктанар уонна РR итиэннэ маркетинговай коммуникациялар төһө көдьүүстээхтэрин сыаналыыр кыаҕы биэрэр. 
 

Александр Жирков медиарейтинг инники күөнүгэр сылдьар бастакы 10 киһитин ахсааныгар киирдэ. Александр Жирков медиа-индекса 800,40 единицаҕа тэҥнэстэ. Итинэн Ил Түмэн Председателин норуоттар икки ардыларынааҕы общественнай-политическай эйгэҕэ көхтөөх үлэтигэр үрдүк сыанабыл бэрилиннэ. Бу сыанабыл Нью-Йорк куоракка ХНТ штаб-квартиратыгар бу тэрилтэ төрүт норуоттар боппуруостарыгар Бастайааннай Форумун  14-с сессиятыгар дакылаатынан кыттыытынан уонна “Аан дойду музейдарыгар XVII-XX үйэ саҕаланыытыгар Саха сирин норуоттарын материальнай уонна духуобунай култууралара” диэн өрөспүүбүлүкэ норуоттар икки ардыларынааҕы бырайыагын ХНТ эгидатыгар киллэриини ситиһиитинэн, ол кэннитэн ХНТ радиотыгар биэрбит интервьютун; государстволар икки ардыларынааҕы таһымҥа --  Бишкек куоракка  «М.К.Аммосов. Кыргызский период деятельности» российскай-кыргызскай кинигэни билиһиннэриинэн, Россияны кытта доҕордуу Кыргызтан государствотын салалтатын кытта көрсүһүүтүнэн; регионнар икки ардыларынааҕы таһымҥа – Санкт-Петербург куоракка “Россия Хотугулуу-Арҕаа Парламентскай Ассоциациятын” уонна “Дальнай Восток уонна Забайкалье” Парламентскай Ассоциация парламеннар икки ардыларынааҕы холбоһугун мунньаҕар кыттан, хотугу сири-уоту сайыннарыыга суолталаах этиилэрин киллэриитинэн көрөн оҥоһулунна.
 
Санатан эттэххэ, «Медиа-индекс» - сонуннары киэҥник тарҕатар средстволар киһи, компания эбэтэр аат-суол, бренд тула үөскэтэр информационнай эйгэтин туруга хайдах хаачыстыбалааҕын көрдөрүүтэ. Ити көрдөрүү -1000-тан + 1000 единицаҕа диэри халбаҥныан сөп. «Медиа-индекс» көрдөрүүтэ төһөнөн улахан да, сонуннары киэҥник тарҕатар средстволар киһини уонна кини аатын-суолун үрдэтэр сонуннара, сурахтара соччонон дьоҥҥо сөбүлэтэр уонна чаҕылхай буолаллар. «Медиа-индекс» көрдөрүүлэрин ааҕан-суоттаан таһаарыыга кээмэйдээһин хас да көрүҥэ учуоттанар, ол иһигэр информацияны биэрэр источник дьайар, сабыдыаллыыр кыаҕа (издание сонуннары киэҥник тарҕатар средстволарга төһөтө хатыланара), сонуннарга киһи туһунан төһө үчүгэйдик эбэтэр куһаҕаннык, биитэр ылбат-биэрбэт икки ардынан ахтыы көрүҥнэрэ, сонуҥҥа киһи баһылыыр эбэтэр ханан эмэ ахтыллан ааһар оруола уонна да атыттар. 
 
«Медиалогия» Компания матырыйаалларынан Ил Түмэн пресс-сулууспата