Уопсастыбаннас, өрөспүүбүлүкэ бас-көс дьоно, норуот дьокутааттара Өрөспүүбүлүкэ уйгулаах олоҕун уһансыбыт дьоммутун ааттарын ааттаан, тумус туттан, ытыктабылларын биллэрдилэр. Ол курдук, Максим Кирович Аммосов пааматынньыгар үгэскэ кубулуйбут сибэкки дьөрбөтүн ууруу сиэрэ-туома өрө күүрүүлээхтик ааста, дьон-сэргэ, ыччат үөрэн-көтөн, өрө көтөҕүллэн тарҕаста.

 

Тэрээһиҥҥэ Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн, Ил Түмэн судаарыстыбаннай тутулга уонна сокуоннаска сис кэмитиэтин бэрэссэдээтэлэ Алексей Еремеев, СӨ Ыччат бэлиитикэтигэр уонна дьиэ кэргэн дьыалатыгар миниистир Иван Луцкан, ХИФУ педагогическай үөрэхтээһиҥҥэ проректора Михаил Федоров, Куорат мэрин бастакы солбуйааччы Дмитрий Садовников, Нам улууһун баһылыгын эбээһинэһин толорооччу Ефим Гоголев, Республика кырдьаҕастарын Ытык Сүбэтин председателэ Люлия Григорьева, ХИФУ преподавателлэрэ, устудьуоннара, уопсастыбаннас кыттыыны ыллылар.

 

Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн өрөспүүбүлүкэ салалтатын аатыттан бэлиэ күнүнэн эҕэрдэлээн туран эттэ: «Максим Аммосов төрөөбүт сиригэр Нам Хатырыгар дьон-сэргэ мустан, маннык көхтөөхтүк кыттан, олус үөрэн-көтөн турабын. Бу күн суолтатын өйдөөн, ыччат эмиэ бэйэтин кылаатын киллэрэрин истэ-билэ сылдьабын, онон киэн туттабыт. Куруук оннук буола туруохтун! Актыыбынай, көхтөөх буолуҥ!», - диэн баҕа санаатын тиэртэ.

 

Ил Түмэн судаарыстыбаннай тутулга уонна сокуоннаска сис кэмитиэтин бэрэссэдээтэлэ Алексей Еремеев Ил Түмэн салалтатын, норуот дьокутааттарын аатыттан университет үлэһиттэригэр, устудьуоннарыгар истиҥ эҕэрдэтин эттэ: «Саха өрөспүүбүлүкэтэ тэриллибит күнүнэн итиитик-истиҥник эҕэрдэлиибин! Бүгүн Максим Кирович Аммосов, Платон Алексеевич Ойуунускай, Исидор Никифорович Барахов, Степан Максимович Аржаков ааттарын чиэстээн кэлэн турабыт. Баара-суоҕа 24 саастаах Максим Аммосов Москваҕа тиийэн, Ленины көрсөн, Сталиҥҥа киирэн, биһиги өрөспүүбүлүкэбит баар буолуохтааҕын турууласпыта. Бу боппурос араас хайысханан салаллыан сөптөөҕө. Ону саха чулуу уола Саха сирэ улуу Арассыыйа иһигэр киирэр дьылҕатын күүстээхтик туруорсан ситиспитэ. Кини эр санаатынан, политическай дьулуурунан, бүтүн норуот туһугар ылыммыт эппиэтинэһинэн, өрөспүүбүлүкэ ураты туруга ситиһиллибитэ. Өрөспүүбүлүкэ судаарыстыбаннаһын олохтообут саха чулуу уолаттара оччолорго 18-20 эрэ саастаахтара. Онон маннык улуу дьоммутунан өрүү киэн туттуҥ, аны өрөспүүбүлүкэбит 100 сааһын бэлиэтиирбитигэр, Максим Кирович  аатын дьоһуннаахтык сүгэр, кини аатын ааттатар үлэһит дьон буолаарыҥ!»

 

ХИФУ педагогическай үөрэхтээһиҥҥэ проректора Михаил Федоров университет коллективын аатыттан мустубут дьоҥҥо истиҥ эҕэрдэтин тиэрдэн туран, үөрэх тэрилтэтэ маннык ураты, уһулуччу киһи – Максим Аммосов аатын илдьэ сылдьары киэн туттарын биллэрдэ. Университет туруорбут сыалын, соругун толору толорон иһэр, билиҥҥи туругунан Арассыыйа үрдүк үөрэҕин тэрилтэлэригэр 40 бастыҥ университеттарын иһигэр киирбитинэн үөрүүтүн үллэһиннэ.

 

Хотугулуу-Илиҥҥи университекка сыл аайы Максим Аммосов аатынан бастыҥ устудьуоҥҥа стипендия көрүллэр. Бу бэлиэ күҥҥэ үөрэх кыһатын биир бастыҥ устудьуона Алексей Голиков үөрэн-көтөн туран уһуйааччыларыгар, доҕотторугар эҕэрдэтин тиэртэ: «Максим Аммосов аатынан стипендияны ылан үөрүүм үгүс! Саха норуотун маннык чаҕылхай ыччата биһиэхэ холобур буолар. Кини олоҕо, үлэтэ, сүппэт-оспот суолу хаалларда. Кини тэлбит суолун батыһан, үөрэхтээх, билиилээх буолар туһугар кыһаллыахпыт, дьүккүөрбүтүн уҕарытыахпыт суоҕа», - диэн ХИФУ ыччатын аатыттан эрэннэрдэ.