Тэрээһин норуот депутата үөрэммит оскуолатыгар, М.Т. Егоров аатынан Үөһээ Бүлүүтээҕи орто оскуолаҕа буолан ааста. Эһиил Аҕа дойду Улуу сэриитин кыттыылааҕа, ССРС норуотун үөрэҕириитин туйгуна, ССРС народнай учуутала, В.И. Ленин, Yлэ Кыhыл Знамятын уонна Аҕа дойду сэриитин II истиэпэннээх уордьаннарын кавалердара, А.Е. Кулаковскай – Өкскөкүлээх Өлөксөй аатынан Государственнай бириэмийэ лауреата Михаил Андреевич Алексеев төрөөбүтэ 100 сылын туолар.

 

Отуттан тахса сыл устата оҕону үөрэтиигэ, иитиигэ туох баар сыратын, билиитин, дьоҕурун барытын биэрэн үлэлээбит Улуу Учуутал аатынан научнай ааҕыыларга уопсайа 53 үөрэнээччи уонна учууталлар үс бөлөҕүнэн кытыннылар.

 

«Алексеевскай ааҕыылары» арыйыы үөрүүлээх чааһыгар күндүтүк саныыр учууталларым, үөрэҕирии бэтэрээннэрэ, В.С.Долгунов, М.И. Мярикянова, Е.А. Егорова, Г.П. Михайлова Михаил Андреевиһы кытта бииргэ үлэлээбит, алтыспыт кэмнэрин туһунан олус истиҥ тыллардаах ахтыылары оҥордулар. Үөрэммит оскуолабыт дьиэтэ төһө да кыараҕас буоллар, дьаһалта  мас куорпуска кыра хос биэрэн, оскуола музейын тэрийэн эрэллэр. Биһиги,  араас сылларга үөрэнэн бүтэрбиттэр, музей тэриллиитигэр хаартыска матырыйаалларынан көмө буолуохпут», - диэтэ  Марфа Филиппова.

 

«Мин оскуолаҕа үөрэнэр кэммэр Михаил Андреевич Алексеев курдук Улуу учууталы кытта алтыһан ааспыппар дьылҕабар махтанабын. Ол курдук, маҥнайгы сүһүөх первичнэй комсомол тэрилтэтигэр санитарнай секторынан үлэлиирим. Нэдиэлэ бүтүүтэ хайаан да үлэбит түмүгүн таһаарааччыбыт. Михаил Андреевич түмүгү ылан, хос-хос бэрэбиэркэлээн баран, линейка кэмигэр дакылааттааччы. Кини төһө да бэйэтин үлэтэ элбэҕин үрдүнэн, бу нэдиэлэ түмүгүн таһаарыыга олус эппиэтинэстээхтик сыһыаннаһара. Михаил Андреевич тус холобурунан сиэр-майгы үтүө сыаннастары иҥэрбитэ. Итиэннэ кини биһиэхэ дьаныардаах үлэ-үөрэх үтүө түмүктэрдээх буолар диэн өйдөбүлү иҥэрбитэ», - диэн Марфа Филиппова оскуолаҕа үөрэммит кэрэ кэмин ахтан-санаан аһарда.

 

Ил Түмэн бэһис ыҥырыытын депутаттара  Юрий Николаев, Юрий Окоемов уонна Марфа Филиппова үһүөн үтүөлээх учуутал М.А.Алексеев үөрэнээччилэрэ буолаллар, М.Т. Егоров аатынан Үөһээ Бүлүүтээҕи орто оскуоланы бүтэрбиттэр. «Биһиги М.А.Алексеев аатынан Үөһээ Бүлүүтээҕи лицей-интернат интернатын дьиэтэ ситэри тутуллан үлэҕэ киирэригэр күүс-көмө буолуохпут», - диэн эрэннэрдэ Марфа Филиппова.

 

Саха сиригэр физмат оскуолалар хамсааһыннарын саҕалаабыт тэрийээччи, саха омук сайдыылаах, үрдүк техническэй билиилээх буолуутугар туохха да тэҥнэммэт сүдү кылааттаах, аан дойдуга тиийэ биллэр учуонайдары иитэн-үөрэтэн таһаарбыт Улуу Учуутал албан аата умнуллубат.