Кулун тутар 29-30 күннэригэр Дьокуускайга Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын I съеһэ ыытыллыаҕа. Саха сирин бары улуустарыттан уонна нэһилиэктэриттэн 500 делегат кытта кэлиэҕэ. Манан сиэттэрэн биһиги делегаттар съеһи көрсө санааларын, туох туруорсар боппуруостаахтарын билиһиннэриэхпит.

Николай Софронеев, Кэбээйи улууһун VІ ыҥырыылаах Сэбиэтин дьокутаата, ОДьКХ уонна тутуу хамыыһыйатын бэрэссэдээтэлэ, “СӨ ОДьКХ» ГУП филиалын дириэктэрэ:

 

- Билиҥҥитэ саамай уустук кыһалҕабыт – кыра нэһилиэктэргэ баһылыктар Сэбиэт бэрэссэдээтэлинэн талыллан үлэлииллэригэр сытар. Ол эбэтэр баһылык биир илиитинэн дьаһал таһаарар, онтун аны бэйэтэ бигэргэтэр. Мин санаабар, маны тохтотор оруннаах. Олохтоох Сэбиэт бэйэтэ туспа бэрэссэдээтэллээх буолуохтаах. Тутуу, үп боппуруоһун көрөр туспа киһи наада. Дьон эмиэ биир оннук санаалаах. Кыра нэһилиэктэргэ мантан сылтаан дьокутааттар көдьүүстээхтик үлэлиир кыахтара суох. Ити уларыйыан наада. Оннук эрэ гыннахха хамсааһын тахсыыһы.

 

Олохтоох Сэбиэккэ дьокутаатынан киһи бөҕөтүн талабыт. Мин санаабар, талыллан үлэлии сылдьар киһи дохуотун көрдөрүөхтээх. Ол эрээри кыра нэһилиэктэргэ тыа хаһаайыстыбатынан дьарыгыран олорор дьокутааттарга ол кыаллыбат. Холобур, бүгүн мин 60 сылгылаахпын, аны саас кураан сыл буолан,  50 сылгылаах да хаалыахпын сөп диэҕэ. Эбэтэр өҥ сылга ол 60-тан 90-ча сылгыланыахпын сөп диэн буолуо. Ол иһин сүөһү көрөөччүлэргэ, табаһыттарга – тыа хаһаайыстыбатынан дьарыктанан олорор дьон кыра нэһилиэккэ дьокутаатынан турарыгар кэккэ мэһэй үөскүүр. Оттон улуус дьокутааттара декларацияны туттарыахтаахтар.

 

Нэһилиэктэргэ түөлбэлэр салайааччыларын өйүүр кэм кэллэ. Кыра нэһилиэк сайдыытыгар дьайар төһүү күүһүнэн кинилэр буолаллар. Ханна да көр, үчүгэй салайааччылаах түөлбэ мэлдьи инники күөҥҥэ сылдьар. Оттон ол салайааччы баҕа эрэ өттүнэн ылсан үлэлии сылдьара кыһыылаах. Кини үлэтин түмүгүнэн көрөн, харчынан өйөбүл оҥоһулуннаҕына, өссө көдьүүстээх үлэ-хамнас тахсыа этэ. Улахан нэһилиэктэргэ оннук көҕүлүүр өйөбүл баар, оттон кыра үптээх нэһилиэктэргэ ол суох.   Бэйэм 11 кыра нэһилиэги кытта ыкса үлэлэһэбин, онон бу боппуруостары І съезкэ туруорсаары бэлэмнэнэбин.

 

Ил Түмэн пресс-сулууспата