Суоттуга «Кустук» уһуйаан

Күнүс 12 чаастан Суоттуга Оҕуруоттаах сэлиэнньэтигэр 75 миэстэлээх «Кустук» оҕону сайыннарар киин саҥа дьиэтин арыллыытын сиэрэ-туома ыытылынна. Кырачаан оҕолорго анаан тутуллубут «Кустук» уһуйаан символическай күлүүһүн сэбиэдиссэй Клавдия Алексееваҕа тутууну ыыппыт «СеверДорСтрой» тэрилтэ салайааччыта Константин Николаев туттарда.

 

Үөрүүлээх түгэҥҥэ Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Саха Өрөспүүбүлүкэтин инвестиционнай сайдыы уонна предпринимательство миниистирэ Антон Сафронов, Саха Өрөспүүбүлүкэтин үөрэхтээһиҥҥэ уонна наукаҕа министерствотын үөрэхтээһин сайдыытын хааччыйар киин салайааччыта Владимир Аржаков, «Уус-Алдан улууһа (оройуона)» муниципальнай тэриллии дьаһалтатын баһылыга Алексей Федотов, «Суотту нэһилиэгэ» муниципальнай тэриллии дьаһалтатын баһылыга Василий Иванов, «Кустук» оҕону сайыннарар киин сэбиэдиссэйэ Клавдия Алексеева уонна бэлэмнэнии бөлөх иитиллээччитэ Милена Решетникова мустубут дьон ытыстарын дохсун тыаһынан аалай лиэнтэни быстылар.

  

Ыраахтан-чугастан ыҥырыллан кэлбит ыалдьыттарга анаан саҥа уһуйаан устун экскурсия ыытылынна. Тыа сиригэр толору хааччыллыылаах, киэҥ-куоҥ сырдык уһуйаан тутуллан үлэҕэ киирбитин көрөн киһи сүргэтэ көтөҕүллэр.

 

Үөрүүлээх түгэни эҕэрдэ тылынан Суотту нэһилиэгин дьаһалтатын баһылыга Василий Иванов аста. "Биһиги нэһилиэк саҥа тутуу аһыллыытын бырааһынньыктаабатахпыт ыраатта, онон нэһилиэкпит олохтоохторо үөрэн, астынан сылдьаллар. Бу уһуйаан тэриллибитэ 45 сылыгар саҥа дьиэҕэ киирбитэ олус үөрүүлээх", - диэн туран Суотту нэһилиэгин Бочуоттаах олохтооҕо ааты «Кустук» оҕону сайыннарар киин сэбиэдиссэйигэр Клавдия Иннокентьевна Алексееваҕа туттарда.   

 

«Уус-Алдан улууһа (оройуона)» муниципальнай оройуон дьаһалтатын баһылыга Алексей Федотов уһуйаан тутуутугар кылааттарын киллэрбит, туппут дьоннорго махтанна. "Объект тутуллан бүппүтүн кэннэ киирэн көрөр олус үчүгэй, үөрүүлээх. 2015 сыллаахха ахсынньы 31 күнүгэр Саҥа дьыл буолаары турдаҕына Суотту уһуйаана тутуллар диэн экономика Министерствотын кытта илии баттаспыппыт. Аан бастаан үлэ хайдах торумнаммытын, тутуу хайдах ыытыллыбытын, сотору кэминэн ис бараанын дизайнын хайдах оҥорорго сүбэлэһии барбытын барытын эргитэ саныыгын. Уһуйаан үлэҕэ киирэригэр элбэх киһи санаатын ууран, түмсэн үлэлээтэ. Ол да иһин маннык тутууну үлэҕэ киллэрдэхпит", - диэн улуус баһылыга аҕынна уонна тустаах дьону наҕараадалаата.

Саха Өрөспүүбүлүкэтин Ил Түмэнин Бэрэссэдээтэлэ Александр Жирков биир бастыҥ бырайыактаах уһуйаан үлэҕэ киирбитинэн эҕэрдэтин эттэ. "Бу дьиэ тутуутун хаачыстыбата, оҥоһуута, хааччыллыыта барыта тупсаҕай, үчүгэй. Маннык уһуйааҥҥа үлэлиир иитээччилэр үлэҕит ситиһиилээх, таһаарыылаах буолуохтаах", - диэн туран, оҕо иитиитигэр өр сыллаах үлэтин, кылаатын иһин Ил Түмэн Бэрэссэдээтэлин Махтал суругун «Кустук» уһуйаан педагог-психологар Анна Белолюбскаяҕа, "Саха Өрөспүүбүлүкэтин култууратын туйгуна" ааты үлэ бэтэрээнигэр, Суоттутааҕы народнай театр артыыһыгар Дария Винокуроваҕа,  "Саха сирэ Россия састаабыгар киирбитэ 385 сыла" үбүлүөйүнэй бэлиэни үлэ бэтэрээнигэр, Суотту нэһилиэгин бочуоттаах олохтооҕугар Егор Кривошапкиҥҥа туттартаата.

  

Александр Николаевич уһуйаан коллективыгар малааһыннарынан сертификаты уонна Суотту нэһилиэгин үс уһуйааныгар быйыл саҥа тахсыбыт «Олонхо эйгэтэ оҕо оонньууругар» саха бастакы куукулаларын комплегын бэлэхтээтэ.

Саха Өрөспүүбүлүкэтин инвестиционнай сайдыыга уонна предпринимательство5а миниистирэ Антон Сафронов, Саха Өрөспүүбүлүкэтин үөрэхтээһиҥҥэ уонна наукаҕа министерствотын үөрэхтээһин сайдыытын хааччыйар киинин салайааччыта Владимир Аржаков, Уус Алдан улууһун үөрэҕин управлениетын начальнига Ирина Тарская эҕэрдэлэрин эттилэр. Уһуйаан иитиллээччилэрэ тэрээһини музыкальнай нүөмэрдэринэн киэргэттилэр.

2400 нэһилиэнньэлээх Суотту нэһилиэгэр маннык сырдык, саҥа уһуйаан үлэҕэ киирэн, күннэтэ кырачааннары түмэ тардан, оҕо-аймах чуопчаарар саҥатынан, бар дьон сырдык сыдьаайынан арчыланан үрдүк үөрүү үктэллээх, дьол биһигэ буола турдун!

 

 

                                                                               

                                                   Мүрүгэ «Мүрүчээнэ» уһуйаан

 

Салгыы күнүс 14 чаастан улуус киинигэр, Бороҕон сэлиэнньэтигэр, 240 миэстэлээх 12 бөлөхтөөх «Мүрүчээнэ» оҕо тэрилтэтин дьиэтэ дьэндэйэн, үөрүүлээх аһыллыыта буолла. Өбүгэ сиэринэн торҕо буруону унаарытан алгыс тыл этилиннэ. Үс этээстээх, толору хааччыллыылаах, тупсаҕай тутуулаах оҕо уһуйаанын дьиэтин күлүүһүн тутууну салайбыт «РусСтрой-89» тэрилтэ салайааччыта Руслан Алибеков «Мүрүчээнэ» оҕо тэрилтэтин салайааччытыгар Аграфена Соловьеваҕа туттарда. Бочуоттаах ыалдьыттар аалай лиэнтэни үөрүүлээх быһыыга-майгыга быстылар.

 

"Умнуллубат оҕо саас уйатыгар оонньуубут, уран тылы саҥаран улаатыахпыт бу дьиэҕэ", - диэн «Мүрүчээнэ» уһуйаан кырачаан иитиллээччилэрэ ыалдьыттары хоһоонунан эҕэрдэлээн үөрүүлээх чаастарын астылар. 

 

Ил Түмэн Бэрэссэдээтэлэ Александр Жирков хас да уһуйаантан таҥыллыбыт саҥа коллективы эҕэрдэлээтэ. "Эһиги бары баай уопуттаах үлэһиттэр бүтүн өрөспүүбүлүкэ үрдүнэн бөдөҥ оҕо саадтарын ахсааныгар киирсэр тэрилтэҕэ үлэҕитин саҕалаатыгыт. Олох сайдан ирдэбил улаатан иһэр, онон бары өттүнэн хаалыа суохтааххыт, өссө уратылыахтааххыт. Ол соругу толорор аналлаах бу уһуйаан аанын тэлэччи аста. Үп-харчы барытыгар дэлэй буолбатах, ол да буоллар өрөспүүбүлүкэ ыччат сайдыылаах буоларын туһугар тутууну ыыта сатыыр. Оҕолор бары уһуйааннарыгар күннэтэ үөрэ-көтө кэлэр буолалларын туһугар үлэ барыахтаах. Россия кыһаларыттан итэҕэһэ суох сайдыылаах ыччаттар иитиллэн, сайдан, уһуйуллан тахсыахтаахтар", - диэн бэлиэтээтэ.

 

Александр Николаевич оҕо иитиитигэр өр сыллаах үлэлэрин, кылааттарын иһин Ил Түмэн Бэрэссэдээтэлин Махтал суругун «Ньургуhун» уһуйаан үлэһитигэр Евдокия Оллоноваҕа, «Сарыал» уһуйаан методиһыгар Лариса Бурцеваҕа, "Саха сирэ Россия састаабыгар киирбитэ 385 сыла" үбүлүөйүнэй бэлиэни "Чэчир" уһуйаан сэбиэдиссэйигэр Ирина Копыринаҕа туттарда. «Мүрүчээнэ» уһуйаан коллективыгар малааһыннарынан сертификаты уонна «Олонхо эйгэтэ оҕо оонньууругар» саха бастакы куукулаларын комплегын бэлэхтээтэ.

 

"Уус Алдан улууhа (оройуона)" МТ дьаһалтатын баhылыга Алексей Федотов, Мүрү нэһилиэгин дьаһалтатын баһылыга Василий Аммосов, Саха Өрөспүүбүлүкэтин инвестиционнай сайдыыга уонна предпринимательствоҕа миниистирэ Антон Сафронов, Саха Өрөспүүбүлүкэтин үөрэхтээһиҥҥэ уонна наукаҕа министерствотын үөрэхтээһин сайдыытын хааччыйар киинин салайааччыта Владимир Аржаков, Уус-Алдан улууһун үөрэҕин управлениетын начальнига Ирина Тарская, саҥа дьиэни үлэҕэ киллэрбит "РусСтрой-89" дириэктэрэ Руслан Алибеков эҕэрдэлэрин эттилэр.

 

Чуопчаарар чуорааннар кырачаан иитиллээччилэр хоһооннорун, ырыаларын, хомуска оонньуулларын иһиттиннэрдилэр. Үөрүүлээх түгэн уопсай хаартыскаҕа түһүүнэн түмүктэннэ. Оҕо-аймахха анаан тутуллубут дьиэ сылаас, сырдык буоллун, күннэтэ бу дьиэҕэ кырачаан дьон тоҕуоруһа муһуннун.

 

Ил Түмэн пресс-сулууспата