Тэрээһиҥҥэ өрөспүүбүлүкэ салалтата, Ил Түмэн депутаттара, өрөспүүбүлүкэ Конституционнай суутун судьуйалара, общественнай тэрилтэлэр, түмсүүлэр бэрэстэбиитэллэрэ, Василий Никифоров-Күлүмнүүр хаан-уруу аймахтара, общественность кыттыыны ыллылар. Тэрээһин култуура уонна искусство колледжын «Өркөн» ансамблын сахалыы үҥкүүтүнэн саҕаланна.

 

Ил Түмэн Бэрэссэдээтэлэ Александр Жирков: «Бу күһүн өрөспүүбүлүкэ Судаарыстыбаннаһын күнүгэр парламент иннигэр биллэр судаарыстыбаннай деятель Василий Никифоров-Күлүмнүүр пааматынньыгын өрө көтөҕүллэн туран аспыппыт. Бүгүн сүдү личноска кэриэстэбил, ытыктабыл бэлиэтин, пааматынньыгар тыыннаах сибэкки дьөрбөлөрүн ууруохпут. Бу — бэлиэ түгэн. Хас саас ахсын муус устар 27 күнүгэр Саха сирин олохтоохторо өрөспүүбүлүкэбитигэр судаарыстыбаннаһы олохтохспут дьонтон биирдэстэригэр Василий Никифоровка-Күлүмнүүргэ ытыктаан, бу курдук түмсэр буолуохпут. Ытык киһибитигэр норуотун билиниитэ, сүгүрүйүүтэ кэлэр суола уһун уонна дьүккүөрдээх этэ», - диэн эттэ.

 

Кини 1922 сыллаахха өрөспүүбүлүкэбит автономиятын турууласпыт Максим Аммосов, Платон Ойуунускай, Исидор Барахов уонна кинилэр соратниктарын иннилэринэ, өссө ХVII үйэттэн саҕалаан, биир дойдулаахтарбыт судаарыстыбаннаһы турууласпыттарын бэлиэтээтэ. «Кырдьыктаах история мэлдьи интэриэһинэй, бэйэтигэр тардар күүстээх. Кырдьыктаах, уустук  уонна кыраһыабай историялаах норуот инникилээх буолуохтаах» - диэн спикер Александр Жирков этиитин түмүктээтэ уонна мустубут өрөспүүбүлүкэ парламенын уонна тус бэйэтитин аатыттан Өрөспүүбүлүкэ күнүнэн эҕэрдэлээтэ.

 

Өрөспүүбүлүкэ күнүнэн эҕэрдэ уонна сүдү биир дойдулаахпыт Василий Никифоров-Күлүмнүүр олоҕун, үгүс өрүттээх үлэтин ахтан туран өрөспүүбүлүкэбит Конституционнай суутун бастакы бэрэссэдээтэлэ Дмитрий Миронов, үөрэх уонна наука министрэ Владимир Егоров, өрөспүүбүлүкэ Общественнай палаататын бэрэссэдээтэлин солбуйааччы Александр Гриценко, М.К. Аммосов аатынан ХИФУ устудьуоннарын профсоюзтарын тэрилтэтин аатыттан Василий Попов  тыл эттилэр.  

 

Тэрээһини Дьокуускай куорат 1 №-дээх орто оскуолатын үөрэнээччилэрэ ис дууһаларыттан аахпыт төрөөбүт дойдуларын туһунан хоһоонноро киэргэттэ. Ити кэнниттэн сүдү киһибит пааматынньыгар тыыннаах сибэккилэр дьөрбөлөрө уурулуннулар.

     

Людмила Ноговицына