2018 сыл ыам ыйын 28 күнүгэр Саха Өрөспүүбүлүкэтин Ил Дархана баҕа өттүнэн солотуттан уурайарын туһунан биллэрдэ.

 

Россия Федерациятын Президенэ В.В.Путин 2018 сыл ыам ыйын 28 күнүнээҕи Ыйааҕынан Борисов Егор Афанасьевич солотуттан уурайарга быһаарыныытын ылынна уонна Саха Өрөспүүбүлүкэтин Ил Дархана талыллыар диэри Саха Өрөспүүбүлүкэтин Ил Дарханын эбээһинэһин быстах кэмҥэ толорооччунан Николаев Айсен Сергеевиһы анаата.

 

«Саха Өрөспүүбүлүкэтин Ил Дарханын быыбарын туһунан» 2012 сыл бэс ыйын 28 күнүнээҕи 1084-С 1075-IV №-дээх Саха Өрөспүүбүлүкэтин Сокуонун быһыытынан Саха Өрөспүүбүлүкэтин Ил Түмэнэ Саха Өрөспүүбүлүкэтин Ил Дарханын быыбарын, куоластааһын күнэ буолуо 100 күн инниттэн эрдэлэппэккэ уонна 90 күнтэн хойутаппакка, аныыр.  Саха Өрөспүүбүлүкэтин сокуоннарыгар сөп түбэһиннэрэн Саха Өрөспүүбүлүкэтин Ил Дарханын Саха Өрөспүүбүлүкэтин сиригэр-уотугар олорор Россия Федерациятын гражданнара бүттүүн быһаччы быыбардыыр тэҥ бырааптарыгар олоҕуран кистэлэҥ куоластааһынынан талаллар. Саха Өрөспүүбүлүкэтигэр быыбарга гражданнар тус санааларын, дьулуурдарын көҥүллүк биллэрэллэрэ, талар быраап демократическай тускулларын уонна нуормаларын көмүскээһин мэктиэлэнэр.

 

Өрөспүүбүлүкэ Ил Түмэнэ Саха Өрөспүүбүлүкэтин Ил Дарханын быыбарын аныыр туһунан уурааҕы 2018 сыл бэс ыйын 8 күнүгэр буолуохтаах уочараттаах пленарнай мунньахха ылыныаҕа. Ону тэҥэ бу мунньахха алтыс ыҥырыылаах Саха Өрөспүүбүлүкэтин дьокутааттарын быыбара ананыаҕа. Онон, 2018 сыл балаҕан ыйын 9 күнүгэр Саха Өрөспүүбүлүкэтин Ил Дарханын уонна бар дьон дьокутааттарын быыбара биир күҥҥэ ыытыллыаҕа.

 

Саха Өрөспүүбүлүкэтин Ил Түмэнэ, өрөспүүбүлүкэ сокуон оҥорор уонна бэрэстэбиитэллээх уорганын быһыытынан, Саха Өрөспүүбүлүкэтин Ил Дарханын уонна Саха Өрөспүүбүлүкэтин бар дьонун дьокутааттарын таларга сокуонунан олохтоммут ирдэбил тутуһуллуутун мэктиэлиир, итиэннэ өрөспүүбүлүкэҕэ быһыы-майгы бигэ туруктаах буоларын туһугар Саха сирин судаарыстыбаннай былааһын бары уорганнарын кытта көдьүүстээхтик хардарыта дьайсан тиһиктээх үлэни ыытыаҕа.