Историяны сэргиир, сэҥээрэр дьон бу спектакль сыанаҕа турарын кэтэспиттэрэ ыраатта. Дмитрий Федосеевич икки оонньуулаах уон үс хартыыналаах пьесатын суруйарыгар сылы быһа архыыпка үлэлээн, докумуоннары сыныйан үөрэтэн, элбэх литератураны ааҕан, чинчийэн таһаарда. “Суруйарга уустук бөҕө буоллаҕа. Хайдах эрэ оччотооҕу кэмҥэ олоро сылдьыбыт курдукпун”, - диэн суруйааччы бэлиэтиир.

 

“Урукку өттүгэр архыыптан тахсыбатах, боротокуолтан быһан ылан туора ууруллубут түгэннэри буламмын суруйуубун күүһүрдэн биэрдим. Бу съезд саха дьонугар сүҥкэн суолталааҕа. Ити кэмтэн ыла биһиги өрөспүүбүлүкэбит саҕаламмыта. Билигин норуот өйө-санаата уһуктан, ааспыты билэ сатыыр кэмэ кэллэ. Айымньы бүтүннүү сыанаҕа хайдах да көстүбэт. Арай хаһан эрэ кинигэ быһыытынан киэҥ эйгэҕэ тарҕаныа турдаҕа”, - диэн пьеса ааптара Дмитрий Наумов санаатын үллэһиннэ.

 

Платон Ойуунускай аатынан Саха академическай театрын артыыстара сүрүн  режиссер Руслан Тараховскай салалтатынан оччотооҕу кэм тыынын көрөөччүгэ толору тириэртилэр. Максим Аммосов оруолун эдэр артыыс Прокопий Данилов, Платон Ойуунускайы Саха Өрөспүүбүлүкэтин үтүөлээх артыыһа  Дьулустан Семенов, Исидор Бараховы Саха Өрөспүүбүлүкэтин үтүөлээх артыыһа Василий Борисов оонньоотулар. Михаил Габышевы Александр Борисов, кини ийэтин Варвара Васильевна Габышеваны Саха Өрөспүүбүлүкэтин народнай артыыһа Зоя Багынанова оонньоон ийэ тапталын истиҥ иэйиитин көрдөрдө. Иосиф Сталин уобараһын Саха Өрөспүүбүлүкэтин үтүөлээх артыыһа Дмитрий Михайлов итэҕэтиилээхтик тириэртэ.

 

Оччотооҕу тыйыс кэмҥэ саха кыргыттарыттан чаҕылхай кыыһы Муся Потапованы Ирина Михайлова, Максим Аммосов кэргэнин Раиса Цугель оруолун Тамара Обутова, ураты көрүүлээх Вера Синеглазованы Айталина Лавернова оонньоотулар.

 

Саха Өрөспүүбүлүкэтин Ил Түмэнин Бэрэссэдээтэлэ Александр Жирков спектакль кэннэ санаатын эттэ. “Саха сирин историятыгар  ураты суолталаммыт Сэбиэттэр бастакы Бүттүүн Саха сиринээҕи съезтэрин историятын үчүгэйдик толору үөрэтэ иликпит. Араас улуустартан 100-тэн тахса делегат талыллан кэлбитэ. Билигин кинилэртэн 60-тан тахсалара эрэ кимнэрэ-туохтара, тугу үлэлээбиттэрэ биллэр. Онтон атыттара ааттара делегат быһыытынан сурулла сылдьар. Биһиги инникитин кинилэр кимнээхтэрин үөрэтиэхпит. Пьеса ааптарыгар Дмитрий Федосеевич Наумовка, спектакль режиссеругар Руслан Игоревич Тараховскайга уонна театрбыт артыыстарыгар сүҥкэн үлэҕит иһин махтанабын. Бүгүн сценаҕа бастакы туруута буолла. Дьон театр нөҥүө бу съезд туһунан элбэҕи билиэҕэ. Спектакль инникитин өссө чочуллан, тупсарыллан тахсыаҕа”, - диэн Александр Николаевич бэлиэтээн эттэ.

 

Саха театрын эр дьон артыыстара бука бары бу спектакльга үлэлэһэннэр, кырдьык даҕаны ааспыт үйэҕэ саха чулуу уолаттара күүстэрин-уохтарын, өйдөрүн-санааларын түмэннэр өрөспүүбүлүкэбит автономиялаах буоларыгар турууласпыттарын кырдьыктаахтык көрдөрдүлэр. Спектакль кэннэ көрөөччү тус бэйэтигэр толкуйдаах, эрдэ мунаарбыт ыйытыытыгар хоруйдаах барбыта чуолкай.