Алексей Карманов, Амма улууһун дьокутааттарын сэбиэтин бэрэссэдээтэлэ:

— Чахчыта да историческай сийиэскэ кыттыыны ыллыбыт. Нэһилиэктэрдээҕи уонна улуустардааҕы дьокутааттар боломуочуйалара элбиирэ, статустара үрдүүрэ наада. Арассыыйа эрэгийиэннэригэр муниципальнай тэриллии баһылыктарын уонна дьокутааттарын боломуочуйалара кыччаан биэрэн иһэрин туһунан сийиэскэ эттилэр. Биһиги ол суолу батыһыа суохтаахпыт, төттөрүтүн бары таһымҥа олохтоох салайыныы тускула күүһүрдэр күүһүрэн биэрэн иһиэхтээх. Биир тылынан, дьиҥнээх хаһаайыттар буолуохтаахпыт.

Маҥнайгы сийиэстэн санаам улаханнык көтөҕүлүннэ. Эмиэ да үөрэннибит, эмиэ да санаа атастастыбыт. Ил Түмэн бэрэссэдээтэлэ Александр Жирков дириҥ хорутуулаах, киһи өйүгэр олох судургутук түһэр дакылаатын биһирээтим. Саамай кэрэхсэбиллээҕэ, инникитин бииргэ үлэлээһин төрүтэ уурулунна.

Иннокентий Левин, «Сангаар бөһүөлэгэ» МТ дьокутаата:

 

— Ааспыт сылга талыллыбытым. Саҥа киһиэхэ барыта интэриэһинэй. «Бырайыагынан салайыы» сэминээригэр үөрэнним. Билигин өрөспүүбүлүкэҕэ бырагыраамаларынан үбүлээһин ыытыллар уонна ол быһыытынан үлэ-хамнас барар. Бырайыактаах салайыыга биир бырагыраама иһинэн хас да бырайыагы ырытан оҥорон, олоххо киириилэрин хааччыйыахха сөп. Маныаха үбүлээһинин тиһигэ эмиэ уратылардаах.

Сийиэс тэрээһиннээхтик уонна үчүгэйдик бардн. Кэллиэгэлэрим бары тэрээһиннэргэ бэрт көхтөөхтүк кытыннылар. Сүргэлэрэ көтөҕүллэ, харахтара умайа сылдьар элбэх киһини бэлиэтии көрдүм. Сийиэстэн ылбыт билиим-көрүүм инники үлэбэр туһалыаҕа диэн экчи эрэллээхпин.

 

 

— Уратылаах сийиэс буолла диэн бэлиэтиибин. Урут сылдьыталаабыт өрөспүүбүлүкэтээҕи улахан сугулааннарбар, түмсүүлэргэ резолюциялара барыта эрдэттэн суруллан, бэлэм сытар буолаллара. Этэргэ дылы, эн онно тугу эмэ эбэриҥ да, ол онтон көҕүрэтэриҥ да суох буолара. Бу сырыыга дьокутааттар этиилэрэ сонно миэстэтигэр дьүүллэһиллэн, сийиэс резолюциятыгар киирдилэр. Туруулаһан, эбии киллэртэрии да баар. Сийиэс үлэтэ үчүгэй дэмэкирээттии төрүккэ барда. Астынным.

Александр Третьяков, Орто Халыма улууһун дьокутаата:

 

— Икки ыҥырыыга субуруччу дьокутааттыыбын. Бюджет кэмитиэтин бэрэссэдээтэлэбин. «Эдэр дьокутааттар» төгүрүк остуолга кыттыбытым. Хотугу улуустарга каадыр, исписэлиис боппуруоһа сытыытык турар. «Эдэр исписэлиис» бырагырааманан хотугу улууска үлэлии барбыт киһи, биэс сылынан Дьокуускайга кыбартыыра ыларга дуогабар түһэрсэр. Маны мин ол дьиэтин антах миэстэтигэр ылыахтаах диэн туруорсабын. Тоҕо диэтэххэ, сүнньүнэн улуус бэйэтин оҕото үөрэҕи бүтэрэн баран, итинник дуогабардаах дойдутугар үлэлии барар. Эдэр дьокутааттары өйөөн, кинилэртэн каадыр эрэсиэрбэтин тэрийиэххэ диэн этиилээхпин. Ити икки этиим сийиэс резолюциятыгар киирдилэр.

Улууспут 1 млрд 175 мөл. солк. бюджеттаах. Бюджет сорох сокуоннарыгар уларытыылар киирбиттэрин манна кэлэн биллим. Г.И.Данчикова туһалаах сүбэлэри биэрдэ. Онон чахчы туһалаахтык сылдьан баран эрэбин. Өйгө-санааҕа хаалар сийиэскэ сылдьыбыппыттан улаханнык үөрэбин.