2015 сыл муус устар 27 күнүгэр Санкт-Петербурга Таврическай дыбарыаска Россия Парламентаризмын Күнүгэр Российскай Федерация сокуону оҥорооччуларын мунньаҕа буолла. Мунньаҕы Федерация Сэбиэтин Бэрэссэдээтэлэ Валентина Матвиенко уонна Судаарыстыбаннай Дума Бэрэссэдээтэлэ Сергей Нарышкин салайан ыыттылар.
 
Мунньах кэмигэр экономикаҕа үөскээбит кризис дьайыытын туоратыыга судаарыстыбаннай былаас уорганнарын үлэтигэр, 2015 сылга Россия сокуонун туругун туһунан отчуоту бэлэмнээһиҥҥэ,   “Российскай Федерация субъегар Общественнай палата туһунан» сокуон барылыгар сыһыаннаах боппуруостар көрүлүннүлэр.   
 
«Федеральнай Мунньах уонна регионнар парламеннарын икки ардыларыгар табыгастаах уонна көдьүүстээх бииргэ үлэлээһин бара турар, онуоха сокуону оҥорооччулар Сэбиэттэрин үлэтэ, өҥөтө улахан. Судаарыстыбаннай политика сүрүн хайысхаларын сокуон өттүнэн өйүүр быһаарыылары дьүүллэһэн ылыныыга бу Сэбиэт тутаах былаһаакканан буолар», - диэтэ Валентина Матвиенко. Санатан эттэххэ, Сэбиэт Федеральнай Мунньах икки палатата, регионнар сокуону оҥорор (бэрэстэбиитэллээх) уорганнара сокуону оҥоруу үлэтигэр хардарыта бииргэ алтыһан үлэлээһиннэрин хааччыйар, ону сэргэ парламеннар үлэлэрин уопутун атастаһыыларыгар улахан суолталаах.
 
Дойду парламенынан үрдүкү палататын спикерэ мунньах киин тематыгар, аан дойду кризиһин, арҕааҥы дойдулар сакцияларын түмүгэр үөскээбит экономикаҕа бөрүкүтэ суох балаһыанньаны туорааһын боппуруоһугар болҕомтону туһаайда. Кини соторутааҕыта саҥа редакциянан ылыллыбыт федеральнай бюджекка кризиһы утары дьаһалларга эрэ буолбакка, пенсияны уонна социальнай төлөбүрдэргэ үбүлээһин көрүллүбүтүн бэлиэтээтэ. «Кризис нэһилиэнньэ кыаммат араҥатын социальнай балаһыанньатыгар улаханнык дьайыа суох тустаах. Сокуону оҥорооччу быһыытынан, биһиги сорукпут – кризиһы утары былааны олоххо киллэриини көннөрү кэтээн эрэ көрбөккөбүт, баар быһыыга-майгыга тутатына дьаһалы, миэрэни ылынан иһиэх тустаахпыт”, -- диэтэ спикер.
 
Сокуону оҥорооччулар Сэбиэттэригэр 2015 сылга Россия сокуонун туругун туһунан отчуот истилиннэ. Валентина Матвиенко инникитин отчуоту бигэргэтиини  муус устар 27 күнүгэр -- Россия Парламентаризмын Күнүгэр болдьуур ордугун туһунан эттэ. Федерация Сэбиэтин уонна Судаарыстыбаннай Дума Бэрэссэдээтэллэрэ бырааһынньыгынан сибээстээн сокуону оҥорооччулары барыларын эҕэрдэлээтилэр. «Атын ханна да буолбакка, манна, Таврическай дыбарыаска 109 сыл анараа өттүгэр Россия парламенын бастакы мунньаҕа буолбута. Барыгытын биһиги идэлээх бырааһынньыкпытынан ис сүрэхпиттэн эҕэрдэлиибин», - диэтэ Сергей Нарышкин.
 
Эрдэ Саха Өрөспүүбүлүкэтин Судаарыстыбаннай Мунньаҕын спикерэ Александр Жирков Россия Парламентаризмын Күнүнэн бэйэтин эҕэрдэтигэр бу бэлиэ күн 1906 сыллаахха биһиги дойдубут историятыгар саҥа парламент – Судаарыстыбаннай Дума -- үлэтин саҕалаабытын кытта ыкса сибээстээҕин бэлиэтээбитэ. «Парламентаризм Россия уопсастыбатын олоҕун быстыспат сорҕото буоларын быһыытынан  федерализм олохтонуутугар, политическай уонна общественнай сыһыаннаһыы тиһигин саҥа таһымҥа таһааран сайыннарыыга кµµстээх сабыдыалы оҥорор. Россия парламентаризма сайдыытыгар Саха Өрөспүүбүлүкэтин Ил Түмэнэ бэйэтин тус дьоһун кылаатын киллэрсэр. Ил Түмэн дьүккүөрдээх үлэтинэн социальнай хайысхалаах бюджеты оҥорор, промышленноһы уонна тыа хаһаайыстыбатын өйүүр уонна сайыннарар, олохтоох салайыныыны бөҕөргөтөр, социальнай мэктиэлэри хааччыйар, биһиги өрөспүүбүлүкэбит олохтоохторун бырааптарын уонна көҥүллэрин туруулаһар, олох-дьаһах тэтимнээхтик сайдыытын тупсарар нуормалыыр сокуон базата бигэтик тэрилиннэ», - диэн этиллэр өрөспүүбүлүкэ парламенын спикерин эҕэрдэтигэр.
 
Ил Түмэн пресс-сулууспата РФ ФМ Федерация Сэбиэтин матырыйаалларыгар олоҕуран 
 
МПА СНГ пресс-сулууспатын хаартыската