Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын I съеһин делегаттартан хас биирдиилэрэ бу улахан тэрээһинтэн элбэҕи күүтэр, «атах тэпсэн олорон» кэпсэтэр, долгутар боппуоруостарын туруорсар санаалаахтар.
Елена Старкова, «Муома национальнай нэһилиэгэ» МТ депутата, Муома орто оскуолатын учуутала:
- Биһиэхэ олус күүтүүлээх тэрээһин буолаары турар. Депутатынан талыллан, историяҕа аан бастаан ыытыллар съезкэ кыттарбыттан үөрэбин, бары да кэтэһэбит. Саха сирин бары нэһилиэктэриттэн кэлбит делегаттары кытта алтыһар, санааларын истэр, баар кыһалҕалары бииргэ дьүүллэһэр үтүө эрэ түмүктээх буолуоҕар сэрэйиллэр.
Ол курдук, «Россия Федерациятыгар олохтоох салайыныыны тэрийии уопсай төрүттэрин туһунан» федеральнай сокуон 11 ыстатыйатын 1 пуунун 15-с хос пуунугар нэһилиэктэр икки ардыларынааҕы кыраныыссаны муниципальнай оройуон быһаарар диэн сурулла сылдьар. Маныаха биһиги улууспутугар ити боппуруос билиҥҥитэ быһаарылла илик. Бу мантан- антах ити нэһилиэк сирэ диэн чопчу араарыы суох. Онон бу туһунан съезкэ ыйыталаһар соруктаахпыт.
Маны таһынан, бу сокуоҥҥа киирбит уларыйыылары сэргээтибит. Чахчы бу уларыйыы түмүгүнэн олохтоох салайыныы сайдыытыгар туһаайан бюджеттан үп көрүллэр буолбута улахан ситиһии дии саныыбын. Бу норуот былааска итэҕэйэн эрэрин туоһулуур. Депутаттар боломуочуйалаах буоланнар, бюджеты тыырыы боппуруоһугар күүскэ ылсан үлэлиир кыахтаннылар.
Саха Өрөспүүбүлүкэтин Ил Түмэнин иһинэн парламентарий-дьахталлар уопсастыбаннай-политическай кулууптарын көҕүлээһининэн ыытыллар «төгүрүк остуолга” көхтөөхтүк кыттардыы бэлэмнэнэбит. Онуоха туруорсар боппуруоспут элбэх, айанныахпыт иннинэ өссө биирдэ түмсэн, ыйытыыларбытын чопчулаһыахпыт.
Оксана Сивцева, Өймөкөөн улууһун Үчүгэй нэһилиэгин дьокутаата, Үчүгэй орто оскуолатын иитэр-үөрэтэр үлэҕэ дириэктэрин солбуйааччы:
- Аан бастаан ыытыллар съезд, биллэн турар, интэриэһинэй буолара күүтүллэр. 500-чэ делегат мунньустан, Саха сирин нэһилиэктэрин сүрүн кыһалҕаларын ырытарга, дьүүллэһэргэ туһуламмыт тэрээһин биһиги үлэбитигэр туһалаах буолара саарбахтаммат. Араас хабааннаах ыйытыы баар.
Биллэрин курдук, хоту улуустарга тутуу кыһалҕата сытыытык турар. Биһиги нэһилиэкпитигэр саҥа оскуола тутуутун боппуруоһун быһаарса, тугун-ханныгын билэ, чопчулаһа барыам. Бырабыыталыстыба отчуоттуу кэлэ сылдьан анал бырагыраамаҕа киирдэ диэбиттэрэ.
Ылан көрдөххө, биһиэхэ дьиэлэри уунан хааччыйыы, ититэр ситимҥэ чааһынай дьиэлэри холбооһун – олох-дьаһах коммунальнай хаһаайыстыбаҕа сыһыаннаах элбэх туруорсар боппуруостаахпыт.
Депутат быһыытынан үлэлээбитим иккис сыла. Бөһүөлэк кыһалҕаларын депутаттар баһылыгы кытта биир санааҕа кэлэн, тутатына быһаарарга кыһаллабыт. Съезд чэрчитинэн ыытыллар “төгүрүк остуолларга”, семинардарга төһө кыалларынан сылдьыахпыт, сырыыбыт көдьүүстээх буоларын инниттэн туруорсар ыйытыларбытын чочуйан, чопчулаан биэриэхпит.
Ил Түмэн пресс-сулууспата
Опубликовано: 9 марта, 2017 - 19:54
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!