Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Таатта-Томпо быыбардыыр уокуругун депутата, Ил Түмэн тыа хаһаайыстыбатыгар уонна аграрнай политикаҕа  сис кэмитиэтин бэрэссэдээтэлэ Дмитрий Саввин, норуот депутата Константин Борисов, Саха Өрөспүүбүлүкэтин Киин быыбардыыр хамыыһыйатын бэрэссэдээтэлин солбуйааччыта Иван Андросов, Дьокуускай куорат Гагарин уокуругун управлениетын салайааччыта Руслан Платонов Таатта, Томпо улуустарыннэһилиэктэринэн суорума суолламмыт дьону тиһэх суолларыгар атаарыыга кыттыыны ыллылар.

 

Ил Түмэнин Бэрэссэдээтэлэ Александр Жирков Ытык Күөлгэ тапталлаах кэргэн, икки оҕо амарах аҕата Егор Большакову кытары бырастыылаһыыга сырытта.

 

Егор Михеевич Большаков 1982 сыллаахха ахсынньы 10 күнүгэр Таатта улууһун Туора Күөлүгэр Ульяна Егоровна, Михей Михеевич Большаковтар дьиэ кэргэттэригэр бастакы оҕонон күн сирин көрбүтэ. 2000 сыллаахха Ытык Күөл гимназиятын ситиһиилээхтик бүтэрбитэ. Оскуолаҕа үөрэнэр сылларыгар улуус, өрөспүүбүлүкэ чэпчэки атлетикаҕа, хотугу многоборьеҕа хас да төгүллээх чемпиона этэ. Ыра санаа оҥостон салгыы СГУ физкультурнай факультетыгар үөрэммитэ. Оскуолаҕа учууталлыы сылдьан оҕолору спортка дьарыктаан ситиһиилэммитэ. Айылҕаттан саҥарар-иҥэрэр талааннаах буолан улууска ыытыллар тэрээһиннэри иилээн-саҕалаан ыытара. Нэһилиэккэ аан бастаан аһыллыбыт «Илин» араадьыйа ыытааччыта этэ. Егор 2012 сыллаахтан олоҕун бүтэһик күнүгэр диэри «Сарыал» сынньалаҥ киинигэр спорт инструкторынан ситиһиилээхтик үлэлээтэ. Тааттыныскай нэһилиэк олохтоохторугар спорду көҕүлээн, үгүс үлэни ыытан спорт сайдыытыгар бэйэтин кылаатын киллэрбитэ. Нэһилиэк кини үлэлиирин тухары улуус спартакиадатыгар бастакы миэстэни кимҥэ да былдьаппакка өрө тутан кэллэ. Егор Михеевич 2016 сыллаахха үлэтин түмүгүнэн «Сарыал» коллектив «Бастыҥ үлэһитин» аатын сүкпүтэ. Кини киһи быһыытынан сытыары сымнаҕас майгылааҕа, олус элэккэй, үөрүнньэҥ этэ. Айылҕаҕа сылдьарын, бултуурун сөбүлүүрэ. Кэргэнинээн Мариялыын 2002 сыллаахха ыал буолбуттара. Мария икки кыыс оҕону төрөтөн Егор аҕа буолар дьолун, үөрүүтүн билбитэ.   

 

Нэһилиэк бастыҥ ыччатын Егор Большакову тиһэх суолугар атаарыыга Таатта улууһун баһылыга Михаил Соров, Тааттыныскай нэһилиэк баһылыга Егор Павлов, дьиэ кэргэнэ, аймахтара, учууталлара, доҕотторо, бииргэ алтыспыт дьоно, улуус тэрилтэтин салайааччылара, Таатта улууһун олохтоохторо муһуннулар.

 

Спикер Александр Жирков Ытык Таатта улууһун олохтоохторугар өрөспүүбүлүкэ салалтатын, Саха Өрөспүүбүлүкэтин Ил Түмэнин, Саха сирин олохтоохторун ааттарыттан дириҥ кутурҕанын тириэртэ. Россия Федерациятын атын субъектарыттан кутурҕаннарын тириэрдэр телеграммалар кэлбиттэрин иһитиннэрдэ. Бу күннэргэ саха дьоно түмсүүлээҕин, дьалҕааннаах олоххо бэйэ-бэйэҕэ харыстабыллаах сыһыаннааҕын көрдөрбүтүн тоһоҕолоон бэлиэтээтэ. Инникитин хаһан даҕаны маннык иэдээн тахсыбатыгар, таатталарга күүстээх санааны, түмсүүнү баҕарда.