Ыһыах саҕаланыан иннинэ П.А. Ойуунускай пааматынньыгар бочуоттаах ыалдьыттар: Саха Өрөспүүбүлүкэтин Ил Дарханын эбээһинэһин толорооччу А.С. Николаев, Саха Өрөспүүбүлүкэтин Ил Түмэнин спикерэ А.Н. Жирков, А.П. Дьячковскай, Таатта улууһун баһылыга М.М. Соров, судаарыстыбаннай сүбэһит А.С. Борисов, Саха Өрөспүүбүлүкэтин экологияҕа, айылҕаны туһаныыга уонна ойуур хаһаайыстыбатыгар миниистирин эбээһинэһин толорооччу  С.М. Афанасьев, Саха Өрөспүүбүлүкэтин култууратын, духуобунай сайдыытын миниистирэ В.И. Тихонов, Саха ӨрөспүүбүлүкэтинИл Дарханын уонна Бырабыыталыстыбатын дьаһалтатын Олохтоох салайыныыга департаменын салайааччытын э.т. А.С. Владимиров, Саха Өрөспүүбүлүкэтин Ил Дарханын уонна Бырабыыталыстыбатын дьаһалтатынКаадыр бэлиитикэтигэр судаарыстыбаннай уонна муниципальнай сулууспа департаменын салайааччытын э.т. С.И. Николаева, Дьокуускай куорат Дууматын бэрэссэдээтэлэ А.А. Саввинов, Ил Түмэн депутата А.В. Сусоев, Саха Өрөспүүбүлүкэтин Конституционнай суутун судьуйата И.И. Николаев, Дьокуускай куорат мэрын сүбэһитэ В.Н. Лебедев, Бүтүн Россиятааҕы Норуот фронун Саха сиринээҕи исполкомун салайааччыта В.А. Лютай, Дьокуускай аэропордун генеральнай дириэктэрэ Н.А. Местников, Таатта улууһун нэһилиэктэрин баһылыктара  сибэкки дьөрбөтүн уурдулар.

 

П.А. Ойуунускай хаан-уруу аймахтара Н.Н. Павлов (С.П. Ойунская бииргэ төрөөбүт быраата), сиэнэ Т.И. Николаева, төрүт сиэннэрэ Слепцовтар, Винокуровтар, Семеновтар, Местниковтар, Элбэряковтар бу тэрээһиҥҥэ кыттыыны ыллылар.

 

Сиэр-туом быһыытынан ыһыаҕы арыйар тыл Ил Дархан эбээһинэһин толорооччу А.С. Николаевка, Ил Түмэнин спикеригэр А.Н. Жирковка, Таатта улууһун баһылыгар М.М. Соровка, П.А. Ойуунускай хаан урууларыгар Н.Н. Павловка, сиэн балта Е.В. Слепцоваҕа-Куорсуннаахха бэрилиннэ.

Айсен Николаев бэлиэтээн эппитинэн, Тааттаттан төрүттээх дьон Саха Өрөспүүбүлүкэтин кэскиллээх сайдыы оҥкулун түстээһинигэр көхтөөхтүк кыттыспыттара.

 

Ил Түмэн спикерэ Александр Жирков: “Биһиги омук быһыытынан дьоммутун сэргэбитин история дьалхааннах кэмнэригэр үрүҥҥэ-хараҕа араарбакка этэҥҥэ туоратан, харыстаан, бүөбэйдээн илдьэ сылдьабыт. Ол биир бэлиэ туоһутунан бүгүн ытык Таатта сиригэр Саха Өрөспүүбүлүкэтин үрдүкү салалтата, ыҥырыылаах ыалдьыттар П.А. Ойуунускай төрөөбүтэ 125 сылын өрөгөйдөөхтүк бэлиэтии түмүстүлэр”, - диэн бэлиэтээтэ.

Александр Жирков Саха омук былыр-былыргаттан өбүгэлэрин ытык үгэстэрин үрдүктүк тутан, ол үгэстэрин билиҥҥи кэмҥэ атын омуктарга билиннэрэн, тарҕатан, биһирэтэн иһэрин бэлиэтээтэ.

 

“Маннык бар-дьон кэбэҕэстик өйдүүр, ылынар мындыр дириҥ төрүттээх үгэстэрдээх омук олоҕор тирэхтээх буолар. Биһиги төрүт үгэстэрбитигэр, төрөөбүт тылбытыгар, культурабытыгар тирэҕирэн аныгы олоххо эрэллээхтик дьаһанар кыахтары тобулуохтаахпыт”, – диэтэ Ил Түмэн спикерэ А.Н. Жирков.

 

Ыһыах алгыстаах арыллыытын кэнниттэн Ил Дархан эбээһинэһин толорооччу А.С. Николаев уонна Ил Түмэн спикерэ А.Н. Жирков Таатта улууһун уу халааныгар эмсэҕэлээбит Харбалаах уонна Чымынаайы нэһилиэктэригэр сырыттылар.

 

Суол аартыгыттан чугас турар Харбалаах чох хостуур карьерын көрөн аастылар. Карьерга үлэни ыытар «Төлөн» ААО директора Прокопий Дмитриевич Рахлеев тэрилтэ ситиһиилэрин уонна соруктаах быһаарыыга турар ирдэбиллэрин кэпсээтэ.

 

Салгыы Айсен Николаев уонна Александр Жирков Харбалаахха уу халааныттан эмсэҕэлээбит ыалларга сырыттылар, олохтоохтору кытта көрүстүлэр. Ууга барбыт ыал Бродниковтар этэллэринэн, халаан уута кинилэр дьиэлэрин эрдэ 1998, 2007, 2008 сылларга ыла сылдьыбыт. Быйылгы эмсэҕэлээһин хаһааҥҥытааҕар даҕаны күүстээх буолбут.

 

Орто Амма нэһилиэгин баһылыга Альберт Кулачиков бэлиэтээн эппитинэн, быйыл уу хаһааҥҥытааҕар даҕаны уһуннук турда.

 

Чымынаайы нэһилиэгин баһылыга Егор Васильев өрүс кытылын хаххалыыр даамбаны көрдөрдө уонна нэһилиэнньэ уу халаанын туоратыыга үлэтин кэпсээтэ.

 

Ил Түмэн уу халааннааһыныгар тахсыбыт хоромньуну туоратыыга Өрүспүүбүлүкэ баһылыгын эбээһинэһин толорооччу Айсен Николаев бастакы нүөмэрдээх дьаһала туолуутун хонтуруолга тутар.