Мунньах быйыл кыһын үлэҕэ киирбит Василий Васильевич Никифоров – Күлүмнүүр аатынан кииҥҥэ буолла. Тэрээһиҥҥэ Саха Өрөспүүбүлүкэтин үөрэҕин уонна наукатын миниистирэ Владимир Егоров, Уус Алдан улууһун баһылыга Алексей Федотов, Уус Алдан үөрэҕин управлениетын салайааччыта Ирина Тарская, Саха Өрөспүүбүлүкэтин үөрэҕин уонна наукатын министиэристибэтин иитии уонна эбии үөрэхтээһин салаатын салайааччыта Ольга Яшина, Дүпсүн нэһилиэгин баһылыга Ивамар Соловьев, Күлүмнүүр аатынан киин дириэктэрэ Константин Шелковников уонна тустаах үлэһиттэр, олохтоохтор кытыннылар.

 

Ил Түмэн спикерэ Александр Жирков мунньах саҕаланыытыгар Василий Никифоров – Күлүмнүүр аатынан оҕо технопаарката олох хаамыытын кытта тэҥҥэ үктэһэн сайдан иһиэхтээх, ол туһугар уопсай сүбэнэн тэрилтэ концепциятыгар тустаах уларытыылары киллэриэхтээхпит диэн бэлиэтээтэ.

 

Санатан эттэххэ, Россия Федерациятын Президенэ Владимир Путин дойдуга Оҕо саас уон сылын биллэрэн турар. Манна сөп түбэһиннэрэн, итиэннэ өрөспүүбүлүкэҕэ эбии үөрэхтээһини сайыннарар инниттэн 2017 сыл ахсынньы 29 күнүгэр “В.В.Никифоров-Күлүмнүүр аатынан Дүпсүннээҕи оҕо технопаарката” өрөспүүбүлүкэтээҕи эбии үөрэхтээһин тэрилтэтин тэрийэр туһунан Саха Өрөспүүбүлүкэтин Бырабыыталыстыбатын 1661 №-дээх дьаһалынан бу технопаарка тэриллибитэ.

 

Саха Өрөспүүбүлүкэтин үөрэҕин уонна наукатын миниистирэ Владимир Егоров Саха сиригэр технопааркалар Дьокуускай куоракка “Кванториум” уонна Үөһэ Бүлүүгэ, Ньурбаҕа арыллыбыттарын туһунан эттэ. Кини итилэртэн бэйэтэ саҥа дьиэлээх технопаарканан Күлүмнүүр аатынан Дүпсүннээҕи оҕо технопаарката соҕотох буоларын бэлиэтээтэ.

 

Дүпсүннээҕи эбии үөрэхтээһин кыһата ситиһиилээхтик үлэлиирин туһугар миниистир Күлүмнүүр аатынан киини тустаах материальнай-техническэй базанан, үрдүк бэлэмнээх үлэһиттэринэн, кинилэри олордор дьиэнэн хааччыйыахтаахпыт диэтэ. Маны таһынан киин дьиэтэ тохтобула суох үлэлииригэр эмиэ тустаах үлэһиттэр баар буолуохтаахтарын, атын улуустартан кэлбит оҕолору олордорго интернат чөлүгэр түһүөхтээҕин, уьаайба иһигэр турар дьиэлэри – Василий Васильевич Никифоров – Күлүмнүүр олорбут алааһыттан көһөрүллэн кэлбит дьиэ уонна нэһилиэк эргэ балыыһатын дьиэтэ технопаарка бас билиитигэр киириэхтээхтэрин бэлиэтээтэ.

 

Уус Алдан улууһун баһылыга Алексей Федотов технопаарка толору үлэлииригэр дьиэни-уоту хааччыйыы боппуруостарыгар тохтоото. Кини технопаарка дьиэтин уунан хааччыйыы уонна тупсарыы үлэтин Саха Өрөспүүбүлүкэтин Үөрэҕин уонна наукатын, Архитектураҕа уонна тутууга министиэристибэлэрэ Судаарыстыбаннай сакаас сулууспатын кытта быһаарыахтаахтарын туһунан этии киллэрдэ. Маны таһынан улуус баһылыга технопаарка дьиэтин иһигэр оҥоһулла турар космонавтика музейын хоһун ситэрэргэ үп тиийбэтин, оҕолору таһарга анал массыына баар буолуохтааҕын санатта.

 

Баһылык миниистир Владимир Егоров исписийэлиистэргэ дьиэ көрүллүөхтээҕин туһунан этиитин өйөөн, Дүпсүн нэһилиэгин дьаһалтата түөрт кыбартыыралаах уопсай дьиэ бырайыагын бэлэмнээн “Саха сирэ XXI үйэҕэ” үтүө дьыала хамсааһынын чэрчитинэн 2019 сыллааҕы тутуу былааныгар киллэрдин диэн этии оҥордо. Онно улуус дьаһалтата сүбэ-ама буолан өйүөҕэ диэн эрэннэрдэ. “Технопаарка салалтата улуустааҕы үөрэх управлениетын кытта ыкса үлэлэһэн, быйыл күһүн бу технопаарка үлэтин саҕалыахтаах”, – диэтэ Алексей Федотов.

 

Дүпсүннээҕи технопаарка үрдүк таһымнаах үлэни ыытарыгар сөптөөх аныгы техника баар буолуохтааҕын, Роскосмоһы уонна  "Восточнай" космодрому кытта сүбэлэһэн үлэлиэхтээҕин туһунан мунньах кыттыылаахтара этиилэри көтөхтүлэр. Киирбит этиилэри Саха Өрөспүүбүлүкэтин үөрэҕин уонна наукатын миниистирэ Владимир Егоров өйүүрүн биллэрдэ.

 

Ил Түмэн спикерэ нэһилиэк баһылыга Ивамар Соловьевка технопаарка сиригэр турар саха балаҕанын боппуруоһун нэһилиэнньэни кытта сүбэлэһэн, бэс ыйын 5 күнүгэр диэри этиитэ бэлэмнээн уонна исписийэлиистэргэ аналлаах саҥа дьиэни тутууга “Саха сирэ XXI үйэҕэ” үтүө дьыала хамсааһыныгар сайаапка биэриҥ диэн сорудахтаата. Күлүмнүүр өтөҕө уонна нэһилиэк эргэ балыыһатын дьиэтэ үйэтитиллиэхтээхтэр, ону өрөспүүбүлүкэ Үөрэҕин уонна наукатын министиэристибэтэ улуус дьаһалтатын кытта быһаарыахтаахтар диэн кини эттэ. Мунньахха көтөҕүллүбүт боппуруостары быһаарар үлэни хонтуруоллуурга эппиэтинэстээхтэринэн Саха Өрөспүүбүлүкэтин үөрэҕин уонна наукатын министиэристибэтин иитии уонна эбии үөрэхтээһин салаатын салайааччыта Ольга Яшинаны, Уус Алдан үөрэҕин управлениетын салайааччыта Ирина Тарскаяны уонна Күлүмнүүр аатынан киин дириэктэрэ Константин Шелковниковы анаата.

 

“Аныгы хайысхалаах технопааркалары, кванториумнары тэрийии  Саха сиригэр эрэ буолбакка, бүтүн Россия үрдүнэн саҥа сүүрээн. Ол иһин Күлүмнүүр аатынан технопаарка концепцията хайа баҕарар итинник үөрэх тэрилтэтигэр барсар, олох хаамыытын кытта тэҥҥэ үктэһэн иһэр буолуохтаах. Кинилэр биир сүбэнэн үлэлииллэригэр өрөспүүбүлүкэҕэ технопааркалар ассоциацияларын тэрийиэххэ наада. Ону Үөрэх уонна наука министиэристибэтэ көҕүлүөхтээх. Ол ассоциация чилиэннэрэ бииргэ түмсэн, уоппут атастаһан, Россия, аан дойду таһымыгар тиийэ сүбэлэһэн үлэлиэхтээхтэр. Дүпсүннээҕи Күлүмнүүр аатынан киин курдук технопааркаҕа ананан тутуллубут дьиэ Саха сиригэр соҕотох. Бу технопаарка Россия үөрэҕин саҥа концепциятыгар олоҕуран, туспа штаттанан, өрөспүүбүлүкэ туспа эбии үөрэхтээһинин тэрилтэтэ буолан атаҕар туруохтаах”, – диэн спикер мунньаҕы түмүктээтэ.

 

Мунньах кэнниттэн Ил Түмэн спикерэ Александр Жирков салалталаах бөлөх Суотту нэһилиэгин Оҕуруоттаах сэлиэнньэтигэр тиийэн саҥа оскуола тутуллуохтаах сирин көрдө уонна быйыл кыһын саҥа үлэҕэ киирбит “Кустук” оҕо саадыгар сылдьан үлэһиттэри уонна оҕолору кытта көрүстэ.

 

Оҕуруоттаахха 220 оҕо үөрэнэригэр анаммыт саҥа оскуола маҥнайгы сыбаайата былырыын атырдьах ыйын 18 күнүгэр түспүтэ. Сайын устата балаҕан ыйыгар диэри дьиэ сыбаайалара бары турбуттара. Былаан быһыытынан саҥа үөрэх кыһата 2019-2020 үөрэх сылыгар үлэҕэ киириэхтээх.

 

Ил Түмэн спикерэ этэринэн, оскуоланы тутууга өрөспүүбүлүкэ быйылгы бюджетыгар үбүлээһин көрүллүбэтэх, ол иһин өрөспүүбүлүкэ салалтатын иннигэр үбүлээһини булар сорук турар. Оттон 2019 сылга федеральнай бюджеттан үбүлээһин баар буолуохтааҕын кини бэлиэтээтэ. “Саха сирин министиэристибэлэрэ бэлэм былааны көһүтэн олорбокко, бэйэлэрэ көҕүлээн өрөспүүбүлүкэҕэ тутуу бырагыраамаларыгар кыттыһан үлэлииллэрэ буоллар”, – диэн санаатын эттэ.