Хочо бөһүөлэгин олохтоохторун саамай долгутар боппуруос - киин хочуолунайы туттарыы. Иккиһинэн, оҥоһуута суох буолан, киһи сонноох олорон тоҥор спортивнай саалата өрөмүөннэниэн наадатын ыйдылар. Саҥа хочуолунайы туттарыы боппуруоһа үп-харчы көһүннэҕинэ биирдэ быһаарылларын туһунан эттилэр. Маныаха Матта бөһүөлэгин баһылыга бэйэтэ сүүрэн-көтөн хочуолунайы туттарбыта холобур быһыытынан кэпсэннэ. Бу кыһалҕаны быһаарар инниттэн атын араас хайысханы, ньыманы үөрэтэн, табыгастаах барыйааны тобуларга сүбэлээтилэр. Александр Романов гаас ситимэ кыайан киирбэт нэһилиэктэригэр олохтоохтор киин хочуолунайга холбоноллорун курдук бары күүһү түмэн, күүскэ үлэлиэхтээхтэрин ыйда.

 

Нэһилиэккэ саҥа кулууп каркаһа туруоруллубут. Николай Старостин инникитин нэһилиэк дьаһалтата саҥа кулуубу уонна спортивнай сааланы ититэргэ ороскуоттанар үбү кыайара уустугун быһаарда, онон икки эбийиэги ититиигэ хайдах үлэлиэххэ сөбүн туһунан олохтоохтор уонна нэһилиэк депутаттара сүбэлэһэллэригэр этии киллэрдэ. Балыыһа үлэһитэ Раиса Барашкова түөрт нэһилиэк ыарыһахтарын көрөр-истэр балыыһаҕа үс эрэ куойка көрүллэрэ ыарахан диэтэ. Юрий Баишевка аадырыстаан оҕо уһуйааныгар, үөрэхтээһиҥҥэ сыһыаннаах боппуруостары, гражданскай кэргэннии буолуу тиэмэтигэр үгүһү туруорустулар.

 

Тиэлигигэ саҥа култуурунай, спортивнай киин тутуллара былааннанар. Матырыйааллар номнуо кэлэн, тутуллуохтаах миэстэтин оннугар сыталлар эбит. Олохтоохтор үөрүүлэригэр, хас эмэ сылы быһа туруорсубут кыһалҕалара - саҥа үрдүк кыамталаах хочуолунай үүммүт сылга үлэҕэ киллэриллиэхтээх. Бааһынай хаһаайыстыбалар бэрэстэбиитэллэрэ Саха сиригэр тыа хаһаайыстыбатын сайыннарыыга туһуламмыт сокуон барылын туһунан туоһуластылар. Ил Түмэн тыа хаһаайыстыбатыгар кэмитиэтин чилиэнэ Юрий Баишев: «Сокуон үлэлээтэҕинэ, кини туолуутун ирдиир уонна хонтуруоллуур үлэлэр депутаттар өттүлэриттэн ыытыллыаҕа», - диэтэ. Кини урукку өттүгэр тыа хаһаайыстыбатыгар биир ситимэ суохтук үлэ барбытын, онуоха билиҥҥи миниистир Александр Артемьев бу эйгэни сааһылыырга сыратын биэрэн үлэлии сылдьарын эттэ. Николай Старостин миниистир биир бастакы хардыытынан үүт туттарааччыларга үптэрин быһалыы ыытарга соругу туруоран, билигин иэс-күүс төлөһүүтэ быданнаата диэн эбэн биэрдэ.  Нэһилиэк олохтооҕо Василий Солдатов: «Суолу-ииһи оҥорууга, тутууга тендергэ кыайбыт үлэһиттэри хонтуруоллуур үлэ барар дуо?» - диэн ыйытта. Маныаха Александр Афанасьевич нэһилиэк анал хамыыһыйа тэрийэн, сакаасчыты ыҥыран отчуоттатар эбээһинэстээхтэрин туһунан быһааран биэрдэ. Тиэлигигэ бөрө буулаабытын, сылгылары тардарын иһитиннэрдилэр. Бөрөһүттэргэ көмөлөһөр, бөрө тириитигэр үбү көрүүгэ үлэлэр ыытыллыахтаахтарын эттилэр.

 

Бааһынай хаһаайыстыба бэрэссэдээтэлэ Наталья Данилова сокуону оҥорор депутаттар тыа хаһаайыстыбатыгар үлэлии сылдьааччыларга ыарахан усулуобуйаҕа үлэлиир дьон сирдээх-уоттаах буоларыгар күүскэ киирсэллэрин курдук туруорсалларыгар көрдөстө. Татьяна Лукина быйыл кулуубу үлэҕэ киллэрэргэ депутаттар көмөлөһөллөрүн курдук тоһоҕолоон эттэ. Нөөрүктээйиттэн сылдьар Анатолий Осипов: «Эһиги тускутунан дьоҥҥо киэн тутта кэпсиибит», - диэн санаатын үллэһиннэ.

 

Чыамайыкыга ааспыт сылга чааһынай дьиэлэри киин ититэр ситимҥэ холбооһун үлэтэ эмиэ таһаарыылаахтык барбыт. Онуоха теплотрассаттан тэйиччи дьиэлээхтэр хайдах бу ситимҥэ холбоноллорун туһунан ыйыттылар. Депутаттар уонна улуус баһылыга лоомтукалар, томтордор холобурдарынан, терморобот туруоруу боппуруоһун үөрэтэргэ сүбэлээтилэр. Олохтоох кырдьаҕас Егор Семенов: «Биирдии гектар сири туора дьоҥҥо тоҕо буор-босхо биэрэллэрий?» - диэн ытырыктата саныыр ыйытыытын биэрдэ. Итиннэ Александр Романов дьоҥҥо өйдөнөр гына судургу тылынан быһаарда. Кини: «Россия салалтата сахалартан сири былдьыахха диэн санааттан буолбакка, Уһук Илиҥҥэ кыраныыссалыы сытар билиҥҥитэ 160 мөлүйүөн ахсааҥҥа тиийбит кытайдартан көмүскэллээх буолар сыалтан элбэх сирдээх-уоттаах регионнарга дьону олохсутуу геополитиката ыытыллар», - диэтэ. Ол эрэн, нэһилиэктэргэ баар сирдэри докумуоннуур үлэлэр күүскэ барыахтаахтарын туһунан сэрэттэ. Улуус баһылыга Николай Старостин Чыамайыкы сирэ-уота көмүскэллээҕин эттэ. Павел Дьячковскай волонтердар хамсааһыннара быйыл күүскэ үлэлиэхтээҕинэн сибээстээн, сайын сирин-уотун күрүөлээһиҥҥэ тутар этэрээт уолаттарын көмөлөһүннэрэ ыыталларыгар көрдөстө. Егор Куприянов күөллэр уолбаттарын инниттэн дьаһанарга этии киллэрдэ. Егор Семенов өрөспүүбүлүкэҕэ олус улахан хотоннору тоҕо туталларын, итиэннэ саха сүөһүтүн элбэтиигэ туох үлэлэр ыыталларын туоһуласта. Юрий Баишев 100-тэн тахса миэстэлээх хотоннор көдьүүстэрэ суоҕун ыйда уонна миниистир Александр Артемьев аҕыйах сүөһү киирэр хотоннорун туттарар санаалааҕын дьоҥҥо иһитиннэрдэ. Маны таһынан, олохтоохтор улууска спорт уонна физкультура сыла биллэриллибитинэн, урукку олимпиецтар ааттарынан турнирдары тэрийэргэ этии киллэрдилэр.

 

Үс нэһилиэк олохтоохторо депутаттар кэлэн, санааларын атастаһан барбыттарыгар махталларын тиэртилэр уонна дьон-сэргэ кыһалҕатын быһаарсар, туруорсар ыарахан үлэлэригэр ситиһиилэри, кыайыыны-хотууну баҕардылар.