Саха Республикатын Ил Түмэнин аатыттан Улуу Тунах ыһыаҕынан эҕэрдэлиибин!

 

Ыһыах – биһиги өбүгэлэр саҕаттан илдьэ кэлбит үтүөҕэ тардыһыылаах үгэспит, омук быһыытынан уратыбыт, баайбыт, кэнэҕэски ыччаппытыгар хаалларар кэс тылбыт. Түҥ өбүгэлэрбит ыһыахтыыр үгэстэрэ биһиги былыргы кэмтэн илдьэ кэлбит уус-уран айымньыларбытыгар, үһүйээннэрбитигэр уонна номохторбутугар, биһиги улуу олоҥхобутугар ойуулана, туойулла, кэпсэнэ сылдьар. Ону сөргүтэн, ол аата былыргы дьиҥнээҕинэн илдьэ сылдьарга, саха Ыһыаҕын күдээр көххө кубулуппакка, омук, норуот үйэлээх баайын курдук чөл тутарга дьулуһуу – итинник баҕа санаа түмүллэн Олоҥхо ыһыаҕын үөскэппитэ. Ол аата – олоҥхоҕо анаммыт диэн буолбатах, Олоҥхоҕо, уус-уран номохторбутугар хайдах ойууламмытынан, этиллибитинэн ыһыаҕы тэрийии диэн.

 

Сиэр-туом сөргүтүллэн, бөҕөргөөн, олохсуйан истэҕин аайы Ыһыах сүрүн сиэрдэрэ-туомнара эмиэ силиктэрэ ситэн, ис хоһоонноро, соруктара, суолталара чопчуланан, үйэтийэн иһиэхтэрэ. Итинник дьаһанан биһиги бэйэбит үйэлэри уҥуордаан илдьэ кэлбит баар-суох төрүт үгэспитин чөл илдьэ сылдьыахпыт, сүтэриэхпит суоҕа, ыччаппытыгар бэлэх, кэс тыл гынан хаалларыахпыт.

 

Быйылгы ыһыахтар Улуу Кыайыы 70 сылыгар ананаллар. Ити бары өттүнэн сөптөөх, ураты суолталаах. Саха сирэ Улуу Кыайыы туһугар атын норуоттартан итэҕэһэ суох көмөнү оҥорбута. Бэйэтин бастыҥ ыччатын Ийэ дойдутун көмүскэлигэр уонна бүтүн Аан дойдуну идэмэрдээх өстөөхтөн босхолото ыыппыта, Кыайыыны тыылга уһансыбыта.

 

Быйыл Чурапчы улууһугар Олоҥхо ыһыаҕа ыытыллыаҕа. Ырыаҕа ылламмыт, тойукка туойуллубут Чурапчы сирин тоҕус томтордоругар, мааны түөлбэлэригэр ыһыах түһүлгэлэрэ тэрилиннилэр, ыраахтан-чугастан кэлэр ыалдьыттарын Чурапчы дьоно-сэргэтэ сахалыы сиэри-туому толору тутуһан дьоһуннаахтык көрсөргө бэлэмнэнэр. Кинилэр санааларын хоту буоллун!

 

Күндү Сахам сирин дьоно-сэргэтэ, ытыктабыллаах ыалдьыттар! Хас биирдиигит дьоллоох-соргулаах буолуҥ! Эһигини кытта Иэйэхсиккит эҥэрдэстин, Айыыһыккыт аргыстастын! Кэнчээри ыччаккыт ситиһиилээх буоллун! Элбээн, эбиллэн, күүһүрэн-кыаҕыран иһиҥ! Тапталлаах Сахабыт сиригэр самаан сайын кэлбитинэн! Үрүҥ тунах ыһыаҕынан!