Олунньу 18 күнүгэр "Куруһаала" эргиэн дьиэтигэр "Дархан Уус" Саха сирин тимир уустарын IX сүрүн быыстапката буолан ааста. Тэрээһин арыллыытыгар Саха Өрөспүүбүлүкэтин Тимир уустарын сойууһун бэрэссэдээтэлэ, Саха Өрөспүүбүлүкэтин Духуобунас академиятын академига, П.А. Ойуунускай аатынан судаарыстыбаннай бириэмийэ лауреата Борис Неустроев-Мандар Уус алгыс тылын эттэ.
"Дархан Уус" быыстапканы Саха Өрөспүүбүлүкэтин Тимир уустарын сойууһа уонна бу тэрээһини аан бастаан саҕалаабыт Серафим Попов доҕотторо, Саха Өрөспүүбүлүкэтин Култуураҕа уонна духуобунай сайдыыга миниистиэристибэтин уонна Дьокуускай куораттааҕы "Таатта" түмсүү өйөбүллэринэн тэрийэллэр. Быыстапка тэриллиэҕиттэн ыла саха тимир уустарын былыргы искусствотын, идэтин сөргүтэр, төрүт үгэстэргэ олоҕуран сайыннарар уонна аныгы маастардары өйүүр, көҕүлүүр, сырдатар хайысхалары сорук оҥостон үлэлиир.
Быйылгы тэрээһиҥҥэ Өлөөнтөн, Сунтаартан, Ньурбаттан, Үөһээ Бүлүүттэн, Бүлүүттэн, Кэбээйиттэн, Тааттаттан, Чурапчыттан, Уус Алдантан, Мэҥэ-Хаҥаластан, Намтан, Хаҥаластан, Дьокуускайтан уонна чугаһынааҕы бөһүөлэктэртэн 50-тан тахса уус кытынна.
Ил Түмэн Бэрэссэдээтэлэ Александр Жирков анаан-минээн быыстапканы көрдө, уустары кытта сирэй көрүстэ. Кини саха уустарын кытары ситимнээхтик үлэлэһэр. Түҥ былыргы өбүгэлэрбит ох сааларын оҥорууларын чинчийэн, санаатын уустарга тириэрдэн, Ил Түмэҥҥэ дириҥ ис хоһоонноох төгүрүк остуол ыытан, былырыыҥҥы "Дархан Уус" быыстапкаҕа уустар ох сааларын дьоҥҥо-сэргэҕэ көрдөрбүттэрэ. Ол түмүгэр Бүлүүгэ буолбут Олоҥхо ыһыаҕар ох саанан ытыыга күрэхтэһии тэриллэн дьон сэҥээриитин тарпыта. Билигин уустар музейдарга сылдьан, баар ох саалары көрөн, өбүгэлэрбит туттар албастарын-ньымаларын үөрэтэн, аны ытарга табыгастаах буолар гына сөп түбэһиннэрэн оҥорон үлэлэһэллэр.
Мандар Уус: "Уустарбыт быһаҕы, батаһы, хомуһу оҥорууну баһылаатылар. Аны ити ох сааны үчүгэйдик уһанан таһаарарбыт буоллар. Ил Түмэн Бэрэссэдээтэлэ Александр Жирков биһиэхэ, уустарга, көмө-тирэх, өйөбүл буоларыттан үөрэбит, астынабыт. Түҥ былыргытын, историятын, өбүгэлэрин умнубат, ытыктыыр норуот инникилээх буолар", - диэн санаатын үллэһиннэ.
Олохтоох оҥорон таһаарыыны, ол иһигэр норуот уус-уран оҥоһуктарын, идэлэрин өйүүр туһугар үөрэх уонна наука министиэристибэтэ Дьокуускайдааҕы технология уонна дизайн колледжын кытта тимир ууһун идэтин сайыннарыы киинин тэрийэллэрэ былааннанар. Ол үлэ Ил Түмэн хонтуруолугар турар. Саҥа киин үлэтэ тимир рудатын, өҥнөөх металлары таҥастааһын былыргы технологияларын, норуот уус-уран оҥоһуктарын саҥа көрүҥнэри сөргүтүүгэ туһуланыаҕа. Киин сүрүн уратыта – өрөспүүбүлүкэ тимиргэ маастардарын түмүү, уопут атастаһыыта, маастарыстыбаларын сайыннарыы, тимири таҥастааһын үгэскэ киирбит технологияларын туһанан саха быһаҕын, хомуһу, ат киэргэлин, ох сааны киэҥник оҥорон таһаарыы буолуоҕа.
Тимир ууһа Сергей Тарабукин олоххо сырдык уонна хараҥа күүстэр мөккүөрдэрин, дириҥ философиятын уус киһи хайдах иитиэхтээн таһаарбытын, бары сатабылын, дьоҕурун ууран туран уһаммытын, оҥорбутун сиһилии Ил Түмэн спикеригэр кэпсээтэ.
Быыстапка уонна буолбут көрсүһүүлэр түмүктэринэн: "Кэлбит сорукпун ситтим. Дьоһуннаах кэпсэтииттэн, сүбэттэн санаам күүһүрдэ, улаханнык үөрдүм, астынным", -- диэн саха ытык киһитэ Мандар Уус түмүк оҥордо.
Опубликовано: 20 февраля, 2018 - 13:54
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!