Екатерина Васильевна улуустааҕы дьокутааттар Сэбиэттэрин социальнай политикаҕа хамыыһыйатын чилиэнэ, улуустааҕы култуура  управлениетын начальнигынан үлэлиир. «Сийиэс буоларын истэн баран, ханнык боппуруостарынан ордук үлэлэһэрбитигэр бэйэбит бырагыраамабытын оҥостубуппут. Холобур, эдэр дьокутааттар үөрэх ыла түһэллэрин наадатыгар, уопут атастаһыахтара», — диэн этэр.

 

Ол курдук, дьокутаат кэпсээбитинэн, улууска баар сытыы суолталаах боппуруостарынан этии киллэрэрдии оҥостоллор. «Дьааҥыга туризм салаатын сайыннарарга турунабыт. Өрөспүүбүлүкэ биир саамай тымныы туочуката Саха сирин брендынан буолар. Суолбутун,  инфраструктураны сайыннардахха эрэ, туризм сайдар кыахтаныаҕа. Онон бу хайысхаҕа туспа этиилээхпит», — диир Екатерина Ноговицына.

 

Дьааҥыга биир үгүскэ киирбит тэрээһиҥҥэ дьокуттааттар көхтөөхтүк кыттыбыттар. «Соторутааҕыта улууспутугар Арктика форумун тэрийбиппит. Онно кыттааччылартан үгүс этиилэр киирбиттэрэ. Холобур, эдэр ыаллар, аҕалар түмсүүлэрин тэрийэн, үлэ ыытар курдук. Аны, эдэр дьонтон дьокутаат буолуон баҕалаахтар аҕыйахтар. Тоҕо диэтэххэ, үлэтин үчүгэйдик өйдөөбөттөр, билбэттэр. Ол иһин «Эдэр дьокутаат оскуолата» диэн өрөспүүбүлүкэҕэ кэмиттэн-кэмигэр тэрээһин ыытыллара буоллар», — диэн баҕа санаатын этэр.

 

Маны таһынан Екатерина улуустарын иһигэр парламентарий дьахталлар «төгүрүк остуолларын» тэрийэн, дьахтар оруолун үрдэтии туһунан кэпсэппиттэрин туһунан иһитиннэрдэ.

 

Екатерина Ноговицына — эдэр дьокутаат. «Эн эдэр сылдьан дьокутаат буолбут эбиккин. Тоҕо?» — диэн киниттэн ыйытабын. «Мин оҕо эрдэхпиттэн уопсастыба олоҕор көхтөөх этим. Дьокутаат дьон эрэнэр, кинилэр кыһалҕаларын быһаара сатыыр, интэриэстэрин көмүскүүр киһинэн буолар. Мин улууһум кэскилин туһугар ис сүрэхпиттэн долгуйар буолан, дьокутааттыырга санаммытым », — диир кини.

 

«Ил Түмэн» хаһыат, 11 №-рэ